Ուզում ենք այս ակցիայով ցույց տալ, որ Հարկային նոր օրենսգիրքն ուղղակի փուչիկ է այն մարդկանց համար, որոնք այսօր աշխատում են և աղքատ են, ունեն ցածր եկամուտներ. այս մասին Tert.am-ի հետ զրույցում ասաց ՀՅԴ աշխատանքային իրավունքների պաշտպանության գրասենյակի ծրագրերի համակարգող, տնտեսագետ Թադևոս Ավետիսյանը:

Նրա խոսքով՝ այս փոփոխությունը որևէ դրական հաղորդագրություն այդ անձանց համար չի պարունակում: «Մենք թե՛ տարբեր ակցիաներով, թե´ մասնագիտական հարթության մեջ փորձեցինք ներկայացնել հակափաստարկներ և փորձեցինք ամեն ինչ անել, որ ականջալուր լինեն: Հատկապես համահարթեցման վերաբերյալ դրույթը հակասոցիալական ենք համարում: Մեր հիմնավորումները, ցավոք սրտի, ավելի շատ անտեսվեցին, իմիտացիա եղավ, որ ցույց տան՝ տեղի են ունենում քննարկումներ: Բայց իրականում սկզբունքային որևէ հարցի այդպես էլ չանդրադարձան: Մեր խորին համոզմամբ նրանք ի սկզբանե ունեին այդ որոշումը՝ գնալու այս տարբերակով»,- ասաց Թադևոս Ավետիսյանը:

Նա հավելեց, որ այս նախաձեռնությունն այսուհետ ևս ահազանգելու է ցանկացած սոցիալական խնդրի շուրջ:

Նրա խոսքով՝ իշխանությունները մանիպուլյացիա են անում, ասելով, թե իջեցնում են մարդկանց որոշակի խմբի հարկերը, ուստի ընդվզումն անհասկանալի է: «Մեր երկրում կան առաջնահերթություններ. երբ ասում ես՝ չհարկվող շեմ նախատեսի, կամ աշխատող աղքատների եկամտահարկը նվազեցրու, ասում են՝ բյուջեի վրա 90 մլրդ հավելյալ փող կբերի, այդ գումարները չկան, բայց երբ 2 մլն ստացողի հարկը իջեցնում են, էդտեղ կա: Սա է մեր վեճը, ոչ թե մենք դեմ ենք, որ հարկային բեռը նվազի: Մենք ասում ենք՝ բարձր վարձատրության հարկային բեռ նվազեցնելով՝ տնտեսություն չես խթանի, ոչ էլ արտահանումը կխթանես, ոչ էլ ստվերը կկրճատես, դրանք սին, աշխարհում որևէ դրական օրինակ չունեցող և վիճելի հարցեր են»,- նշեց նա:

Նրա խոսքով՝ եթե արդար բաշխում չկա, երբեք չես կարող ակնկալել առաջանցիկ տնտեսական աճ: «30 տոկոս աղքատության, 20 տոկոս գործազրկության, ներդրումների գրեթե բացակայության պայմաններում այստեղ հարկային համակարգի համահարթեցումը չի կարող դառնալ բոլոր խնդիրների դարման»,- նշեց նա:

Մեզ հետ բերած աշխատանքային ձեռնոցներն ու գլխարկները կթողնենք ԱԺ դիմաց, որպեսզի պատգամավորները հիշեն՝ ինչ երկրում, ինչ սոցիալական պայմաններում ենք ապրում, որ այս հարկային նոր օրենսգիրքը հատկապես որ խավին է վնաս տալու: Այս մասին հայտարարեց «Ահազանգ» նախաձեռնության անդամներից Արգիշտի Գևորգյանը:

Tert.am-ի հետ զրույցում Արգիշտին նշեց, որ իրենք բերել են աշխատավորների խավը խորհրդանշող դեղին սաղավարտները և ձեռնոցները՝ դրանով ցույց տալով, որ առաջին հերթին հարվածի տակ են դնում այդ խավի իրավունքներն ու հավասարեցնում են նրանց ավելի բարձր եկամուտ ունեցողների հետ:

«Նաև բերել էինք մեր վարկային պատմությունների թղթերը. Հայաստանում գրեթե բոլոր ընտանիքներն ունեն վարկային պատմություններ, որոնք վերցվել են գոյատևման, ընտանիքի նվազագույն խնդիրները լուծելու համար, ոչ թե այլ ճոխությունների:

Մենք ուզում ենք սա հիշեցնել մեր պատգամավորներին, որոնք պետք է որոշեն՝ մեր երկրում լինելու է համահարթեցմա՞ն, թե՞ պրոգրեսիվ հարկման համակարգ: Ուզում ենք նրանց հիշեցնել, հաշվի առնելով այն, որ մեր ընտանիքների մեծամասնությունն ունի հարկային պարտավորություններ, գրանցված աշխատավարձերն էլ միջինից ցածր են, որ իրենք պետք է ընդառաջ գնան միջինից ցածր և նվազագույն աշխատավարձ ստացողներին և ոչ թե բարձր եկամուտ ստացողներին»,- ասաց նա:

Նրանք դեղին սաղավարտներն ու ձեռնոցները դրեցին ԱԺ դարպասների դիմաց և վարկային պատմությունների թղթեր նետեցին:

https://youtu.be/qgyE3fw2_2E

Քիչ առաջ հայտնի դարձավ, որ ՀՀ ազգային ժողովը երկրորդ ընթերցմամբ և ամբողջությամբ ընդունեց Հարկային օրենսգրքի փոփոխությունների փաթեթը:

Նախագծերին փաթեթին կողմ քվեարկեց 73, դեմ՝ 32 պատգամավոր: «Լուսավոր Հայաստանն» ու ԲՀԿ-ն դեմ են քվեարկել:

ԱԺ-ն ընդունեց մի նախագիծ, որն ուղղակի հարվածում է երկրի բնակչության մեծամասնությանը, այս նախագծով երկրի բյուջեի տարեկան շուրջ 45 մլրդ դրամի կորուստները նախատեսում են փոխհատուցել մի շարք ապրանքատեսակների գների թանկացմամբ. այս մասին հայտարարեց «Ահազանգ» նախաձեռնության համակարգող խմբի անդամ Քրիստինե Վարդանյանը:

Նա նշեց, որ այս նախագիծը չի լավացնում երկրի բնակչության մեծամասնության ցածր եկամուտ ունեցողների կենսամակարդակը: «Փոխարենն այն ավելացնում է մի քանի հազար մարդու եկամուտը: Ստացվում է, որ քիչ առաջ ԱԺ մեծամասնությունը կողմ քվեարկեց մի նախագծի, որը բարեփոխում է մի քանի հազարի համար ի հաշվի մի քանի հարյուր հազարի: Նախագծի ամբողջ պատասխանատվությունն ընկնում է նախագծին կողմ արտահայտած յոթ պատգամավորի վրա: Միևնույն ժամանակ նախագծի համար պատասխանատվություն է կրում այն քաղաքական ուժը, որն այն բերեց օրակարգ, առաջ տարավ՝ առանց հակառակ կողմի կարծիքը լսելու»,– ասաց նա:

«Ահազանգ» նախաձեռնությունը հայտարարում է, որ ցավոք, չկարողացանք հասնել ցանկանալի արդյունքի, սակայն պայքարը և մեր գործունեությունը շարունակում է, մինչև Հայաստանում կլինի պրոգրեսիվ հարկային համակարգ:

«Ահազանգը» այսուհետ իր գործունեությունը շարունակում է որպես Հայաստանում սոցիալական արդարության հաստատման և ամրապնդման ուղղված նախաձեռնություն»,- հայտարարեց նախաձեռնության համակարգող խմբի անդամը:

Քրիստինե Վարդանյանը հայտնեց, որ նախաձեռնության հետագա քայլերի ու ծրագրերի մասին կտեղեկացնեն վաղը` այլ ձևաչափով: