Հայկական Երեսփոխանական Պլոքին Անունով Յակոբ Բագրատունի Կը Մերժէ Կանեփի Մշակման Օրինականացումը
22 Ապրիլ 2020 21 ապրիլի խորհրդարանական նիստին հնդկական կանեփի մշակումը արտօնելու առնչութեամբ ներկայացուած առաջարկին քննարկումի օրակարգին, երեսփոխան Յակոբ Բագրատունի բուռն կերպով դէմ արտայայտուեցաւ անոր` զայն որակելով թմրեցուցիչի մշակման օրինականացում:Յ. Բագրատունի ըսաւ. «Յիշողութեամբ կը վերադառնամ 2000 թուական, ինծի հետ նաեւ` ներկայ երեսփոխաններէն ոմանք, երբ պետութենէն պահանջուեցաւ փճացնել հաշիշի բոյսերը եւ հրկիզել դաշտերը: Պետութիւնը գործադրեց այս որոշումը, փոխարէնը առաջարկելով այլընտրանքային երկրագործութեան որդեգրում: Դժբախտաբար, ան չկրցաւ գործադրել այս ծրագիրը եւ կարճ ժամանակ ետք հաշիշի մշակումը յաւելեալ թափ ստացաւ:
«Այսօր դարձեալ պահանջք կայ, Մաքընզիի կամ այլոց կողմէ, որ հաշիշի մշակումը փոխարինուի հնդկական կանեփի մշակումով: Անունի փոփոխութիւնը ըստ էութեան պարզապէս շպար է միւս իրականութեան: Այն որ` որովհետեւ պետութիւնը ի վիճակի չէ արգիլելու հաշիշի մշակումը, ապա ուրեմն ձեւը կը գտնուի քօղարկուած ձեւով զայն օրինականացնելու` անոր տալով բժշկական կամ դեղագործական արտադրութեան համապատասխան պիտակ, ապա կ՛աւելցուի, թէ այդ մէկը նաեւ յաւելեալ մուտքեր կ՛ապահովէ քաղաքացիին ու պետութեան:
«Լա՛ւ, ուրեմն օրինականացնենք նաեւ այլ մարզեր ու աշխատանքներ, արգիլեալ գործեր, որոնք կրնան եկամուտ ապահովել:
«Այլ խօսքով, հարց կու տամ` եկամուտի եւ դրամի համար իրաւունք ունի՞նք քանդելու երիտասարդութեան ապագան, առողջութիւնը եւ մեր բարոյական արժեհամակարգը:
«Այս պետութիւնը, որ չի կրնար ոճրագործ կամ գող ձերբակալել, ի՞նչ երաշխաւորութիւն կրնայ տալ, որ պիտի հսկէ հաշիշի, այսպէս ասած, մէկ այլ անուանումը կրող բոյսի մշակման կանոնաւորութեան:
«Հակառակ ընդհանուր մթնոլորտին, եւ հակառակ մեր պատկանած համախմբումին կարծիքին, Հայկական երեսփոխանական պլոքը դէմ է այս օրինագիծին», շեշտեց Յակոբ Բագրատունի:
Նաեւ, ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ ԵՈՒՆԵՍՔՕ-ի պալատէն ըսաւ. «Եթէ օրէնքները շատոնց գործադրուած ըլլային, այս փուլին չէինք հասներ: Մեր բողոքը արձանագրեցինք խորհրդարանին կողմէ կազմուած փտածութեան դէմ պայքարի խորհուրդի անդամներուն թիւին մասին` պահպանելու համար բոլոր համայնքներուն միջեւ հաւասարութիւնը»:
Ան իր կատարած յայտարարութեան մէջ ընդգծեց, որ բաժնեկցումը, համայնքայնութիւնն ու յարանուանականութիւնը փտածութեան հիմքը կը կազմեն` աւելցնելով, որ նոյնիսկ փողոցը փտածներ կան:
«Փտածութեան դէմ պայքարի խորհուրդի կազմութեան սկզբունքին համաձայն ենք, սակայն անդամներուն թիւին` անհամաձայն: Այդ պատճառով ալ արձանագրեցինք մեր բողոքը», շեշտեց ան:
Միւս կողմէ, երեսփոխան Բագրատունի խորհրդարանի նիստին ճիշդ չնկատեց փտածութեան դէմ խորհուրդը կազմել միայն 6 անդամներէ` ընդգծելով, որ անհրաժեշտ է թիւը բարձրացնել` նկատի ունենալով ցարդ կիրարկուած համայնքային բաժանումը: «Մեր համայնքը իրաւունք ունի նման խորհուրդի մը մէջ ներկայացուելու», շեշտեց ան:
Այս իմաստով Հայկական երեսփոխանական պլոքի անդամ, երեսփոխան Յակոբ Թերզեան եւս պահանջք բանաձեւեց:
aztagdaily.com
