«Հանուն ո՞ր սկզբունքի է ֆրանսիական կառավարությունը դատի կանչել ֆրանսիական քաղաքապետերին: Մենք դատապարտում ենք քաղաքական այս նոր դիրքորոշումը, որը կարող է գոհացնել միայն Ադրբեջանին: Մենք չենք ընդունում փաստը, որ ֆրանսիական կառավարությունն այսքան վատ դիրքորոշում ունի Արցախի ժողովրդի հանդեպ: Հստակ է, որ այս որոշումները հիմնված են քաղաքական-տնտեսական շահերի վրա: Մենք նախագահ Մակրոնին բազմիցս ասել ենք, որ Արցախը մեզ համար առաջնահերթություն է, որովհետև այստեղ կյանքի ու մահվան հարց է: Մենք չէինք կարող երևակայել, որ ֆրանսիական կառավարությունն այսքան հեռու կգնար: Մենք չենք դադարի զորավիգ լինել Արցախին, Արցախի ժողովրդին և Արցախի անկախության գործընթացին ու վերջնական փուլում ՀՀ-ի հետ միացմանը: Ժամանակն է, որ Հայաստանը Արցախի հետ ստորագրի ռազմաքաղաքական համաձայնագիր»,- նշեց Մուրադ Փափազյանը:

Այս համատեքստում Ֆրանսիայի հայկական կազմակերպությունները համակարգող խորհրդի համանախագահը հարկ համարեց ընդգծել՝ չի կարելի խաղաղության քայլեր սպասել Ադրբեջանի նախագահ Իլհամ Ալիևի կողմից, երբ Ադրբեջանը պատերազմով է ներշնչված և միայն ուժի է դիմում:

«Մեր ուժը մենք ենք, Սփյուռքի մեջ ամուր ենք պահում մեր դիրքերը: Իսկ նախագահ Մակրոնի հետ կունենանք լուրջ բացատրություն և կշարունակենք մեր պայքարը Արցախի ժողովրդի համար` նրանց կողքին: Արցախի ժողովուրդը և բանակն ամուր են պահում մեր սահմանները: Եթե Արցախը կորցնենք, Հայաստանը վտանգի տակ կհայտնվի, իսկ Արցախը զորացնելով` Հայաստանը կփրկենք: Պետք է միջազգային ընտանիքին Հայաստանի և Սփյուռքի զորակցությունը ցույց տանք՝ ուժ տալով Արցախին: Այո, միայն ուժ տալով, ովքեր էլ որ լինեն Արցախի իշխանությունները՝ այսօրվա, թե վաղվա»,- ամփոփեց Փափազյանը: