Նախաձեռնության անդամները հույս հայտնեցին, որ այն պատգամավորները, որոնք օրենքի նախագծի առաջին ընթերցմանը կողմ են արտահայտվել, մեկ անգամ էլ լավ կմտածեն, հաշվի կառնեն այն սոցիալական պայմանները, որում գտնվում է երկիրը, և նոր միայն կքվեարկեն:

«Մենք ուղերձ ունենք այդ պատգամավորներին: Նրանց հիշեցնում ենք, որ իրենք ներկայացնում են բոլորին, բնակչության բոլոր շերտերին, ու չպետք է սխալվեն:Կոչ ենք անում այդ պատգամավորներին չհարվածել իրենց քաղաքական հենարան հանդիսացող բնակչության մեծամասնությանը, և ասում ենք, որ դուք դեռևս կարող եք շտկել ամեն ինչ, դեռ ուշ չէ»,- ասաց Քրիստինե Վարդանյանը:

Նախաձեռնության անդամները վստահ են, որ համահարթեցման այս օրենքով իշխանությունների համար դժվար կլինի տնտեսական հեղափոխություն իրականացնել, այս օրենքով չի կարելի հասնել սոցիալական արդարության:

«Մենք շարունակելու ենք մեր պայքարը, քանի որ վստահ ենք, որ Հայաստանում տնտեսության զարգացումը հնարավոր կլինի հարկման պրոգրեսիվ եղանակով: Կպայքարենք այնքան ժամանակ մինչը գործի արդար ու տրամաբանական պրոգրեսիվ եղանակ»,- ասաց նախաձեռնության անդամ Արգիշտի Գևորգյանը:

Ահազանգը ՀՅԴ Հայաստանի Երիտասարդական միության նախաձեռնությունն է, որը նպատակ ունի պայքարել եկամտահարկի համահարթեցման դեմ:

ՀՀ իշխանությունները, նախաձեռնելով հարկային օրենսգրքի փոփոխություններ, ցանկանում են համահարթեցնել եկամտահարկը` դրանով սպասարկելով հասարակության նեղ շերտի շահերը ի հաշիվ հասարակության 65 տոկոս կազմող միջին և միջինից ցածր երկամուտ ունեցող խավի ներկայացուցիչների շահերի` այդպիսով նպաստելով սոցիալական անարդարության խորացմանը և հասարակությւոնում առկա բևեռացվածության մակարդակի բարձրացմանը: Նախաձեռնությունը անընդունելի է համարում իշխանությունների նման մոտեցումը և, #ԱՀԱԶԱՆԳ հնչեցնելով միջին և միջինից ցածր եկամուտ ունեցող մեր հայրենակիցների համար, հայտարարում է, որ համահարթեցում #Չի_լինելու:

yerkir.am