Լիբանանահայութիւնը 137.573.000 Լ. Ո. Նուիրաբերեց Լիբանանահայութեան
20 Դեկտեմբեր 2019 137.573.000 ՇնորհակալութիւնՅ. ԲԱԳՐԱՏՈՒՆԻ
Լիբանանի դաժան այս օրերուն, Լիբանանի հայութիւնը ցնծութիւն ապրեցաւ երէկ ամբողջ օրը:
Հայկական երեսփոխանական պլոքին նախաձեռնութեամբ «Միասնաբար ուրախացնե՛նք հայ ընտանիք մը» նուիրաբերումի արշաւը գլեց ու անցաւ ակնկալութեան շեմը, եւ հայութիւնը անգամ մը եւս փաստեց, որ իր հպարտութիւնն ու արժանապատուութիւնը անշրջանցելի պատուանդաններ են, եւ ոչ ոք կրնայ ընկճել ու խուճապի մատնել զինք:
Պէտք էր երէկ տեսնել «Շաղզոյեան» կեդրոնի եռուզեռը առաւօտեան ժամը 10:00-էն մինչեւ երեկոյեան ժամը 6:00: Հոն էին աշակերտն ու մամիկը, հոն էին ուսուցիչներն ու բանուորները, հոն էին գործատէր մարդիկ ու պարզ պաշտօնեաներ, հոն էր մեր հայ երիտասարդութիւնը, հոն էր կամաւոր բանակը հայուհիներու, հոն էին մեր ժողովուրդին բարեկամ արաբ քաղաքացիներ:
Բայց մանաւանդ հոն էր հայու նուիրաբերումի ոգին, միասնաբար մէկ բռունցք ըլլալու վճռակամութիւնը:
Ամանորի առիթով հայ ընտանիք մը ուրախացնելու նուիրաբերումի արշաւի յաջողութիւնը, տասնամեակներ ամբողջ Լիբանանի հայութեան աւանդութեան մաս կազմող մէկ նոր նախաձեռնութիւն է, որ կու գայ միանալու մեր ժողովուրդը ամուր եւ անընկճելի կամքով պահելու հաւաքական ճիգին:
Վստահ ենք, որ հաւաքուած նուէրներու գումարը պիտի բարձրանայ յառաջիկայ օրերուն եւս, եւ Լիբանանի մէջ կամ Լիբանանէն դուրս ապրող հայորդիներ անպայման պիտի ուզեն մաս կազմել ուրախութիւն տարածելու, ժպիտ բաշխելու, ամրութիւն կերտելու հաւաքական զօրակցութեան արշաւին:
Շնորհակալութի՛ւն բոլորին անխտիր:
Բոլոր անոնց, որոնք չնչին գումարով կատարեցին իրենց նուէրը:
Բոլոր անոնց, որոնք մեծագումար մասնակցութիւն ունեցան:
Շնորհակալութի՛ւն անոնց, որոնք հոգիով ու սրտով եղան մեզի հետ, բայց չկրցան այս անգամ նուիրել:
Շնորհակալութի՛ւն տակաւին այն հայորդիներուն, որոնք նմանօրինակ նպատակներու կը կատարեն նուիրատուութիւններ այլ հաստատութեանց կամ միութեանց ճամբով:
Շնորհակալութի՛ւն մեր կամաւորներուն:
Մեր սքանչելի ժողովուրդին 137.573.000 շնորհակալութի՛ւն:
Ու ճիգը պիտի շարունակուի:
Պիտի շարունակուի աշխատանքը հաւաքական զօրակցութեան, հաւաքական գօտեպնդումի եւ հաւաքական ամրութեան ի խնդիր:
Պիտի չտկարանանք:
Պիտի չընկրկինք:
Պիտի չընկճուինք:
Պիտի մնանք ամուր, ինչպէս միշտ:
Լիբանանահայութիւնը 137.573.000 Լ. Ո. Նուիրաբերեց Լիբանանահայութեան
Դեկտեմբեր 18-ի առաւօտեան ժամերէն մինչեւ երեկոյ լիբանանահայութիւնը խուռներամ մասնակցութիւն բերաւ «Միասնաբար ուրախացնե՛նք հայ ընտանիք մը» թեմայով ռատիոթոնին` ընդառաջելով Հայկական երեսփոխանական պլոքի կոչին:
Հերթական անգամ լիբանանահայութիւնը իր հոգեւոր, ազգային, միութենական, կրթական, մշակութային, ուսանողական եւ երիտասարդական շրջանակներով հաւաքաբար զօրակցեցաւ լիբանանահայ համայնքի կարիքներուն հասնելու հրամայականի կատարման նախաձեռնութեան:
Ժողովրդային տարբեր խաւերու ինքնաբուխ մասնակցութիւնը ներհամայնքային առումով ամէնէն տպաւորիչ ձեւով յաջողցուց իրարօգնութեան հաւաքական զօրակցութիւնը:
Հայկական երեսփոխանական պլոքը շնորհակալութիւն կը յայտնէ բոլոր նուիրատուներուն անխտիր, ռատիոթոնին լծուած կամաւոր փաղանգներուն, որոնք անգամ մը եւս ընդառաջեցին հայ ընտանիքներ ուրախացնելու ազգային-մարդկային կոչին` վերահամոզելով բոլորս, որ սփիւռքի կեդրոնական հանգամանք վայելող լիբանանահայութիւնը ամբարած է տարբեր տեսակի տագնապներ յաղթահարելու կամքը, ունակութիւնը եւ վճռակամութիւնը:
ՀԱՅԿԱԿԱՆ ԵՐԵՍՓՈԽԱՆԱԿԱՆ ՊԼՈՔ
