Արեւմտեան Ամերիկայի Համահայկական խորհուրդին ներքեւ գործող 40 կազմակերպութիւնները եւ մեր համայնքի զաւակները սրտաբուխ նուիրատուութիւններով օժանդակութեան ձեռք երկարեցին լիբանանահայութեան՝ որպէսզի կարենայ յաղթահարել տնտեսական, առողջապահական եւ հոգեկան ծանր տագնապները ու կարելի եղածին չափ արագ ժամանակամիջոցի մը մէջ վերականգնել Սփիւռքի ծաղկուն եւ կարեւոր գաղութներէն՝ Լիբանանի հայաշունչ օրրանը։

Թելեթոնի բացման սրտառուչ խօսքով հանդէս եկաւ Արամ Ա. վեհափառը, որ իր երախտագիտական խօսքը ուղղելով մեր համայնքին՝ մեծապէս դրուատեց մեր կազմակերպութիւններուն եւ զաւակներուն անդուլ աշխատանքը՝ Լիբանանի հայութեան օգնութեան համազգային գործին մէջ, նոյն ժամանակ ներկայացնելով բոլոր մարտահրաւէրները, զորս լիբանանահայութիւնը կը դիմագրաւէ այս օրերուն:

Երեքուկէս ժամ տեւած թելեթոնին ընթացքին, «Հորիզոն»ի խօսնակ Վրոյր Թադեւոսեան, «US Armenia»ի խօսնակ Արմինէ Ամիրեան, «ARTN»ի խօսնակ Վարդիթեր Գրիգորեան, «PanArmenian TV»ի խօսնակ Մհեր Պաղտասարեան, ինչպէս նաեւ Արեւմտեան Ամերիկայի շրջանի Հայ Դատի յանձնախումբի վարիչ տնօրէն Արմէն Սահակեան մանրամասնօրէն ներկայացուցին լիբանանահայութեան ապրած տագնապի զանազան երեսները եւ ծալքերը:

Ուշագրաւ էր յատկապէս Լիբանանէն ներկայացուած տեղւոյն գաղութի պատասխանատուներուն եւ նաւահանգիստի պայթումին պատճառով զոհուածներու ընտանիքներուն հետ կատարուած հարցազրոյցները եւ գաղութի վերականգման աշխատանքներուն մասին թղթակցութիւնները, զորս ձեռնհասօրէն պատրաստուած էին Լորիկ Սապունճեանի, Նժդեհ Մկրտիչեանի եւ Սեւակ Շահպազեանի կողմէ:

Անձնական կեանքի յատուկ փորձառութիւններու վկայութիւններով հարստացած տեսանիւթերու լիբանանեան դրուագները ներկայացուց Շողեր Մկրտիչեան:

Թելեթոնին ամբողջ տեւողութեան, կամաւորներու խումբը լծուած էր անդուլ աշխատանքի՝ 5էն տասնեակ հազարաւոր տոլարի հասնող նուիրատուութիւնները արձանագրելու համար:

Թելեթոնին ընթացքին սրտառուչ պատգամներով ելոյթ ունեցան նաեւ Համահայկական խորհուրդի անդամ կազմակերպութիւններու ներկայացուցիչներ: Ելոյթներով հանդէս եկան նաեւ Արեւմտեան Ամերիկայի Հայոց թեմի առաջնորդ Մուշեղ արք. Մարտիրոսեան, Հիւսիսային Ամերիկայի Արեւմտեան թեմի առաջնորդ Յովնան արք. Տէրտէրեան, Հիւսիսային Ամերիկայի Հայ աւետարանական միութեան վերապատուելի Պերճ Ճամպազեան, ինչպէս նաեւ Հայ կաթողիկէ թեմի առաջնորդ Միքայէլ եպս. Մուրատեան:

Թելեթոնի աւարտին, առաջնորդ Մուշեղ արք. Մարտիրոսեան անակնկալ յայտարարութիւն մը կատարելով՝ տեղեկացուց 250 հազար տոլարի նուիրատուութեան մը մասին, իր ինքնութիւնը յայտնել չուզող հաստատութեան մը կողմէ:

Ուշագրաւ մէկ այլ երեւոյթ էր Արեւմտեան Հայոց թեմի Ազգային վարչութեան ատենապետ Կարօ Էշկիեանի 150 հազար տոլարի առատաձեռն նուիրատուութիւնը: Յուզիչ էր Էշկիեանի ելոյթը այս առիթով. զսպելով իր յուզումը՝ Էշկիեան անդրադարձաւ Լիբանանի մէջ անցուցած իր պատանեկան եւ երիտասարդական տարիներուն, եւ յատկապէս այդ գաղութին ունեցած ազդեցութեան՝ իր հայեցի դաստիարակութեան եւ ազգային գործիչի կազմաւորման մէջ: Յիշատակութեան արժանի է նաեւ այն, որ Կարոյին տիկինը՝ Սօսէն, նոյնպէս մասնակից էր թելեթոնին՝ աշխատելով նուիրատուութիւնները արձանագրող կամաւորներու խումբին հետ:

Իրենց մասնակցութիւնը բերին համայնքի երկար տարիներու այլ բարերարներ եւս, որոնց կարգին Սարգիս եւ Նունէ Սեփեթճեանները, որոնք նուիրեցին 100 հազար տոլար, Վարանդ եւ Հուրի Մելքոնեանները՝ 30 հազար տոլար, ու «Սուփըր Քինկ Մարքեթ»ի սեփականատէր Ֆերմանեան ընտանիքը՝ 25 հազար տոլար («Հայ Էյտ Լիբանան» կազմակերպութիւնը նուիրատուներու ամբողջական ցանկը պիտի հրապարակէ հետագային):

Նշենք, որ թելեթոնի աւարտէն ետք, նուիրատուութիւնները կանգ չառին. կամաւորները մինչեւ գիշերուան ուշ ժամերը պատասխանեցին հեռաձայններու:

asbarez.com