ՀՅԴ Լիբանանի Կեդրոնական կոմիտէի պատուիրակութիւն մը, որուն մաս կազմեցին Կեդրոնական կոմիտէի ներկայացուցիչ, երեսփոխան Յակոբ Բագրատունի եւ զբօսաշրջութեան նախարար Աւետիս Կիտանեան, երէկ առաւօտեան հանդիպում մը ունեցաւ Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմի հետ:

Նկատի ունենալով, որ Իպրահիմ նշանակուած է կառավարութեան կազմութեան հոլովոյթը աշխուժացնելու յատուկ պատուիրակ, քննարկուեցան կառավարութեան կազմութեան վերաբերող մանրամասնութիւններ:

Հանդիպումէն ետք երեսփոխան Բագրատունի լրատուական միջոցներուն կատարած տարբեր յայտարարութիւններով շեշտեց, որ կառավարութեան կազմութեան կապակցութեամբ հայկական կնճիռ գոյութիւն չունի: «Հայ համայնքի իրաւունքն է երկու նախարար ունենալ, իսկ ՀՅ Դաշնակցութեան իրաւունքն է ստանձնել թղթապանակով նախարարութիւն մը: Դաշնակցութիւնը պիտի պահէ զբօսաշրջութեան նախարարութիւնը եւ պիտի ներկայացուի Աւետիս Կիտանեանով», նշեց Յակոբ Բագրատունի:

Ինչ կը վերաբերի Լիբանանեան ուժերուն հետ այս նիւթով տարակարծութեան, Բագրատունի ըսաւ, որ խնդիրը ՀՅԴ-ի եւ Լիբանանեան ուժերուն միջեւ չէ, այլ համայնքներու եւ պաշտօններու միջեւ հաւասարակշռութիւն հաստատելու հարց է, որուն լուծման պատասխանատուութիւնը հանրապետութեան նախագահին եւ նշանակեալ վարչապետին մօտ կը գտնուի:

«Մենք ոչ ոքէ աթոռ կը խլենք եւ ոչ ոքի կը հակադրուինք, այլ` պարզապէս ճիշդ ներկայացուցչութեան սկզբունքով ճշդուած չափանիշներով, եւ տրամաբանականօրէն մեր իրաւունքն է թղթապանակով նախարարութիւնը: Կը հաւատամ, որ Լիբանանեան ուժերը տարբեր բան չեն մտածեր», ընդգծեց Յ. Բագրատունի:

Միւս կողմէ, զբօսաշրջութեան նախարար Աւետիս Կիտանեան «Նաշրա» կայքի պատկերասփիւռի բաժինին կատարեց յայտարարութիւն մը, որուն մէջ յայտնեց, թէ նոր կազմուելիք կառավարութեան մէջ լիբանանահայութեան ներկայացուցչութեան հարց գոյութիւն չունի:

«Մեկնելով այն իրականութենէն, որ Հայ յեղափոխական դաշնակցութիւնը խորհրդարանին մէջ ներկայացուած է երեք երեսփոխանով եւ լիբանանահայութեան մեծամասնութիւնը կը ներկայացնէ, թղթապանակով նախարարութիւնը անոր իրաւունքն է եւ պիտի յանձնուի Դաշնակցութեան», ըսաւ նախարար Կիտանեան:

aztagdaily.com