Բացման խօսքով հանդէս եկան ՀՅԴ Յունաստանի Երիտասարդական Միութեան ատենապետ Արման Գրիգորեան, ՀՅԴ Յունաստանի Կեդրոնական կոմիտէի ներկայացուցիչ Սերգօ Գույումճեան եւ ՀՅԴ Բիւրոյի անդամներ Յովսէփ Տէր Գէորգեան եւ Մուրատ Փափազեան:

Խորհրդաժողովը քննեց զանգուածային ելեկտրոնային լրատուամիջոցներու եւ ընկերային ցանցերու օգտագործումը Հայ Դատի եւ Արցախի ճանաչման աշխատանքներուն մէջ: Նաեւ՝ ներկայացուեցան ՀՅԴ մամուլին դերը, պատմութիւնը եւ սկզբունքները:

Աշխատանքային խումբերու նիստերուն ընթացքին քննարկուեցան ՀՅԴ Երիտասարդական եւ Ուսանողական միութիւններու դասական մամուլի իրավիճակը եւ տարուած քարոզչութիւնը ընկերային ցանցերու վրայ: Ժողովը կեդրոնացաւ թուրք-ատրպէյճանական ուժերուն կողմէ հայութեան դէմ մղուող տեղեկատուական պատերազմին եւ անվտանգութեան հարցերուն վրայ:

Ժողովի աւարտին բանաձեւուեցան առաջարկներ, որոնք կը միտին երիտասարդներուն մօտ զարգացնել տեղեկատուական մարզին մէջ իրենց կարողութիւնները՝ ի սպաս Հայ Դատի աշխատանքներուն: