Հենց այստեղ ես հասկացա, որ պապին մի բանից անհանգիստ է: Այլապես ինչո՞ւ պետք է Արման Մուսինյանն ասեր, թե այն ուժերը, որոնք ծրագրեր կկառուցեն Ռոբերտ Քոչարյանի հետ, դատապարտված են կործանման: Ինչպիսի անամոթություն: Բայց որ արդեն ասել է, հարց է առաջանում՝ տեսնես քանի՞ քաղաքական ուժ կա այսօր Հայաստանում, որ ժամանակին համագործակցել է Լևոն Տեր Պետրոսյանի հետ և չի կործանվել: Պարզվում է՝ բոլորն են կործանվել, բացառությամբ այն ուժերի, որոնք կամ հակադրվել են ՀՀՇ-ական գեղի կլուբին, կամ ճիշտ պահին փախել այնտեղից: Պարոն Մուսինյան, գոնե մեկ-երկու ուժ, որ պապին էր ստեղծել, պահեիք պատմության համար: Դա էլ չեք արել, ախր:

Բայց վերադառնանք մեր էկզոտիկ պատմությանը, որ սկսվեց Արման Մուսինյանի անզգույշ հայտարարությունից, թե, իբր, Ռոբերտ Քոչարյանի կառավարությունից եկել, իրենց ստուգել են և մեկ-երկու կաշառակերության դեպքից բացի, ոչ մի կեղտ չեն գտել: Յա՛ա՛ա՛… Այսինքն պապին մաքո՞ւր է: Եթե դա հենց այդպես է, ապա Ռոբերտ Քոչարյանն այսօր պետք է Լևոն Տեր-Պետրոսյանի աստված հռչակվեր: Բայց դա տեղի չի ունեցել: Ուրեմն, իսկապես, այդ ինչպե՞ս են ստուգել, որ համատարած թալանը, ժողովրդի կրած տանջանքը, փախեփախի աստիճանի հասած արտագաղթը, օրը ցերեկով կատարված հարյուրավոր սպանությունները, իբր Ադրբեջանում կորած ամբողջական գնացքները, շան մսի գնով յուրայիններին սեփականաշնորհած շենքերը, ընդդիմության դեմ իրականացված բռի գործողությունները, թերթերի արգելումը, բանկերից խեղճուկրակ քաղաքացիների վերջին խնայողությունների հափշտակումները և այլն և այլն, չեն տեսել: Ու տեսեք, թե դրանից ինչ է ստացվում: Մուսինյանը, փաստորեն, մեզ նորանոր հիմքեր է տալիս Քոչարյանից դժգոհելու: Պարոն Քոչարյան, ինչո՞ւ այդ ամենը ջրի երես չեք հանել, ինչո՞ւ քաղաքական գնահատական չեք տվել Տեր-Պետրոսյանի հիմնադրած ավազակապետությանը, ինչո՞ւ բանտ չեք նստեցրել ՀՀ առաջին նախագահին, որ նա այսօր իր խոսնակի բերանով լկտիաբար չհայտարարեր, թե ինքը մաս-մաքուր է:

Վարչապետի աթոռին հայտնված Նիկոլ Փաշինյանի անհաջողությունների պատճառներից մեկն էլ, ըստ Մուսինյանի, նախկիններին քննելու գործում ցուցաբերած դանդաղկոտությունն է: Նա շտապեցնում է Փաշինյանին՝ պետք է արագացնել այդ գործընթացը: Ես այս հարցը մի փոքր այլ կերպ կդնեի: Ըստ իս՝ Փաշինյանի մեծագույն սխալը նախկինների քննությունը ոչ ճիշտ տեղից սկսելն էր: Ի վերջո, նրա համար շատ ավելի դյուրին էր առաջինը պատռել հենց Լևոն Տեր-Պետրոսյանի դիմակը, քանզի նույն շկոլայի ներկայացուցիչն է նաև ինքը և քաջատեղյակ է բոլոր այն այլանդակություններին, որոնք կատարվել են ՀՀՇ-ի տխրահռչակ իշխանության տարիներին: Մուսինյանն այսօր հաթաթա է տալիս ՀՀ նոր իշխանություններին՝ եթե տեսնենք, որ սխալ ճանապարհով են գնում, կսկսենք կոշտ քննադատել: Իսկ ո՞րն է ճիշտ ճանապարհը: Ըստ ՀԱԿ խոսնակի՝ ճիշտ ճանապարհը շառուփորձանքն ամեն գնով Լևոն Տեր-Պետրոսյանից հեռացնելն է: Կստացվի՞… Չգիտեմ: Չեմ կարող նաև միանշանակ պնդել, որ Տեր-Պետրոսյանին կձերբակալի հենց Նիկոլ Փաշինյանը, բայց մի բան հաստատ է, որ Նիկոլ Փաշինյանը, իհարկե ոչ առանց Լևոն Տեր-Պետրոսյանի դրդման, սկիզբ է դրել միանգամայն նոր քաղաքական ավանդույթի՝ քաղաքական հաշվարկներով բռնել ու դատել նախկիններին: Հիմա արդեն ամեն ինչ կախված է այն բանից, թե ինչպե՞ս կվարվեն հաջորդ իշխանությունները: Հասկանալի է, չէ՞, որ Փաշինյանի իշխանությունն էլ մի գեղեցիկ օր դառնալու է նախկին: