yerkirmedia.am – Հալէպի մէջ վիճակի բարելաւման նշոյլներ սկսան երեւիլ երէկուընէ այսինքն՝ 17 Յուլիս 2013-ին։ Կանաչեղէն եւ բանջարեղէն մտաւ քաղաք, թէեւ արտասովոր գիներով, սակայն նուազագոյնը ոչ երեւակայական։ Այսօրուան գիները տակաւին երէկունէ աւելի բարելաւուած է։

Բարելաւման երկրորդ նշոյլը պէնզինի ապահովումն է։ Աւելի քան 7-8 ամիսէ ի վեր փակուած քառիւղի կայարաններէն քանի մը կայարան վերակենդանացաւ։ Այսօրուընէ պիտի սկսին պէնզին ծախել, պետական գինով, որ շատ ընդունելի գին է, նկատի ունենալով, որ պէիզինը այն նիւթերէն է, որ պետական հոգատարութիւնը կը վայելէ։ Այսինքն ապահովման ծախսերուն գլխաւոր բաժինը պետութիւնը կը հոգայ։

Երրորդ նշոյլը ամերիկեան տոլարի սակագինի նուազումն է, Յուլիս ամսուան սկիզբը Ամերիկեան տոլարը 200 ս.ո.էն բարձարացաւ մինչեւ 320ի, այսօր տոլարի գինը նուազած է 175ի։ Յիշեմ, որ Սուրիոյ տագնապէն առաջ տոլարի արժէքը սուրիականի դիմաց կը տատանէր 53-55ի միջեւ։

Հայկական կեանքի շրջագծէն ներս երէկ Հալէպահայութեան շտապ օգնութեան Գործադիր Մարմինը մեծ ջանքերով յաջողեցաւ մեծաքանակ կանաչեղէն եւ բանջարեղէն ապահովել եւ մատչելի գիներով վաճառել ժողովուրդին։ Շտապի այս նախաձեռնութիւնը բարձր գնահատուեցաւ հասարակութեան կողմէ։ ՍԵՄ-ի եւ ՀՄԸՄ-ի երիտասարդները ուշ գիշերէն մինչեւ վաղ առաւօտ այս աշխատանքի կարգաւորման գործերը իրականացուցին։

Նշեմ նաեւ, որ ՀՇՕԳՄ-ը ե՛ւ սղութեան, ե՛ւ ապրանք ճարելու դժուարութեան այս ծանր պայմաններուն մէջ կը շարունակէ ամսական հերթականութեամբ սննդակողով տրամադրելու աշխատանքը։

Ապահովական առումով դժբախտաբար հրթիռներու եւ հրասանդերու տարափը չդադրեցաւ։ Երէկ Սիւլէմանիէի մէջ հրթիռ մը ինկաւ, որ Փառք Աստուծոյ միայն նիւթական վնասներ պատճառեց, իսկ նախանցեալ գիշեր Նիլ փողոցին մէջ ինկաւ վեց հրասանդ, որոնց պատճառով զոհուեցան տեղացի երկու երիտասարդներ։

Մարիա Գաբրիէլեան
Հալէպ