Նամակին մէջ քոնկրեսականները փաստած են, որ Ատրպէյճանի ռազմական ներուժը վերջին տարիներուն անընդհատ կ՛աճի: Անոնք ընդգծած են, որ ամերիկեան ռազմական օգնութիւնը հնարաւորութիւն պիտի տայ Ատրպէյճանին աւելիով մեծցնելու ռազմական ներուժը եւ Հայաստանի ու Արցախի վրայ յարձակումներ իրականացնելու հաւանականութիւնը:

«Կասկած չկայ, որ Ատրպէյճանին յատկացուող ռազմական օգնութեան աճը անհաւասարակշռութիւն կը ստեղծէ տարածաշրջանին մէջ եւ կ՛անտեսէ Միացեալ Նահանգներու արտաքին քաղաքականութեան մէջ քսանամեայ նախադէպը», կը նշեն անոնք նամակին մէջ՝ շեշտելով, որ ռազմական օգնութեան համաչափ տրամադրումը միակ ճանապարհն է, որով Ամերիկա կրնայ պահպանել տարածաշրջանային գերտերութեան հեղինակութիւնը, եւ կրնայ հաշտեցնել Ատրպէյճանն եւ Հայաստանը:

Անոնք կոչ կ՛ընեն արտաքին գործոց եւ պաշտպանութեան նախարարութիւններուն՝ Հայաստանի համար կազմակերպելու համապատասխան մարզումներ եւ տրամադրելու սարքաւորումներ՝ գործընկերային ներուժը մեծցնելու համար: Ատիկա պիտի նպաստէ սահմաններու ապահովութեան երաշխաւորման եւ ռազմական հաւասարակշռութիւն ստեղծելու ջանքերուն, կը նշուի նամակին մէջ: Անոնք նաեւ կը խնդրեն այս հարցի շուրջ հանդիպում կազմակերպել Քոնկրեսի անդամներուն ու համապատասխան նախարարութիւններու պատասխանատու պաշտօնատարներուն միջեւ:

Նման նամակ մը յղուած էր նաեւ Սեպտեմբեր 27ին։ Զանոնք կարելի է կարդալ՝ այցելելով հետեւեալ կայքէջերը.

https://anca.org/assets/pdf/092719_ArmenianCaucus_MilitaryAid.pdf

https://anca.org/assets/pdf/111819_ArmenianCaucus_Security.pdf։

Ամերիկայի Հայ Դատի յանձնախումբի գործադիր վարիչ Արամ Համբարեան ողջունեց քոնկրեսականներու այս սկզբունքային քայլը, «անպատասխանատու» որակելով իր զեղծարարութիւններով յայտնի Ատրպէյճանի վարչակազմին տրամադրուող ռազմական օժանդակութիւնը 7 միլիոնէն 102 միլիոն տոլարի բարձրացնելու Ուաշինկթընի որոշումը։

asbarez.com