«Այս պահի դրությամբ հիմնական ճանապարհները փակ են, բայց կողմնակի ճանապարհները, այսինքն՝ քաղաքների միջեւ մարդկանց տեղաշարժը թույլատրվում է։ Պետական հաստատությունները եւ բանկերը փակ են, գործառնություններ չեն իրականացվում: Հարկային քաղաքականության դեմ բողոքի ակցիան հասել է քաղաքական պահանջների, այսինքն՝ քաղաքացիական եւ կենցաղային պահանջները տեղափոխվել են քաղաքական հարթություն՝ կառավարության հրաժարական, անցումային կառավարություն, արտահերթ ընտրությունների կազմակերպում, ապօրինի հարստացման դեմ վճռական քայլեր, հափշտակված գումարի վերադարձ նոր սահմանադրության ձեւավորում: Դատական հայցեր են  ներկայացվել կոռումպացված պետական նախկին գործիչների դեմ»,-նշեց նա։

Գանտահարյանի խոսքով՝ այս բոլորը մեկ նրբությամբ պետք է ընկալել, որ ցուցարարների անունից լիազորված մարմին չկա, շարժումը տարերային է։

Նա չի բացառում, որ տարերայնությունը մարտավարություն է, որպեսզի այդպիսով հնարավոր չլինի ճնշում գործադրել ցուցարարների վրա։

«Ընդհանուր պահանջների բանաձեւը կարելի է ընկալել որպես համակարգի վերափոխման պահանջ, ուզում են տեսնել պրոֆեսիանալների կառավարություն, կազմել անցումային կառավարություն, որի հիմնական գործառույթը լինելու է արտահերթ ընտրությունների կազմակերպումը:

Երեկ հետաքրիր ակցիա էր, որովհետեւ մարդիկ հյուսիսից հարավ շղթա էին կազմել, մասնակցում  էր շուրջ 170 հազար ցուցարար, Լիբանանը հայտնվել է ամենանշանավոր միջազգային լրատվականների ուշադրության կենտրոնում»,-նշեց Շահան Գանտահարյանը։

Նա, սակայն, դժվարանում է իրադարձությունների ընթացքը կանխատեսել․ «Բարդ է ընթացքը կանխատեսելը, որովհետեւ բանակցություններ չկան, փոխզիջման տարբերակներ չկան, պարզ չէ՝ կառավարությունը հրաժարական կտա, թե ոչ, բողոքի հանրահավաքները անց են կացվում հիմնականում երեկոյան»։

Շահան Գանտահարյանը հավելեց, որ ընդհանուր հայ համայնքի անունից պաշտոնապես մասնակցություն ցույցերին չկա, սակայն ցուցարարների շարքերում հայեր կան․«Միաժամանակ հոգեւոր եւ կուսակցական մարմիններից տեսակետներ են հնչել, որ շարժումը մնա քաղաքացիների իրավունքների եւ բարեկարգումներ ապահովելու շրջանակներում եւ չշահարկվի քաղաքական այս կամ այն ուժի կողմից։ Շարժումը համաժողովրդական է,  ցուցարաների պահանջների, ցասումի ըմբռնում կա»։

Նշենք, որ Լիբանանում ցույցերը սկսվել են հոկտեմբերի 17-ից՝ «WhatsApp»-ի զանգերի համար նոր հարկատեսակ կիրառելու մասին կառավարության որոշումից հետո։

Բացի այդ, բանակի եւ ցուցարարների միջեւ բախումներ են սկսվել, եղել են տուժածներ։
Ցուցարարները պահանջում են ցրել կառավարությունն ու խորհրդարանը, արտահերթ ընտրություններ անցկացնել, չեղարկել քաղաքականության մեջ եկեղեցական քվոտաները: Մի շարք համալսարաններ հայտարարել են անորոշ ժամանակով դասերն ու քննությունները հետաձգելու մասին, փակ են մնում երկրի բանկերը: