Հանրահաւաքին ներկայ էին ՀՅԴ Բիւրոյի ներկայացուցիչ Ընկ. Յակոբ Տէր Խաչատուրեան, Բիւրոյի անդամ Ընկ. Րաֆֆի Տօնապետեան, ՀՅԴ Գանատայի Կեդրոնական կոմիտէի ներկայացուցիչ Մհեր Գարագաշեան, ՌԱԿ-ի ու ՍԴՀԿ-ի ներկայացուցիչներ, ինչպէս նաեւ Գանատայի դաշնակցային եւ նահանգային խորհրդարաններու ներկայացուցիչներ: Հանդիսավարն էր Ընկհ. Միռնա Ֆուտուլեան:

Հերթաբար խօսք առին՝ Գանատայի Ազատական կուսակցութեան եւ խորհրդարանի անդամներ Ֆայսալ էլ Խուրին ու Անի Գութրաքիսը, Ընդդիմադիր «Նոր Դեմոկրատ» կուսակցութեան փոխ նախագահ Ալեքսանտր Պուլըրիսը, Մոնթրէալի Աքատի շրջանի նահանգային Երեսփոխան Քրիսթին Սէն–Փիէռը, Լաւալի քաղաքապետական խորհուրդի անդամներ՝ Արամ Էլակէօզը (Renaud), Ալին Տիպը (St-Martin) եւ Վասիլիոս Քարիտօճիանիսը (Լապօր-ա-Փլուֆ), որոնք խստօրէն դատապարտեցին ատրպէյճանական զինեալ յարձակումներն ու բռնութիւնները, իրենց ամբողջական աջակցութիւնը յայտնեցին հայ ժողովուրդին եւ կոչ ուղղեցին միջազգային հանրութեան, որպէզի սատար կանգնին հայ ժողովուրդի արդար իրաւունքներու աշտպանութեան: Բողոքի իր ձայնը բարձրացուց նաեւ Մոնթրէալի Ռուանտայի համայնքի փոխ նախագահ Ժագ Վիրաժիրա։

Բողոքի ցոյցի ընթացքին ելոյթ ունեցան ՀՅԴ Գանատայի Կեդրոնական կոմիտէի ներկայացուցիչ Ընկ. Մհեր Գարագաշեանն ու Գանատայի Հայ Դատի յանձնախումբի ատենապետ Ընկ. Հրակ Տարագճեանը, որոնք դատապարտեցին Ատրպէյճանի ու Թուքիոյ կիրառած բռնութիւններն ու դրսեւորած յարձակողապաշ քաղաքականութիւնը, որոնք կ’ուզեն բռնութեամբ լուծել Արցախի ինքնորոշման արդար իրաւունքն ու իրագործել իրենց մտադրութիւնները:

Ընկ. Տարագճեան իր խօսքին մէջ շեշտեց, որ «Ատրպէյճանի եւ Թուքիոյ բանակները, աջակցութեամբ ահաբեկիչներու, վեց օրէ ի վեր բռնութեամբ ու ռազմական գործողութիւններով կը թիրախաւորեն Արցախի եւ Հայաստանի քաղաքացիական բնակավայրերը»: Իսկ Ընկ. Գարագաշեան իր խօսքը մանաւանդ ուղղելով Գանատայի Վարչապետ Թրուտոյին ու Արտգործ նախարար Շամփայնին, նշեց, որ Արցախի ու Հայաստանի մէջ հայ ժողովուրդը կենաց-մահու ժամեր կ’ապրի, թուրքը անգամ մը եւս ցեղասպանութիւն կ’իրագործէ տարածաշրջանին մէջ, ուստի պահը հասունցած է մէկդի թողելու խաղաղասիրական եւ երկողմանի հրադադար յորդորող կոչերն ու գաղափարները եւ գործի լծուիլ՝ յանուն Հայաստանի, Արցախի ու հայ ժողովուրդի գոյատեւման: «Որպէս գանատահայեր, կը պահանջենք վարչապետէն ու Արտգործ նախարարէն՝ դատապարտել Թուրքիոյ ռազմական եւ դիւանագիտական ներգրաւուածութիւնը Արցախեան հակամարտութեան մէջ եւ անյապաղ դադրեցնել գանատական ռազմական սարքերու վաճառքը Թուրքիոյ», եզրափակեց ան:

Բողոքի ցոյցի ընթացքի հայրենասիրական երգերով ելոյթ ունեցաւ Էլի Պէրպէրեան:

Բողոքի Ցոյց Մոնթրէալի մէջ

Կիրակի Հոկտեմբեր 4-ին, Place du Canada-ի մէջ, Մոնթրէալահայութիւնը բողոքի ցոյցով դատապարտեց թուրք-ատրպէյճանական ռազմական յարձակումերը եւ ներկայացուց իր պահանջները Գանատական Կառավարութեան։

Մոնրէալի «Հայ Հորիզոն» հեռատեսիլի տնօրէնուհի Թամար Շահինեանի պատրաստած տեսանիւթը:

Թուրք- ատրպէյճանական յարձակողապաշտութեան դէմ բողոքի ցոյց մը տեղի ունեցաւ Վանգուվըրի մէջ

Հ. Յ. Դ. Գանատայի երիտասարդական միութեան Վանգուվըրի Արշաւիր Շիրակեան Մասնաճիւղի նախաձեռնութեամբ, Շաբաթ, 3 Հոկտեմբեր 2020-ին, թուրք– ատրպէյճանական յարձակողապաշտութեան դէմ բողոքի ցոյց մը տեղի ունեցաւ Վանգուվըրի մէջ։

Երկու հարիւրէ աւելի հայեր, յոյներ Քիւրտեր մասնակցեցան հաւաքին։ Խօսք առին ՀՅԴ Գանատայի Կեդրոնական վարչութեան ատենապետ ընկ. Մանուկ Ալէմեանը, Գանատայի Հայ դատի Արեւմտեան շրջանի ատենապետ ընկ. Յակոբ Յակոբեանն ու Վանգուվըրի քիւրտ համայնքի ներկայացուցիչներ։ Դատապարտումի խօսքով հանդէս եկաւ ՀՅԴ ԳԵՄի «Արշաւիր Շիրակեան» մասնաճիւղի անդամ Նաթալի Պոզիքեան։

Բողոքի ցոյցը շարունակուեցաւ Ազգայի–յեղափոխական երգերու ներկայացումով։ Աւարտին, հոգշ. Տ. Գարեգին վրդ. Շխըրտըմեանի եւ Տէր Գեղարդ քհնյ. Կարապետեանի «Պահպանիչ»ով իր աւարտին հասաւ բողոքի ցոյցը։ ներկաները խրախուսուած հայ մարտիկներու սխրագործութիւներէն, ամբողջ ցոյցի ընթացքին կ’որոտային «Յաղթելու ենք» լոզունքը։

horizonweekly.ca