Այսօր, հուլիսի 11֊ին ՀՅԴ «Սիմոն Վրացյան» կենտրոնում տեղի ունեցավ ՀՅԴ Հայաստանի ԳՄ ներկայացուցիչ Իշխան Սաղաթելյանի մամուլի ասուլիսը։

Ասուլիսի ընթացքում Իշխան Սաղաթելյանը ամփոփեց Եվրոպական խորհրդարան այցի արդյունքները, անդրադարձավ մի շարք հանդիպումներում ձեռք բերված պայմանավորվածություններին, խոսեց ներքաղաքական զարգացումների և առաջիկա անելիքների մասին, ինչպես նաեւ պատասխանեց լրագրողների հարցերին։

Միջազգային կառույցներում, մասնավորապես՝ Եվրոպական խորհրդարանում, Հայաստանի Հանրապետության և Արցախի շահերը պատշաճ ներկայացված չեն, և մեր հանդիպումների ընթացքում ակնհայտ դարձավ, որ Հայաստանի խորհրդարանական դիվանագիտությունը, ինչպես նաև ԱԳՆ-ն պատշաճ կերպով չեն պաշտպանում հայ ժողովրդի շահերը. հայտարարեց Իշխան Սաղաթելյանը՝ ներկայացնելով Եվրոպական խորհրդարանում իր հանդիպումների արդյունքում արված արձանագրումներից առաջինը։

Նրա երկրորդ արձանագրումը՝ ՀՀ իշխանությունների պնդումները, թե կա միջազգային պահանջ ու կոնսենսուս Արցախի կարգավիճակի հարցում նշաձող իջնեցնելու վերաբերյալ, անհիմն են, նման պահանջ գոյություն չունի։

«Այլ հարց է, որ գոյություն ունի խաղաղության հասնելու պահանջ, խաղաղության օրակարգ, բայց երբ այդ հանդիպումների ընթացքում մանրամասն բացատրում էինք, որ հայ ժողովուրդը դեմ չէ խաղաղությանը, սակայն այդ խաղաղությունը չի կարող լինել մեր հայրենազրկման գնով, և պարտադրված խաղաղությունը տարածաշրջանին չի կարող բերել կայունություն, այս հիմնավորումները նրանց համար շատ հասկանալի էին»,- ասաց Սաղաթելյանը։

Ըստ երրորդ արձանագրման՝ Հայաստանի ընդդիմությունը պայքարում է մի քանի ճակատներով։ Այսպես՝ թուրք -ադրբեջանական պատվիրակություններն աշխարհի տարբեր մայրաքաղաքներում Հայաստանի ընդդիմությանը փորձում են ներկայացնել իբրև ռևանշիստական, տարածաշրջանն ապակայունացնող, պատերազմ հրահրող ուժեր, և նրանց այս թեզերը նաև աջակցություն են ունենում Հայաստանի իշխանությունների կողմից։ Հետևաբար, ընդդիմության բոլոր պնդումներն ու հայտարարությունները, որ ՀՀ իշխանությունները չեն սպասարկում մեր ժողովրդի շահերը, համագործակցում են Թուրքիայի և Ադրբեջւանի հետ, նույն թեզերն են առաջ տանում միջազգային կառույցներում, շատ ակնհայտ էին հանդիպումների ժամանակ։

Չորրորդ՝ աշխարհաքաղաքական այս բարդ իրավիճակում և վերադասավորումների փուլում, որը Հայաստանի համար հղի է նոր սպառնալիքներով, ՀՀ իշխանությունները վարում են պարտվողական, ոչ համարժեք քաղաքականություն»,- նշեց Սաղաթելյանը ՝ շեշտելով, որ Ադրբեջանը դարձել է հետաքրքիր Եվրոպայի համար՝ նավթի ու գազի շնորհիվ, ու այս իրավիճակում բռնապետական Ադրբեջանն ավելի հետաքրքիր է Եվրոպային, քան «ժողովրդավարական բաստիոն» Հայաստանը։

Հինգերերոդ արձանագրմամբ՝ Հայաստանում միջազգային կազմակերպությունները ներքաղաքական կյանքի մասին զեկուցումները ներկայացնում են միակողմանի, և այս հանդիպումները շատ կարւևոր էին, որպեսզի ներկայացվի Հայաստանում տիրող իրական վիճակը՝ քաղբանտարկյալներ, ապօրինություններ և այլն։

Ափսոսում եմ, շատ եմ ափսոսում, որովհետև Մանվել Փարամազյանն այս իշխանության դեմ պայքարել է, այդ պայքարի հետևանքով ապօրինի ազատազրկվել է և քանի ամիս բանտարկության մեջ է գտնվել, այն ինչ կատարվել է Քաջարանում, ինձ համար անընդունելի է, ինչ–որ տեղ նաև անհասկանալի․ ասաց Իշխան Սաղաթելյանը՝ անդրադառնալով հարցին՝ թե ի՞նչ կարծիք ունի Քաջարանի քաղաքապետի կողմից Աննա Հակոբյանին վարդերով դիմավորելու առիթի վերաբերյալ։

Նա ընդգծեց` շատ է վստահել Փարամազյանին, բայց այն, ինչ տեղի է ունեցել, անընդունելի է ու դատապարտելի:
Սաղաթելյանը չբացառեց, որ նման դեպքեր էլի կլինեն, բայց բացառում է, որ նման դեպքերը կարող են մեծ ազդեցություն ունենալ «Դիմադրություն» շարժման վրա:

«Ով գնալու է, թող գնա, տեսնենք տակը քանի հոգի է մնում, որ մենք էլ իմանանք՝ ուր ենք գնում», – ասաց նա:

Իշխան Սաղաթելյանն ասաց, թե վստահ է` շատ լուրջ ճնշում է գործադվել Փարամազյանի նկատմամբ. «Այլ պարագայում չէր անի»:

Գրեթե բոլոր մարզերում արդեն ձևավորվել են «Դիմադրություն» շարժման խորհուրդները: Այո, հիմա հանրահավաքները տեղի են ունենում շաբաթը մեկ անգամ, իսկ մնացած օրերը մեզ համար լիարժեք աշխատանքային օրեր են, որտեղ մենք անում են հսկայական կազմակերպական աշխատանք, որ ձեր և մեր հանրության առջև տեսանելի չեն. անդրադառնալով «Դիմադրություն» շարժման գործունեությանը, հայտարարեց Իշխան Սաղաթելյանը:

«Շարժման ընթացքում բոլոր բացթողումները, խնդիրները և կազմակերպական դժվարությունները գնահատված է, արձանագրված է և այդ թերությունները վերացնելու և շարժումն ավելի ընդլայնելու ուղղությամբ գնում է հստակ աշխատանք», – նշել է նա` հավելելով, որ Հայաստանի տարբեր մարզերում ձևավորվում են շարժման խորհուրդներ, որպեսզի շարժումն ամբողջ ծավալով տեղափոխվի մարզեր:

Ըստ Սաղաթելյանի` բացի հիմնական կուսակցություններից, որոնք ունեն կազմակերպական կառունցներ մարզերում, շարժմանն են ներգրավվում նաև բազմաթիվ անհատների, ուժերի. «Ստեղծվել են 8 կոմիտեներ, ովքեր այդ ուղղությամբ շատ հստակ աշխատանքներ են իրականացնում, որոնց աշխատանքները ավարտելուց հետո, դրանց արդյունքները բոլորին տեսանելի կլինի»:

Իշխան Սաղաթելյանը նաեւ հայտարարեց, որ ՀՀ երկրորդ նխագահ Ռոբերտ Քոչարյանը մասնակցել է հանրահավաքներին, առաջիկայում էլի կմասնակցի, որեւ խնդիր չկա:

Անդրադառնալով Հայաստանում քաղբանտարկյալների առկայության խնդրին, Սաղաթելյանն ասաց, որ այս առումով իրենք թերացել են եւ միջազգային հանրությանը այստեղից ճիշտ զեկույցներ չեն հասել, շատերն առաջին անգամ էին լսում. «Բայց առնվազն այն խնդիրները, որոնք կոծկվել են, սրանից հետո ուշադրություն կդարձվեն, այս իմաստով տեղաշարժ լինելու է»:

Ինչ վերաբերում է վարչապետի պաշտոնանկության գործընթաց սկսելուն, ընդդիմադիր գործիչը հստակեցրեց. «Ես չեմ ասել, որ օգոստոսի 2-ից սկսել ենք պաշտոնանկության գործընթաց: Ասել եմ՝ օգոստոսի 2-ից մեր գործիքակազմին ավելանում է եւս մեկը՝ պաշտոնանկության հնարավորությունը: Ասել եմ հստակ, մենք այդ գործընթացի մեջ կմտնենք միայն այն ժամանակ, երբ հաջողության հասնելու համար լինեն բավարար հիմքեր: Ձեւական այդ պրոցեսի մեջ չենք մտնելու: Իսկ այդ հիմքերը իրավական ու քաղաքական առումով ակնհայտ է, որ կան: Այդ գործընթացը հաջողությամբ կավարտվի միայն այն դեպքում, եթե համաժողովրդական շարժումը հասնի այն կետին, որ այլեւս այլընտրանք չլինի: Խորհրդարան վերադառնալու հետ կապված ասել եմ՝ խորհրդարան վերադառնալու ենք բացառապես մեր օրակարգով»,-ասաց Սաղաթելյանը:

Ինչ վերաբերում է մանդատներից զրկելուն և խորհրդարան վերադառնալուն, ապա Իշխան Սաղթելյանն ասաց․«Խորհրդարան կվերադառնանք բացառապես մեր օրակարգով: Դա կլինի պաշտոնանկության գործընթաց կամ կլինի խորհրդարան մեր տարած գործընթացը, ինչպես արել էինք հունիսի 3-ին: Այլ պարագայում մենք չենք պատկերացնում մեր գործունեությունը խորհրդարանում: Մեր ընտրողների ցանկությունն այն չէ, որ գնանք խորհրդարան, զբաղվենք երկրորդական գործերով»,- ասաց Իշխան Սաղաթելյանը:

Պատասխանելով մանդատներից հրաժարվելու մասին հարցին՝ Սաղաթելյանն ասաց, որ ամենահեշտ ճանապարհը մանդատներից հրաժարվելն է: «Այդ մանդատները մեզ համար կարևոր չեն: Դրանք ծառայելու են մեր ժողովրդին: Եթե կգա մի պահ, որ դրանից հրաժարվելու պահանջ տեսնենք, մենք կքննարկենք, բայց դրանցից հրաժարվելով՝ որևէ արդյունավետություն շարժումը չի ունենալու»,-ասաց նա:

Անդրադառնալով սահմանագծման և սահմանազատման աշխատանքներին՝ Իշխան Սաղաթելյանն ասաց․ այդ աշխատանքները կարող են լինել արդյունավետ ու վստահելի մթնոլորտում այն ժամանակ, երբ Ադրբեջանն իր զորքերը հետ քաշի Հայաստանի ինքնիշխան տարածքից։ Իմիջիայլոց, եվրոպական բոլոր հանդիպումների ժամանակ այդ խնդիրը մենք բարձրաձայնել ենք, քարտեզներով, փաստաթղթերով ցույց ենք տվել, նկարագրել ենք։ Իրենք ունեին տարբեր բացատրություններ այդ հարցի հետ կապված, բայց առնվազն այն հիմնավորումները, որ տվել ենք, առաջիկա զեկույցների ժամանակ այդ հարցերը տեղ կգտնեն»։

Նա նշեց, որ սովորաբար ՊՆ-ին թիրախ չեն դարձրել պայքարի ընթացքում, բայց ըստ նրա՝ Սուրեն Պապիկյանը պետք է հասկանա, որ ինքը ՔՊ-ի պաշտպանը չէ, ու չզբաղվի ՔՊ-ի պաշտպանությամբ, այլ զբաղվի ՀՀ սահմանների պաշտպանությամբ․ «Ինքը առհասարակ պետք է կողմնորոշվի՝ շարունակում է զբաղվել ՔՊ-ի տարածքային գրասենյակների ստեղծումով, թե՞ մեր երկրի պաշտպանությամբ։ Եվ առհասարակ, լավ կանի՝ ձենը կտրի ու գնա զբաղվի նրանով, ինչով պետք է զբաղվի՝ Հայաստանի սահմանների պաշտպանությամբ, այլ ոչ ընդդիմությանը հաթաթա տա, հոխորտա կամ մատ թափ տա։ Թող զբաղվի բանակի վերակառուցմամբ, որն ամբողջությամբ ձախողել է ինքը ու իր թիմը»։

Իշխան Սաղաթելյանը պատերազմի վտանգ է տեսնում:

«Կա պատերազմի վտանգ, ու, եթե ուզում եք իմանալ, այս իշխանությունը պետք է օր առաջ հեռանա նաև այդ պատճառով: Այս իշխանությունը պարտության ու պատերազմի խոհրդանիշ է։ Աստված չանի, եթե այս իշխանությունով մտնենք պատերազմի մեջ, ակնհայտ է՝ ինչ ելք ենք ունենալու»․ հայտարարեց Սաղաթելյանը:

Նա ընդգծեց՝ եթե իշխանությունը մեկ գրամ մտածում է հայ ժողովրդի մասին՝ պետք է օր առաջ հեռանա:

«Այո՛, պատերազմի վտանգ կա», – ընդգծեց նա:

Մանրամասները՝ տեսանյութում

https://youtu.be/ln1wV0guB2E