Կառավարությունը փորձում է տարբեր ծրագրերով լուծել խոցելի խավի խնդիրները
17 Ապրիլ 2020 «Առաջին լրատվական»-ի զրուցակիցն է Լիբանանի «Ազդակ» օրաթերթի գլխավոր խմբագիր Շահան Գանդահարյանը:– Պարոն Գանդահարյան, ի՞նչ իրավիճակ է Լիբանանում։ Կորոնավիրուսով քանի՞ վարակված կա։
– Լիբանանում կորոնավիրուսի վարակակիրների թիվը 658 է, մահացածներինը՝ 21, բուժվածները՝ 84:
-Իշխանությունների իրականացրած միջոցառումները կորոնավիրուսի դեմ պայքարում ինչպե՞ս եք գնահատում։
-Համապատասխան գերատեսչությունները, հատակապես առողջապահական, արտակարգ իրավիճակի հատուկ մարմին, իրավապահ մարմիններ, քաղավիացիա, աշխատում են օպերատիվ՝ հակաճգնաժամային ծրագրեր իրականացնելով։ Կան, իհարկե, կանխարգելման, թեստավորման, բուժման գործողություններ և շրջագայության սահմանափակումներ։
-Հայերի շրջանում արդյոք շա՞տ են վարակվածները։
-Համայնքից վարակակիրներ կան, ոչ մեծ թվով։ Կան, իհարկե, որ արդեն բուժվել են, ոմանք բուժմուն են և կան մեկուսացածներ։ Ցավոք, ունենք 3 զոհ։ Համայնքում գործող հակաճգնաժամային շտաբն աշխատում է լուծել իրավիճակից բխած և՛ առողջապահական, և՛ սոցիալական խնդիրները։
-Առողջապահական համակարգը որքանո՞վ է կարողանում պայքարել, թե շատ երկրների օրինակով առողջապահական համակարգը ուղղակի պայթում է։
-Կարծում եմ՝ հակառակ բազմաբնույթ խնդիրներին՝ առողջապահության նախարարությունը, ինչպես թվերն են վկայում, աշխատում է նպատակաուղղված և օպերատիվ։ Կա հասարակական դրական ընկալում և արձագանք այս ուղղությամբ։ Կարելի է ասել իրավիճակը վերահսկելի է։
-Տնտեսական լուրջ խնդիրներ կային Լիբանանում, կորոնավիրուսը էլ ավելի՞ է խորացրել ճգնաժամը։
-Այո՛, ճիշտ նշեցիք։ Արդեն Լիբանանը նախակորոնային ժամանակահատվածում դիմակայում էր ֆինասատնտեսական ծանր ճգնաժամ քաղաքական շարժառիթներով։ Երկիրը, փաստորեն, տնտեսական շրջափակման էր ենթարկվել։ Հիմա էլ ՝ ընդհանրապես։ Կառավարությունը փորձում է տարբեր ծրագրերով լուծել խոցելի խավի խնդիրները։
Ինչ վերաբերում է հայկական համայնքին, շտաբը սննդի, դեղորայքի օժանդակություն է տրամադրում համայնքի՝ սոցիալական ծանր իրավիճակում հայտնված մարդկանց։
-Համայնքում փաստորեն սոցիալական ծանր վիճակում գտնվողներ կա՞ն։ Մոտավորապես քանի՞ ընտանիքի մասին է խոսքը։
-Իհարկե կան։ Այս պահի տվյալներով՝ մի քանի հազար։ Մի կարևոր մաս զրկվել է եկամուտներից։ Նրանց հասնում են օժանդակություններ շտաբի կողմից։
-Հայաստան վերադառնալ ցանկացողներ այս իրավիճակում կա՞ն հայերի շրջանում։
–Կորոնավիրուսի ճգնաժամից առաջ, հատկապես ֆինանսատնտեսական տագնապին առընթեր նկատելի էր Լիբանանից հայրենադարձության միտումներ։ Կտրուկ աճել էր նաև ՀՀ քաղաքացիություն ստանալու համար դիմումների թիվը։ Հիմա հասկանալիորեն թռիչքներն առկախվել են։ Կարծում եմ՝ երբ վերագործարկվեն թռիչքները և ընդհանրապես բնականոն դառնա օդանավային գործունությունը, այդ միտումները վերստին նկատելի կլինեն։
Հեղինակ՝ Սիրանույշ Պապյան
