– Պարոն Սարգսյան, նախագահական ընտրություններից առաջ, այն էլ հեռացող նախագահի այս նշանակումներն ինչպե՞ս եք մեկնաբանում, հատկապես, որ բոլոր նոր նշանակումներն էլ, այսպես ասած, ի հեճուկս Նիկոլ Փաշինյանի ճաշակի են լինում, մենք անցած ամիսներին տեսել ենք Փաշինյանի՝ Բակո Սահակյանի ու նրա մերձավորների նկատմամբ ոչ բարիդրացիական վերաբերմունքը։

– Իմ հանդիպումներն այդ տպավորությանը չեն բերում, թե ի հեճուկս են արվում, պարզապես նախագահը մինչեւ վերջին օրը պետք է լինի նախագահ եւ վարի կադրային քաղաքականություն։

Դրա հետ կարող ենք համաձայն լինել, կարող ենք չլինել՝ դա հարցի մյուս կողմն է։ Բայց մտածենք, թե նախագահին մի քանի ամիս է մնում պաշտոնավարել, ու չպետք է ոչինչ անի՝ նշանակում է երկիրը կսկսի թուլանալ։

– Բայց մենք տեսել ենք, որ Նիկոլ Փաշինյանի ոչ հրապարակային հորդորով Բակո Սահակյանը կադրերից է ազատվում, Ձեր ո՞ր տպավորությունների մասին եք խոսում։

– Պաշտոնապես նախագահի հետ հանդիպումների ժամանակ ես նման կարծիք չեմ լսել, հետեւաբար, ենթադրություններով չեմ ուզում առաջնորդվել։

– Բակո Սահակյանը մի կողմից հայտարարել է, որ չի մասնակցելու նախագահական ընտրություններին, մյուս կողմից ուժեղացնում է ուժային կառույցները, ՀՅԴ-ն կարծես հավակնում է մասնակցել այդ ընտրություններին, այս համատեքստում է՞լ մտահոգվելու առիթ չեն տալիս նման նշանակումները․ գուցե Բակո Սահակյանն ակնկալիքներ ունի ընտրություններից, ու դրանով են պայմանավորված նրա քայլերը։

– Գիտեք, ամեն մեկը մտածում է իր ճիշտ լինելու մասին, կոնկրետ ՀՅԴ-ն կարծում է, որ ինքն է ճիշտ, եւ պատրաստվում ենք ապագա ընտրություններին, որի վերջնական որոշումը կկայացվի հուլիսի 6-7-ին՝ մեր շրջանային ժողովում կամ, ինչպես ասում են՝ համագումարում։

Ամեն մեկը յուրովի է փորձում վերցնել պատասխանատվությունը, եւ սահմանափակումներ չկան։ Մենք կոնկրետ պատրաստվում ենք շրջանային ժողովին, որից հետո մեր կարծիքը կներկայացնենք տարբեր հարցերի վերաբերյալ։

Եվ հավելեմ, որ ես Արցախի ժողովրդին շատ լավ գիտեմ ու գիտեմ, որ հեռու է լինելու բոլոր ճնշումներից ու փոքր-ինչ չի շեղվելու իր ընտրությունից, շարունակելու է՝ հայ ժողովրդի հետ միասնականության իր տեսլականի իրագործման նպատակին հասնելու համար։

– ՀՅԴ-ն կուսակցական թեկնածուո՞վ է մասնակցելու։

– Հավանականությունը շատ մեծ է, որ մենք թեկնածու ենք ունենալու, իսկ մնացած հարցերը կքննարկենք ժողովում։

– Տեղեկություններ կան, որ չի բացառվում՝ աջակցեք նախկին վարչապետ Արայիկ Հարությունյանին։

– Մենք ունենալու ենք մեր թեկնածուն եւ այդ թեկնածուին երբ որոշենք, հայտարարելու է, որ ինքը Դաշնակցության կողմից առաջադրված թեկնածու է, ես ավելին ասել չեմ կարող ու չեմ ուզում մտքի մարզանք անել, քանի դեռ որոշում չունենք։

– Սամվել Բաբայանը ստորագրահավաք է նախաձեռնել՝ սահմանադրական փոփոխությունների պահանջով, Ձեր կարծիքով՝ կլինե՞ն փոփոխություններ։

– Գիտեք, եթե Սահմանադրության մեջ կա կետ, որը ժողովուրդը պետք է առաջարկի փոխել, ուրեմն տեսականորեն ամեն ինչ հնարավոր է։ Բայց մենք գտնում ենք, որ Սահմանադրության մի կետով չի որոշվում, բոլոր կետերը շաղկապված են, եւ ժամանակին հստակ հայտարարել ենք ու հայտարարում ենք՝ ՀՅԴ-ն ամբողջությամբ դեմ է այս Սահմանադրությանը։ Մենք պայքարելու ենք, որ այն ամբողջովին փոխվի։ Եթե, օրինակ, ՀՅԴ-ական նախագահ ընտրվի, ապա նրա առաջին կոչը ժողովրդին այն է լինելու, որ իր կառավարման տարիներին ամբողջովին փոխվելու է Սահմանադրությունը, եւ Ղարաբաղը նախագահական կառավարման համակարգից անցնելու է խորհրդարանականին։

– Հիմա կոնկրետ դրույթի փոփոխություն է առաջարկվում՝ Արցախում 10 տարվա մշտական բնակության կետը նախագահի թեկնածուների համար չեղարկել, աջակցելո՞ւ եք։

– Քանի որ դեռեւս ընդհանուր որոշում չունենք, ես իմ կարծիքը կհայտնեմ՝ ես չեմ գտնում, որ պետք է մեկ դրույթ կիսատ ներկայացնել։ Հետո՝ Ղարաբաղ-Հայաստան միացման համար մենք լուրջ մտածում ենք այդ ուղղությամբ։ Դուք գիտեք, որ ՀՅԴ-ն նախաձեռնել է Արցախ-Հայաստան ռազմավարական դաշինքի կնքում, եւ չի բացառվում, որ մենք եւս ստորագրահավաք նախաձեռնենք, որպեսզի այդ դաշինքի կնքման համար փոփոխություններ նախաձեռնենք։ Այդ դաշինքի կնքմամբ Արցախը դառնում է դե յուրե ՀՀ-ի կողմից ճանաչված, 1992 թվականին ՀՅԴ-ն այդ հարցը բարձրացրել է, որ Հայաստանը ճանաչի Արցախի անկախությունը, հիմա ծիծաղելի կլինի, որ այսքան տարի հետո մենք ճանաչենք, նշանակում է՝ չե՞նք ճանաչել։ Եվ մենք առաջարկում ենք դաշինքի կնքում, իսկ դաշինքը կնքում են նրա հետ, ում ճանաչել են, հետեւաբար, ինքնըստինքյան դառնում է նաեւ, որ Հայաստանը ճանաչել է Արցախի անկախությունը։ Մենք այժմ ճշգրտում ենք հետագա քայլերը՝ այդ ծրագիրը կյանքի կոչելու համար։

– Ստորագրահավաքը ե՞րբ եք նախաձեռնում։

– Դեռեւս չեմ կարող ասել։

– Իսկ ի՞նչ ընթացակարգ է նախատեսում դաշինքի կնքումը։

– Ստորագրությունները կհավաքեն, որպեսզի Արցախի եւ Հայաստանի ղեկավարությունը հաշվի նստեն դրանց հետ եւ կնքեն դաշինքը։

Լուսինե Շահվերդյան