Ասիկա մէկ ամսուան մէջ երկրորդ անգամն էր, որ Հայաստանի պատուիրակութիւնը չէր քուէարկեր ի նպաստ Ռուսիոյ: Արդարեւ, Հայաստանի պատուիրակութիւնը յունիս ամսուան սկիզբը ՄԱԿ-ի Ընդհանուր ժողովի 73-րդ նստաշրջանին ընթացքին, 2008-էն ի վեր առաջին անգամ ըլլալով դէմ չքուէարկեց, այլ չմասնակցեցաւ Աբխազիայէն եւ Հարաւային Օսեթիայէն տեղահանուած վրացի գաղթականներու վերադարձի իրաւունքը ճանչցող բանաձեւի քուէարկութեան: Այդպիսով, Հայաստանի իշխանութիւնները գիտակցաբար կամ անգիտակցաբար ճանչցան Արցախէն «բռնի տեղահանուած ազրպէյճանցի գաղթականներու» տունդարձի իրաւունքի գոյութիւնը:

Ռուսիա-Վրաստան յարաբերութիւններուն առնչուող հարցերու շուրջ քուէարկութեան չմասնակցելու Հայաստանի իշխանութիւններու նոր քաղաքականութիւնը կրնայ հաճելի ըլլալ Թիֆլիսին, սակայն, ոչ` Մոսկուային: Մինչեւ օրս կիրարկուած քաղաքականութենէն շեղման շնորհիւ Վրաստանի մօտ արձանագրուած կէտերը, անկասկած որ չեն կրնար փոխհատուցել այն կէտերը, որոնք կը կորսնցնենք Ռուսիոյ մօտ` նկատի ունենալով այդ երկիրներէն իւրաքանչիւրին հզօրութեան, կշիռին ու ազդեցութեան ակներեւ տարբերութիւնը:

Ազրպէյճանի եւ Թուրքիոյ ռազմավարական դաշնակիցը սիրաշահելու համար պէտք չէ մեր ռազմավարական դաշնակիցը նեղացնենք:

aztagdaily.com