«Սենատոր Ռոբերտ Մենենդեսը վիճարկել էր Էրդողանի այդ հայտարարությունը՝ կոչ անելով «միաձայն» քվեարկել բանաձևի ընդունման օգտին: Սրանից հետո ենթադրվում էր, որ բանաձևն անհապաղ կընդունվեր Սենատում, սակայն անհրաժեշտ էր, որ ոչ ոք դեմ չլինի այդ առաջարկին: Սենատոր Մենենդեսն այդկերպ վարվեց, քանի որ գիտեր, որ եթե անմիջապես քվեարկության դրվեր բանաձևը, այն կընդունվեր ձայների ճնշող մեծամասնությամբ: Սենատոր Գրեհեմը նույնպես դա գիտեր և արգելափակեց բանաձևի քվեարկություն ոչ թե այն պատճառով, որ, ինչպես ինքն է ասում, կասկածի տակ է Հայոց ցեղասպանության փաստը, այլ կարծում է, որ Ցեղասպանությունը ճանաչելու ժամանակը չէ։

Եթե սենատոր Գրեհեմը դեմ էր բանաձևին, կարող էր պարզապես «ոչ» քվեարկել: Նա չպետք է Սենատի իր 99 գործընկերներին զրկեր այդ հարցում իրենց խղճի մտոք քվեարկելու հնարավորությունից:

Հայերն արդեն 100 տարի է՝ լսում են «ժամանակը չէ» արտահայտությունը։ Դա, ըստ էության, թույլ է տալիս Ցեղասպանության պատասխանատու Թուրքիային, որոշել, թե երբ ԱՄՆ-ն խոսի Հայոց ցեղասպանության մասին, երբ՝ ոչ: ԱՄՆ Ներկայացուցիչների պալատն իր միահամուռ քվեարկությամբ հաստատել է, որ ԱՄՆ-ն պետք է որոշում կայացնի այս հարցում: Մենք աշխատում ենք սենատոր Մենենդեսի և նրա ավելի քան 25 սենատոր գործընկերների հետ»,– ասաց Չուլջյանը։

Հարցին՝ որո՞նք են լինելու Հայ դատի հանձնախմբի հետագա քայլերը, Ե․ Չուլջյանը պատասխանեց՝ Հանձնախումբն արդեն կոչ է արել Միացյալ Նահանգներում բնակվող բոլոր հայերին կապ հաստատել իրենց նահանգը ներկայացնող սենատորների հետ և ստանալ նրանց աջակցությունը՝ Հայոց ցեղասպանությունը ճանաչող բանաձևի ընդունման համար:

«Էրդողանի Վաշինգտոն կատարած այցի ժամանակ 4 նոր սենատորներ իրենց աջակցությունն են հայտնել Հայոց ցեղասպանության մասին բանաձևին, նրանց թվում են սենատոր Բենեթը (Կոլորադո), սենատոր Քեյսին (Փենսիլվանիա) և Նևադայից երկու սենատորներ՝ Ռոզենը և Քորթես Մաստոն: Մենք պետք է շարունակենք մեծ թափ հաղորդել այս գործընթացին և ուժեղացնենք ճնշումն իշխանությունների վրա»։

Հիշեցնենք, որ Ամերիկացի հանրապետական սենատոր Լինդսի Գրեհեմն ավելի վաղ հայտնել էր, որ արգելափակել է ավելի քան մեկ դար առաջ Օսմանյան կայսրությունում Հայոց ցեղասպանության ճանաչման մասին բանաձևի ընդունումը Սենատի կողմից։ Գրեհեմն օգտվել է կանոնից, ըստ որի՝ մեկ սենատոր կարող է արգելափակել բանաձևի ընդունումն ամբողջ պալատի կողմից:

Հեղինակ Քրիստինա Բոյաջյան