«Ցուցարարները բողոքում են կառավարության ապաշնորհ գործունեությունից, կոռուպցիայից, պահանջում են թալանված գումարների վերադարձ»,-անդրադառնալով Լիբանանում շարունակվող` կենցաղային խնդիրների բարձրաձայնումից արդեն քաղաքական պահանջների հարթություն տեղափոխված զանգվածային ցույցերին՝ ասաց Շահան Գանտահարյանը:

Նրա գնահատմամբ՝ անորոշ իրավիճակը շարունակվում է, հանգուցալուծման ճանապարհները դեռեւս տեսանելի չեն: Ինչ վերաբերում է լիբանանահայերին եւ նրանց անվտանգությանն ուղղված պատգամավոր Էդմոն Մարուքյանի կոչին, Շահան Գանտահարյանը նկատեց. «Օրինաչափ կլինի, որպեսզի Հայաստանից հնչի անհանգստություն՝ ճգնաժամում հայտնված իր հայրենակիցների, ես կասեի՝ քաղաքացիների վերաբերյալ, որովհետեւ Լիբանանում երկքաղաքացիության օրենքի ընդունումից հետո նկատելի է Հայաստանի քաղաքացիություն ստացածների թվի աճը: Միջազգային պրակտիկայում ընդունված է, որ անվտանգության միջավայրի մտահոգություններով պայմանավորված՝ պետությունն իր քաղաքացիների տարհանման հարցով է զբաղվում»:

Ըստ Շահան Գանտահարյանի՝ հիմա Լիբանանում խուճապային իրավիճակ եւ զանգվածային արտահոսքի խնդիր չկա, բայց, ինչպես շեշտվեց, ավելացել է ՀՀ քաղաքացիություն ստանալու համար դիմողների եւ դեպի ՀՀ ներդրում անողների կամ բնակարան գնողների թիվը. «ՀՀ-Լիբանան միջպետական կապերի ակտիվացմանը զուգահեռ՝ սերտացել են լիբանանահայ համայնք-ՀՀ կապերը: Այսինքն, խուճապի մթնոլորտ չկա, բայց դեպի ՀՀ հայացքները շատացել են»: