Կուսակցական շրջանները ամառային ճամբարները կազմակերպելու են Ստեփանակերտում, Ասկերանում, Մարտունիում, իսկ Ֆրանսիայի «Նոր սերունդ» երիտասարդական միությունը՝ Շուշիում:

Տասնօրյա տեւողությամբ ամառային ճամբարներում ընդգրկվելու են տարբեր շրջաններից 10-16 տարեկան 800 պատանի:

Վահագն Դադայանի խոսքերով՝ ճամբարներում երեխաների ուսուցումն իրականացվելու է համակարգչային գիտելիքների, առաջին բուժօգնության, ձեռագործ արվեստի, մարզական և ուսուցողական խաղերի դասընթացներով հագեցած անհրաժեշտ ձեռնարկով:

«Կուսակցական շրջանները գլխավորող սփյուռքյան մեր հայրենակիցները ոչ միայն հնարավորություն են ունենալու շփվել տեղացի երեխաների հետ, այլեւ խորը ճանաչելու Արցախի պատմությունն ու նրա հոգեւոր ժառանգությունը»,- հավելել է Վահագն Դադայանը:

Հունիսի 19-ից ԿԳՍ նախարարության եւ ՊԲ համատեղ ջանքերով անհոգ եւ ուրախ ամառային օրերով քսանօրյա հանգստի արդյունավետ ճամբարներ են մեկնարկել Հանքավանում եւ Ծաղկաձորում: Այս մասին «Ապառաժ»-ին հայտնել է ԿԳՍ նախարարության ռազմահայրենասիրական դաստիարակության եւ արտադպրոցական ծրագրերի բաժնի վարիչ Ստեփան Օհանջանյանը:

Ըստ նրա՝ անհրաժեշտ բոլոր ռեսուրսներով հագեցած ճամբարները նախատեսվել են սոցիալական առանձին խմբեր ունեցող 10-13 տարեկան մոտ 200 աշակերտների համար:

Ծրագրի շրջանակներում իրականացվելու են սպորտային, երգի, պարի, ասմունքի, ինտելեկտուալ խաղերի միջոցառումներ:

Հունիսի 24-28-ը զորամասի բազայի վրա տեղակայված Այգեստան համայնքում 4 հերթափոխով ութօրյա ճամբարներ են կազմակերպվելու ԱՀ հանրակրթական ուսումնական հաստատությունների 11-րդ դասարանի աշակերտների համար:

Ստեփան Օհանջանյանի խոսքերով՝ իրականացվել են նախապատրաստական բոլոր աշխատանքները՝ ժամանակակից բոլոր պահանջներին համապատասխանող հանգստի կազմակերպման միջոցներով:

Յուրաքանչյուր հերթափոխի համար նախատեսված ծրագրով ճանաչողական այցելություններ են կազմակերպվելու պատմամշակութային վայրեր եւ զորամասեր, իրականացվելու են մարզական տարաբնույթ միջոցառումներ, հրաձգություններ եւ այլն:

Ամենամյա «Ասպետ» ռազմամարզական ճամբարում ընդգրկված երեխաների քանակն այս տարի համեմատաբար նվազել է, – նշել է Օհանջանյանը:

Ըստ նրա՝ ցավալի է, որ այս տարի չի գործելու «Սեւան» ճամբարը, որի պատճառով հայտագրված բոլոր երեխաներին հնարավոր չի եղել ընդգրկելու ամառային ճամբարներում:

Հուլիսին Ծմակահող համայնքում դպրոցի բազայի վրա իրենց հանգիստը կվայելեն պատանի բնագետների ճամբարում ընդգրկված աշակերտներ, որոնց միանալու են Երեւան քաղաքի ֆիզմաթ դպրոցի եւ Լիբանանից սփյուռքահայ 40 աշակերտներ:

Բաժնի վարիչը նշել է նաեւ, որ Ծմակահողում նորից նախատեսելու են 2 հերթափոխով 10 օր տեւողությամբ ցերեկային եւ բակային ճամբարներ կազմակերպել, որտեղ ընդգրկվելու են ՀՀ-ից 50, ԱՀ-ից 30 աշակերտներ:

Հասմիկ ՀԱԿՈԲՅԱՆ
aparaj.am