Դիտարկմանը, թե տավուշյան մարտերից հետո հարցը փակուղում է գտնվում և հարցին՝ ի՞նչ քայլեր պետք է կատարվեն, Բալայանը պատասխանեց. «Իհարկե, միջնորդ երկրները ձգտում են, որ բանակցային գործընթացը պահպանվի, դա անհրաժեշտություն է ոչ միայն Արցախ-Ադրբեջան հակամարտության հետ կապված խնդիրները լուծելու համար․ սա տարածաշրջանային նշանակություն ունեցող հարց է և աշխարհի ուժային կենտրոնները, բնականաբար, ցանկանում են, որպեսզի այդ հակամարտության հնարավորինս արագ լուծում ապահովվի՝ տարածաշրջանում երկարատև խաղաղություն պահպանելու տեսանկյունից»:

Ըստ նրա՝ Լավրովի հայտարարության գաղափարն այն է, որ եթե չկա բանակցություն, չկա խոսք, հետևաբար՝ այդ ամենն արդեն տողափոխվում է պատերազմի դաշտ: «Պետք է փորձել շփման եզրեր փնտրել, որովհետև այս երկու ժողովուրդներն իրար մոտ են ապրում և կարծում եմ՝ նման պարագայում պետք է խոսվի: Հայկական երկու կողմերը պետք է իրենց տեսակետերը հայտնեն բանակցային գործընթացում և կործում եմ՝ համաշխարհային հանրության համար ընկալելի կլինի մեր տեսակետը, որովհետև մեր նպատակը տարածքի խնդիր չէ. սա պետք է տանք, սա պետք է գրավենք, մեր խնդրի կարևորությունն իր հայրենիքում մարդու ազատ ապրելու իրավունքի պաշտպանությունն է»,- նշեց Բալայանը:

Անդրադառնալով Արցախի նախագահ Արայիկ Հարությունյանի հայտարարություններին, մասնավորապես այն խոսքին, որ Արցախի ճանաչումը չէ կարևոր, և անվտանգության ապահովումը և բանակցությունները պետք է ըստ դրա ընթանան, և լրագրողի դիտարկմանը, թե նախագախը ընդգծել էր՝ բանակցություններն ըստ էության չեն լինի և պետք է պատրաստ լինել պատերազմի՝ հաշվի առնելով այն հանգամանքը, որ հայկական կողմը պատերազմի է պատրաստվում և աշխարհազոր է ստեղծվում, Բալայանը արձագանքեց՝ միջազգայնորեն Արցախը ճանաչելն իսկապես ավելի անվտանգ կդարձնի երկիրը՝ անկախ նրանից, թե այդ բանակցություններն այս պահին արդյունավետ են, թե՝ ոչ:

«Բանակցություններն արդյունք կտան, թե չեն տա՝ մենք պարտավոր ենք բանակցել, մենք պարտավոր ենք խոսել, սա չի խանգարում, որ մենք նաև լայնամասշտաբ պատերազմի պատրաստվենք: Պատերազմն ավարտված չէ, այն դեպքից դեպք ակտիվանում է, իր արտացոլումն է ստանում ռազմի դաշտում, հետո տեղեկատվական դաշտում պատերազմը սկսվում»,- նշեց Բալայանը:

Մանրամասները՝ տեսանյութում։

https://youtu.be/7bFWFpQ3MPk