Ասոր զուգահեռ, անցեալ 10 եւ 11 յունիսին համայնքը թիրախ եղաւ նոր եւ շատ լուրջ սպառնալիքի մը: Հայ հաղորդավար, լրագրող Նշան Տէր Յարութիւնեան, «Ժատիտ» պատկերասփիւռի կայանի իր յայտագիրին ընթացքին «Թուիթըր»-ի ճամբով ստացաւ հայհոյանքներ, որոնց շարքին զինք «գաղթական» համարումը: Հաղորդավարը ուղղակիօրէն պատասխանեց այդ յարձակումներուն եւ ամբաստանութեան մատը յղեց դէպի Թուրքիա եւ նախագահ Էրտողան: Լրագրողին ելոյթին յաջորդեց հայատեացութեան արտայայտութիւններու ամբողջ տարափ մը, որոնց մեծ մասը ոչ լիբանանեան աղբիւրներէ կու գային: Այդ արտայայտութիւնները կ՛արդարացնէին Ցեղասպանութիւնը` ըսելով, որ «հայերը արժանի էին ջարդուելու»: Տեղի ունեցաւ թրքական դրօշակներով ցոյց` նոյն հայատեաց արտայայտութիւններով, որոնց հեղինակները իրենք զիրենք կը համարԵն օսմանցիներու ժառանգորդներ եւ Էրտողանի հետեւորդներ: Լիբանանի մէջ Մերտինցիներու արաբական միութեան նախագահ Մունիր Հասան օսմանցիները անուանեց իր «նախահայրերը» եւ ըսաւ, որ «լաւ գործ ըրին հայերը ջարդելով»: Ան հայերը կոչեց «յիմարներ, դաւաճաններ, վատեր եւ անյարգալիցներ»:

Բարեբախտաբար, լիբանանեան քաղաքական բոլոր շրջանակները իրենց զօրակցութիւնը յայտնեցին հայ համայնքին: Լիբանանի մէջ գործող հայ քաղաքական երեք կուսակցութիւնները միացեալ հաղորդագրութիւն մը հրապարակեցին` դատապարտելով այս երեւոյթը եւ ինքնազսպումի կոչ ըրին հայ համայնքի զաւակներուն: ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի կոչ ուղղեց` զուսպ մնալու եւ գրգռութեանց տեղի չտալու: Հայկական երեսփոխանական պլոքը եւ խումբ մը հայ ու օտար փաստաբաններ դատական հարց յարուցեցին Մունիր Հասանի եւ Մերտինցիներու արաբական լիբանանեան միութեան դէմ: Նամակներ յղուած են Պէյրութի մէջ հաւատարմագրուած դեսպանութիւններուն` զգուշացնելով հայատեացութեան այս նորագոյն արտայայտութեան դէմ:

Արժանթինի Հայ համայնքի հաստատութիւնները այսու կու գան համայնքին ամբողջական զօրակցութիւնը յայտնելու Լիբանանի մեր քոյրերուն եւ եղբայրներուն: Հայատեացութեան այս արտայայտութիւնները ինքնաբուխ չեն, այլ մղուած եւ կազմակերպուած Անգարայի կողմէ: Համահունչ են Միջին Արեւելքի մէջ Թուրքիոյ ժխտողականութեան եւ նորօսմանական քաղաքականութեան: Սուրիոյ հիւսիսն ու Լիպիա իր զինուորական միջամտութենէն ետք, Էրտողանի վարչակարգը իր գործակալները եւ իր երաշխաւորած ու ֆինանսաւորած ծայրայեղական խմբակցութիւնները աշխուժացուցած է Լիբանանի մէջ եւս: Երկրի այս տագնապալի կացութենէն օգտուելով, Թուրքիա կը ջանայ հարուածել միջհամայնքային համակեցութիւնը եւ թիրախաւորել հայութիւնը այնպէս, ինչպէս թիրախաւորեց քիւրտերը Սուրիոյ մէջ:

Որպէս արժանթինցի քաղաքացիներ, մեր կառավարութեան ուշադրութեանը կը յանձնենք թրքական հայատեացութեան այս նոր դրսեւորումը լիբանանահայութեան դէմ եւ միջազգային բեմին վրայ արժանթինեան դիւանագիտութենէն կ՛ակնկալենք ցեղապաշտական այս քաղաքականութեան դէմ յստակ յանձնառութիւն: