Իր բնույթով բացօթյա միջոցառումն սկսվեց Արթիկի Սբ. Գր. Լուսավորիչ առաջնորդանիստ եկեղեցում, որտեղ միասնական աղոթքից և Տեր Վիգեն քահանա Ղազարյանից օրհնություն ստանալուց հետո այն շարունակվեց եկեղեցուն հարակից տարածքում։

«Կործանման է դատապարտված այն ազգը, որը չի կարողանում պահպանել իր ազգային ավանդույթները», – այս խոսքերով նախաձեռնությունը արժևորեց ՀԱԵ Արթիկի թեմի առաջնորդական տեղապահ Հոգեշնորհ Տեր Նարեկ վարդապետ Ավագյանը, իսկ ՀՅԴ ՀԵՄ-ի Արթիկի խմբի անդամ Տարոն Աղաքարյանը իր կազմակերպության անունից նույնանման կոչ ուղղեց հայ երիտասարդությանը։

Նույնկերպ արժևորելով միջոցառումը՝ Մհեր Մելքոնյանը փաստում է․ «Մենք` հայերս, հզոր և պայքարող ժողովուրդ ենք: Մեզ ավելի հաստատակամ և ամուր պահում է մեր նախնիներից դարերով եկած ավանդույթներն ու ազգային արժեքները; Հայերիս համար ընտանիք, օջախ հասկացությունը շատ ավելի նվիրական նշանակություն ունի, քանի որ դարեր շարունակ այն եղել է մեր ազգային արժեքների ու ավանդույթների պահպանման ինքնատիպ միջավայր, որտեղ դաստիարակվել են ստացածը խնամքով պահպանող ու ապագային փոխանցող մեր սերունդները»:

Նա կարծում է, որ ազգային արժեքները տվյալ ազգի պատմութունն են` անցած ճանապարհը, որը ներառում է կրոնը, մշակույթը, հասարակական ու քաղաքական կյանքը:

«Նոր սերնդի արժեհամակարգի ձևավորման, կրթության և դաստիարակության գործում լուրջ անելիքներ ունի նաև հայ դպրոցը, որի գերնպատակը պետք է լինի կերտել բարոյական, ազգային արժեքներով օժտված, ազգային նկարագիր ունեցող սերունդ: Ժամանակակից դպրոցի կարևորագույն առաքելություններից մեկն էլ երեխայի մեջ իր ազգին բնորոշ բարոյական և հոգևոր արժեքների ձևավորումն ու զարգացումն է: Նրա խնդիրն է պահպանել և փոխանցել այն արժեքները, որոնք ժառանգել ենք մեր նախնիներից։ Ավանդույթները ազգային արժեքներ են, որոնք բնութագրում են մեր ժողովրդին, նրա հաստատուն լինելը և հային բնորոշ յուրահատկությունը»,- նշում է ՀՅԴ Արթիկի Կոմիտեի ներկայացուցիչը և փաստում՝ պետք է պահպանել այն, ինչ դարերով փոխանցվել է մեզ, և մենք էլ մեր հերթին պետք է փոխանցենք սերունդներին, որպեսզի մեր ազգի ավանդույթները դարերով շարունակվեն:

«Այսօր էլ ազգային արժեքներին խեղաթյուրման վտանգ է սպառնում: Մեր ավանդույթները պարզապես կարիք ունեն պահպանման, յուրաքանչյուրս փորձենք դառնալ դրանց կրողը` դա դարձնելով մեզ համար կենսակերպ: Մեր ազգային արժեքները թանկ ժառանգություն են, որոնք մենք պարտավոր ենք պահել անբասիր և նրա հենքի վրա կառուցել նորը», -եզրափակեց իր խոսքը Մհեր Մելքոնյանը:

Միջոցառումն ուղեկցվեց ազգային երգ ու պարով, որտեղ ելույթներով հանդես եկան ՀՅԴ ՀԵՄ-ի «Արգիշտի Գաբոյան» խմբի և ՀՅԴ Հայաստանի պատանեկան միության Արթիկի միավորի անդամները, ինչպես նաև Գյումրու «Շիրվանյան» երիտասարդական կենտրոնի նույնանուն ազգագրական պարի խումբը:

Հիշեցնենք, որ այս ամենին զուգահեռ ՀՅԴ ՀԵՄ-ի Երևանի միավորի ներկայացուցիչներն իրենց հերթին իրականացնում են ԿԳՄՍ նախարարի ապազգային կերպարի և իրականացվող հակազգային ծրագրերի մերժման ուղղությամբ մի շարք գործողություններ:

yerkir.am