Տեղի ունեցավ «Կրթամշակութային կյանքը Հայաստանի Առաջին Հանրապետության տարիներին» ժողովածուի շնորհանդեսը
14 Մարտ 2019 Այսօր ԵՊՀ-ի նիստերի դահլիճում տեղի ունեցավ «Կրթամշակութային կյանքը Հայաստանի Առաջին Հանրապետության տարիներին» ժողովածուի շնորհանդեսը:Այն ներառում է Համազգային հայ կրթական և մշակութային միության, Երևանի պետական համալսարանի և ՀՀ ԳԱԱ նախաձեռնությամբ 2018թ. մայիսի 15-16-ին տեղի ունեցած նույնանուն խորագրով գիտաժողովում Ռուբինա Փիրումյանի, Ալիսա Գասպարյանի, Քնարիկ Աբրահամյանի, Նարինե Դիլբարյանի, Ալվարդ Խաչատրյանի, Դավիթ Գասպարյանի, Սուրեն Դանիելյանի, Գևորգ Կեսոյանի, Էդիկ Մինասյանի, Սոֆյա Օհանյանյանի, Գուրգեն Վարդանյանի եւ ուրիշների ուսումնասիրությունները:
ԵՊՀ ռեկտոր Արամ Սիմոնյանը բացման խոսքում նշեց. «Համազգային հայ կրթական և մշակութային միության հետ Երևանի պետական համալսարանը և Գիտությունների ազգային ակադեմիան Հայաստանի Առաջին Հանրապետության 100-ամյակի շրջանակում 2018թ. որոշեց կազմակերպել «Կրթամշակութային կյանքը Հայաստանի Առաջին Հանրապետության տարիներին» խորագրով գիտաժողովը: Ծագեց առաջին հարցը`արդյո՞ք բավական նյութ կա գիտաժողովի համար, քանի որ շատ լավ հասկանում էինք, որ Առաջին Հանրապետության գոյության ծանրագույն տարիներին, երբ ամենուր սով էր ու ֆինանսատնտեսական խորը ճգնաժամ, պատերազմ, ներքին և արտաքին թշնամիների գործունեություն, արդյոք այդպիսի պայմաններում Հայաստանի Առաջին Հանրապետության իշխանությունները և հայ հասարակությունը ժամանակ և ուժ գտել են իրենց մեջ`զբաղվելու գիտակրթական գործերով: Այս ժողովածուում ընդգրկված նյութերը տալիս են հստակ պատասխան` Հայաստանի առաջին Հանրապետության հիմնադիրներն ունեին ազգային մտածելակերպ, անկոտրում կամք և նվիրում»:
ԵՊՀ պատմության ֆակուլտետի դեկան, պատմաբան Էդիկ Մինասյանը, շնորհակալություն հայտնելով Համազգային հայ կրթական և մշակութային միությանը և ժողովածուի հեղինակներին, նշեց. «Մեր համատեղ աշխատանքի արդյունքում ծնվեց այս շատ արժեքավոր աշխատությունը: Ձեռնարկի առաջնային ու ամենակարևոր արժանիքն այն է, որ առաջին անգամ հանգամանորեն գիտական հանրությանը և հասարակությանը ներկայացվեցին Հայաստանի Առաջին Հանարպետության կրթամշակութային կյանքի տարբեր ոլորտները: Ամենակարևորը` նախանշվեցին Առաջին Հանրապետության պետական քաղաքականության հիմքերը, կրթության ու մշակույթի ոլորտում և՛ գիտության զարգացման միտումները և՛ հեռանկարները: Այստեղ ամփոփվում են այդ ծանր տարիներին հանրապետության սոցիալ-տնտեսական մեծ խիզախումները: Դրանցից մեկն է հատկապես ԵՊՀ-ի հիմնադրումը, որը իսկապես խոշորագույն երևույթ էր»,-եզրափակեց նա:
