Ժողովականները շեշտեցին, որ Լիբանան հեռու պէտք է պահել արտաքին ամէն տեսակի միջամտութիւններէ եւ ապատեղեկատուութեան ու խեղաթիւրումներու վրայ հիմնուած խուճապային մթնոլորտէ: Փաստը ցոյց տուած է, որ բեւեռացումը երբեք չի նպաստեր ներկայ առաջադրանքներու իրականացման, այլ ընդհակառակն` աւելի կը ծանրացնէ առկայ վատ կացութիւնը:

Իսկ ազգային օրակարգով, որպէսզի ստեղծուած տնտեսական տագնապը չունենայ սուր հետեւանքներ, կենսական նկատուեցաւ, որ համայնքի կազմակերպութիւնները եւ կառոյցները առաւելագոյն դիւրութիւններ ընծայեն համայնքի զաւակներուն եւ զարկ տան ընկերային ու բարեսիրական օժանդակութիւններուն` թեթեւցնելու համար քաղաքայիններուն կրած տնտեսական, կենցաղային, առողջապահական ու ապրուստի ծանր բեռը:

Այս ծիրին մէջ անհրաժեշտ նկատուեցաւ ներկայ փուլին անխախտ պահել լիբանանահայութեան անվտանգութիւնն ու միասնակամութիւնը եւ ճիգ չխնայել երաշխաւորելու լիբանանահայ համայնքի կենսունակութիւնը եւ անոր պատմական դերակատարութեան շարունակականութիւնը:

Միջկուսակցական ժողովը անդրադարձաւ նաեւ պատմութեան ընթացքին Լիբանանի հանդէպ մի՛շտ ալ թշնամական վերաբերմունք որդեգրած, երկար ժամանակ զայն իր լուծին ենթարկած, զայն սովամահ դարձուցած, ծաւալապաշտ ու ցեղասպան Թուրքիոյ` Լիբանանի նկատմամբ որդեգրած նորօրեայ տխուր վերաբերմունքին, որ կը սպառնայ այս անգամ երկրի կայունութեան ու ապահովութեան: Այս իմաստով անհրաժեշտ նկատուեցաւ ցուցաբերել համալիբանանեան զգաստութիւն եւ խոհեմութիւն:

Ժողովը անդրադարձաւ նաեւ հայաստանեան ու արցախեան վերջին իրադարձութիւններուն: Որոշուեցաւ յառաջիկայ հանդիպումին եզրակացնել Հայոց ցեղասպանութեան 105-ամեակի ոգեկոչման համահայկական ձեռնարկներու մանրամասնութիւնները:

ՍԴՀԿ
ՀՅԴ
ՌԱԿ

aztagdaily.com