Շահան Գանտահարեան այս առիթով յայտնեց, որ «Ազդակ»-ի մատենագիտութիւն կազմելը միշտ ալ եղած է թերթին ծրագիրներուն կարգին, սակայն ցաւ ի սիրտ այսօր սփիւռքի մէջ չկան մատենագիրներ, որոնք կրնան տանիլ այս աշխատանքը եւ Արտաշէս Տէր Խաչատուրեանին գործը իր լրումին հասցնել: Ըստ անոր, Ազգային գրադարանի նախաձեռնած գիտաժողովը առիթ դարձաւ նման պայմանաւորուածութիւն ձեռք բերելու եւ, Արտաշէս Տէր Խաչատուրեանի ընտանիքին հետ խորհրդակցելով, անոնք որոշեցին այս նուիրատուութիւնը կատարել: 90-ամեայ ելեկտրոնային արխիւը պիտի յատկացուի Հայաստանի ազգային գրադարանին` ակնկալելով, որ մատենագիտութիւն կազմելու բարդ, երկարամեայ աշխատանքը փայլուն կերպով կատարուի: Գանտահարեան ուրախութիւն յայտնեց, որ գիտաժողովին ընթացքին կատարուած քննարկումները գործնական արդիւնք տուին, եւ անկէ պիտի շահի Հայաստանի եւ սփիւռքի մամուլը:

Տարօն Տէր Խաչատուրեան յայտնեց, որ հայրը` Արտաշէս Տէր Խաչատուրեան, սկսած էր կազմել «Ազդակ»-ի մատենագիտութիւնը, բայց եւ այնպէս, կանուխ հեռանալով կեանքէն, չէ հասած ի կատար ածել երազը: «Այսօր մենք ուրախ ենք, որ «Ազդակ»-ի խմբագրակազմի հետ համաձայնութեան գոյացնելով կրցանք օրաթերթի թուայնացուած խտասկաւառակները նուիրել Ազգային գրադարանին եւ վստահ ենք, որ այստեղ ամենայն պատասխանատուութեամբ եւ սիրով պիտի կատարեն մատենագիտութիւնը կազմելու դժուար աշխատանքը: Քանի մը տարի ետք մենք պիտի ունենանք «Ազդակ»-ի լիարժէք մատենագիտութիւնը, որ մեծ լուսամուտ պիտի բանայ սփիւռքի մամուլին հետ», շեշտեց ան:

Ազգային գրադարանի տնօրէն Հրաչեայ Սարիբէկեան ըսաւ, որ «Ազդակ» օրաթերթի մատենագիտութիւնը կազմելու համար պիտի ստեղծուի աշխատանքային խումբ, նախատեսուած է աշխատանքները աւարտել մինչեւ թերթին 100-ամեակը:

«Շատ կարեւոր իրադարձութեան մը մեկնարկը ազդարարուեցաւ այսօր: Կը թուի, թէ մամուլը այսօր տպագրուեցաւ, գնաց պատմութեան գիրկը, բայց կարեւոր է այդ պատմութիւնը փրկելը, իւրաքանչիւր յօդուած հասանելի դարձնելը: Յատկապէս կարեւոր կը նկատեմ սփիւռքահայ մամուլի մատենագիտութիւններ կազմելը, քանի որ տարբեր գաղութներու մէջ լոյս տեսնող մամուլը խորհրդային տարիներուն լիովին դուրս մնացած է մեր ուշադրութենէն: Մենք կը գիտակցինք, որ չափազանց կարեւոր այս գործը նաեւ բարդ պիտի ըլլայ իրականացնել, քանի որ 1927 թուականէն լոյս տեսնող պարբերականի մասին է խօսքը, բայց վստահ եմ, որ Ազգային գրադարանի աշխատակիցները ամենայն պատասխանատուութեամբ պիտի մօտենան գործին եւ «Ազդակ»-ի 100-ամեակին լիարժէք մատենագիտութիւնը պատրաստ պիտի ըլլայ», շեշտեց ան:

aztagdaily.com