Չորեքշաբթի, 6 յունուարին «Քորոնա» համավարակին հետեւանքով Պէյրութի մէջ իր մահկանացուն կնքեց լիբանանահայ ազգային, հասարակական եւ կուսակցական ղեկավար գործիչ, սփիւռքի եւ հայրենիքի մէջ հայ սկաուտութեան դաստիարակութեան նուիրեալ Գառնիկ Մկրտիչեան:

Պէյրութի մէջ ծնած Գառնիկ Մկրտիչեան կանուխ տարիքէն անդամակցած է ՀՅ Դաշնակցութեան շարքերուն: Ան աշխուժ դերակատարութիւն ունեցած է Պուրճ Համուտի հայաբնակ թաղերու ինքնապաշտպանութեան աշխատանքին մէջ: Անոր անունը կապուած եղած է Պուրճ Համուտի ՀՅԴ «Սարդարապատ» ակումբին հետ, ուր երկար տարիներ եղած է ՀՅԴ համապատասխան կոմիտէի ներկայացուցիչ: Ան եղած է նաեւ ՀՅԴ Լիբանանի Կեդրոնական կոմիտէի անդամ:

Գառնիկ Մկրտիչեան տասնամեակներ շարունակ նպաստած է հայ երիտասարդութեան կազմակերպման եւ ազգային ոգիով դաստիարակութեան աշխատանքներուն: Ան` իբրեւ հայ իրականութեան մէջ մեծագոյն մարզական եւ սկաուտական կազմակերպութեան` ՀՄԸՄ-ի Կեդրոնական վարչութեան անդամ, եւ ապա` ատենապետ, աշխուժ դերակատարութիւն ունեցած է Հայաստանի թէ Արցախի մէջ ՀՄԸՄ-ի վերընձիւղման, կառոյցի հիմնադրման եւ գործունէութեան ծաւալման աշխատանքներուն մէջ:

Իբրեւ ՀՄԸՄ-ի Կեդրոնական վարչութեան վաստակաշատ նախկին ատենապետ, անուրանալի կը մնայ Գառնիկ Մկրտիչեանի դերակատարութիւնը Հայաստանի Հանրապետութեան մէջ ՀՄԸՄ-ի հիմնադրութեան 100-ամեակի նախաձեռնութիւններու կազմակերպման աշխատանքին մէջ: Բարձր մակարդակով կազմակերպուած ձեռնարկները առիթ էին ազգային առումով վերարժեւորելու Հայաստանի Ա. Հանրապետութեան եւ ՀՄԸՄ-ի հիմնադրութեան 100-ամեակները, վերաիմաստաւորելու ազգային-պետական արժէքները:

Գառնիկ Մկրտիչեան եղած է Ազգային ընդհանուր ժողովի ատենապետ, Լիբանանի հայոց թեմի Ազգային վարչութեան փոխատենապետ, Ազգային երեսփոխան եւ Ազգային երեսփոխանական ժողովի նախկին ատենապետ: Վերջին քանի մը ամիսներուն ընթացքին Գառնիկ Մկրտիչեանին վիճակուեցաւ ստանձնել Պէյրութի նաւահանգիստի պայթումէն ետք Արամ Ա. վեհափառ հայրապետին յորդորով կազմուած համագաղութային Լիբանանահայութեան վերականգնումի մարմինի ատենապետութեան պատասխանատու պարտականութիւնը:

Գառնիկ Մկրտիչեանի մահով սփիւռքահայութիւնը կը կորսնցնէ ազգային, կուսակցական եւ միութենական վաստակաւոր գործիչ մը:

Վերջին Հրաժեշտ` Գառնիկ Մկրտիչեանին

Երէկ կէսօրին, Անթիլիասի Ս. Գրիգոր Լուսաւորիչ մայր տաճարին մէջ, ներկայացուցչական եւ ժողովրդային հոծ ներկայութեամբ տեղի ունեցաւ յուղարկաւորութիւնը ազգային-կուսակցական գործիչ Գառնիկ Մկրտիչեանին, ներկայութեամբ Արամ Ա. վեհափառ հայրապետին:

Արարողութեան նախագահեց եւ յետ յուղարկաւորութեան հանգուցեալի մասին իր վկայութիւնները ներկայացուց Լիբանանի հայոց թեմի առաջնորդ Շահէ արք. Փանոսեան: Ապա սրբազանը կարդաց վեհափառ հայրապետին գնահատականը` ննջեցեալ Գառնիկ Մկրտիչեանի հանրային գործունէութեան մասին: Իր կատարած ծառայութիւններուն համար Գառնիկ Մկրտիչեան յետ մահու վեհափառ հայրապետին տնօրինումով արժանացաւ Մեծի Տանն Կիլիկիոյ կաթողիկոսութեան Ասպետի կարգի շքանշանին:

ՀՄԸՄ-ի Կեդրոնական վարչութիւնը իր կարգին յետ մահու Գառնիկ Մկրտիչեանը պարգեւատրեց ՀՄԸՄ-ի Արժանեաց շքանշանով:

Թաղման արարողութիւնը տեղի ունեցաւ Պուրճ Համուտի ազգային գերեզմանատան մէջ` նախագահութեամբ առաջնորդ սրբազան հօր: Յանուն ՀՄԸՄ-ի Կեդրոնական վարչութեան դամբանական խօսք արտասանեց ՀՄԸՄ-ի Կեդրոնական վարչութեան ատենապետ Վաչէ Նաճարեան, իսկ յանուն ՀՅԴ-ի` ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի:

Նշենք, որ Գառնիկ Մկրտիչեանի վերջին յարգանքի տուրք մատուցուեցաւ ՀՄԸՄ-ի Կեդրոնական վարչութեան շէնքին, ՀՅԴ «Սարդարապատ» ակումբի, Ազգային առաջնորդարանի, Պուրճ Համուտի քաղաքապետարանի շէնքի եւ «Շաղզոյեան» կեդրոնին առջեւ: ՀՄԸՄ-ի Կեդրոնական վարչութեան շէնքին առջեւ ՀՄԸՄ-ի շեփորախումբը արժանի յարգանք մատուցեց հանգուցեալի յիշատակին:

aztagdaily.com