Երեւանեան հանդիպումին պաշտպանական համակարգի գերատեսչութեանց ղեկավարները յստակացուցած են համագործակցութեան առաջադրանքային կէտերը.

Ա.- Փորձառութեան փոխանակում
Բ.- Միացեալ մարզումներ
Գ.- Զինուորական կրթութեան եւ վերապատրաստութեան համատեղ վարժանքներ
Դ.- Ճգնաժամային իրավիճակներու մէջ հետախուզական տեղեկատուութեան փոխանակում

Կը թուի, որ այս վերջին կէտն է ամէնէն շատ ուշագրաւը եւ քաղաքական իրադրութիւններուն հետ կապուող բաժինը: Առաջին երեք կէտերը որեւէ համագործակցութեան պարագային գրեթէ սահմանումի դասական բաղադրիչներ են` փորձի փոխանակում, միացեալ վարժանքներ, վերապատրաստութիւն:

Մեկնաբանական որեւէ փորձ անմիջապէս երկու երկիրներու ապրած ճգնաժամային կացութիւնները պիտի մտաբերէ, տեսնելու համար առաջինի պարագային Ազրպէյճանը, մինչ երկրորդի պարագային` Իսրայէլը: Եւ ահա այստեղ է, որ հետախուզական տեղեկատուութեան փոխանակումը կը ստանայ ռազմավարական լուրջ նշանակութիւն` ռազմական դաշինքի մը էական բաժինը ներառած ըլլալով:

Արդարեւ, փակագիծերը բանալու պարտականութիւնը ստանձնած է լիբանանցի նախարարը, երբ յստակօրէն յայտարարած է. «Լիբանանը եւ Հայաստանը իրենց սահմաններուն վրայ կը դիմագրաւեն միեւնոյն հարցերը եւ մարտահրաւէրները: Իսրայէլը միշտ ոտնձգութիւններ կը գործէ մեր հողերուն նկատմամբ, ինչպէս նաեւ շարունակական կերպով կը խախտէ միջազգային որոշումները, որոնցմէ կարեւորագոյնն է թիւ 1701 բանաձեւը: Վերջերս ան երկու անօդաչու թռչող սարքեր ղրկած էր Պէյրութ, մէկը պայթեցաւ, իսկ միւսը վար առնուեցաւ եւ գրաւուեցաւ լիբանանցիներուն կողմէ: Նոյնպէս Հայաստանը կը դիմագրաւէ Ազրպէյճանի կողմէ իր սահմաններուն եւ հողերուն նկատմամբ անօդաչու թռչող սարքերով ոտնձգութեան մարտահրաւէրը: Եւ ասիկա յաւելեալ պատճառ մըն է, որ ապահովական մարզին մէջ իրարու հետ համագործակցինք` ապահովական եւ հետախուզական տեղեկութիւններու փոխանակման միջոցով»:

Համեմատական դիտարկում կատարելով` Լիբանանի պաշտպանութեան նախարարը յստակօրէն կը փոխանցէ, որ Ազրպէյճան իբրեւ յարձակողապաշտ պետութիւն անօդաչու սարքերով ոտնձգութիւններ կը կատարէ հայկական տարածքներու նկատմամբ` խախտելով միջազգային օրէնքը: Համեմատութիւնը ո՛չ միայն երկու յարձակողապաշտ երկիրներու օգտագործած անօդաչու սարքերուն կը վերաբերի, այլ նաեւ միջազգային օրէնքը խախտելու եւ այլ պետութեան տարածքային ամբողջականութեան սպառնալու:

Աւելի՛ն. ճիշդ է, որ նախարար Պու Սաապ կը խօսի Հայաստանի սահմաններուն եւ տարածքներուն նկատմամբ կատարուող ոտնձգութիւններու մասին, սակայն անուղղակիօրէն կը դատապարտէ նոյն սարքերով նոյն ոտնձգութիւնները Արցախի նկատմամբ: Խօսքը նոյն երկրին մասին է, նոյն ոտնձգութեան եւ նոյն միջոցով:

Իսրայէլ-Ազրպէյճան համեմատութիւնը, որ կատարած է Լիբանանի պաշտպանական համակարգի ղեկավարը, կշռադատուած է բոլոր առումներով. ան վստահաբար նկատի ունեցած է, որ ապրիլեան պատերազմի ընթացքին հեռակառավարուող անօդաչու սարքերը, որ օգտագործած է Պաքուն, տրամադրուած եղած են Թել Աւիւի կողմէ: Իսկ իսրայէլեան նման սարքաւորումներու մասին լիբանանեան կողմը փորձառութիւն եւ տեղեկատուութիւն ունի` նախադէպ պատերազմական գործողութիւնները եւ հարուածուած ու լիբանանեան տարածքներու վրայ ինկած կազմածները նկատի ունենալով: Իսկ թէ՛ փորձառութեան եւ թէ՛ հետախուզական տեղեկատուութեան փոխանակումը թարմացուած համաձայնագիրի կէտեր են, որոնց շուրջ քննարկում կայացած է Երեւանի մէջ երկու նախարարներուն մասնակցութեամբ:

«Ա.»
aztagdaily.com