Խորհրդային Միութեան փլուզումով Արցախի հայերը հանրաքուէ կատարեցին եւ միաձայնութեամբ անկախութիւն հռչակեցին, որուն պատճառով բռնկեցաւ 1988-1994 երկարած պատերազմը: «Արցախ պատմականօրէն հայկական է, անոր տարածքին կառուցուած հարիւրաւոր խաչքարերն ու վանքերը կը վկայեն, որ նոյնիսկ Արցախի բնութիւնը կը մերժէ, որ հայեր հեռանան հոնկէ», ընդգծեց Բագրատունի:

Այսօր ինչ որ կը պատահի Արցախի մէջ նախ եւ առաջ այն է, որ Թուրքիա կանխածրագրուած ձեւով եւ ամբողջականօրէն զօրակցելով Ազրպէյճանին, կը փորձէ վերակենդանացնել փանթուրանականութեան երազը: Փաստօրէն նախկին վարչապետներ Թանսօ Չիլեր եւ նախագահ Թուրկութ էօզալ յաճախ կը կրկնէին, թէ Հալէպ եւ Մուսուլ թրքական հող էին: Իսկ Էրտողան դեռ քանի մը օր առաջ յայտարարեց, որ Երուսաղէմը թրքական է:

Երկրորդ, Թուրքիա կը փորձէ ամբողջացնել Համաշխարհային Ա. պատերազմին գործադրած ցեղասպանութիւնը հայերուն դէմ:

Երրորդ, Թուրքիա այսօր հարցեր ունի դրացի մէկէ աւելի երկիրներու հետ, ինչպէս` Սուրիոյ, Իրաքի, Լիբանանի, Յունաստանի, Կիպրոսի, Եգիպտոսի, Սէուտական Արաբիոյ եւ Արաբական Միացեալ Էմիրութիւններու` հասնելով մինչեւ Լիպիա:

Ազրպէյճան 1918-ին հիմնուած արուեստական պետութիւն է, ՀՅԴ-ն անկէ առաջ հիմնուած է: Երեսփոխան Բագրատունի յիշեցուց, թէ իսրայէլեան օդանաւեր զինամթերք կը փոխադրեն դէպի Ազրպէյճան եւ իսրայէլացի պատասխանատու մը պատկերասփռուած զրոյցով հաստատեց այդ իրողութիւնը: Աւելի՛ն, իսրայէլացի մասնագէտներ Ազրպէյճան կը գտնուին: Չմոռնանք, որ Թուրքիա առաջին պետութիւնն է, որ ճանչցաւ Իսրայէլի պետութիւնը:

Չորրորդ, վարձկան ահաբեկիչներու մասնակցութիւնը Արցախի կռիւին. եթէ պատերազմը Արցախի եւ Ազրպէյճանի միջեւ է, ապա օտար վարձկաններ ի՞նչ գործ ունին ճակատներուն վրայ: Վարձկաններու մասնակցութիւնը հաստատեցին Սուրիոյ նախագահ Պաշշար Ասատ, Արաբական լիկայի ընդհանուր քարտուղար Ահմետ Ապուլ Ղէյթ եւ Ֆրանսայի նախագահ Էմանուէլ Մաքրոն:

«Այս պատերազմը սկսաւ անցեալ շաբաթ եւ չենք գիտեր, թէ ե՛րբ կը լրանայ», ըսաւ Բագրատունի` նշելով, որ եթէ անիկա յառաջիկայ քանի մը օրերուն չդադրի, ապա անիկա պիտի շարունակուի, ու մանաւանդ վարձկաններու ներկայութեամբ շրջանային պատերազմ պիտի ծագի, եւ շրջանի բոլոր երկիրները սուղ պիտի վճարեն գինը: «Արդ, կոչ կ՛ուղղեմ, որ շրջանի երկիրները անկարելին կարելի դարձնեն ու վերջ տան բախումներուն», ընդգծեց երեսփոխան Յակոբ Բագրատունի:

Ապա շրջանի մեծ պետութեանց կեցուածքներուն անդրադառնալով` Բագրատունի յայտնեց, որ Իրանը համամիտ է բանակցութիւններու ճամբով լուծելու այս հարցը, նմանապէս եւ Ռուսիան: Իսկ Ալիեւ նոյնպէս համամիտ է բանակցութեանց, պայմանով, որ հայկական ուժերը հեռանան այսպէս կոչուած «ազրպէյճանական հողերէն», Արցախը վերադարձնեն Ազրպէյճանին եւ Հայաստանի վարչապետը ներողութիւն խնդրէ: «Մենք այսօր Արցախի մէջ մահու եւ կենաց գոյութենական կռիւ կը մղենք` պահպանելու համար մեր հողը»: Մեր իրաւունքն է պաշտպանել զայն, եւ վստահաբար պիտի յաղթենք», շեշտեց երեսփոխան Յակոբ Բագրատունի:

aztagdaily.com