Հանդիպումէն ետք Յ. Բագրատունի յայտնեց, որ ՀՅԴ Լիբանանի Կեդրոնական կոմիտէն առաջին անգամը չէ, որ հանդիպում կ՛ունենայ Լիբանանեան ուժեր կուսակցութեան հետ` Պուրճ Համուտի թէ Մեհրապի մէջ:

«Այսօր բարեկամներու այս պատուիրակութեան այցելութիւնը զօրակցական այցելութիւն է այնպիսի դատի համար, որ ամբողջ հայութեան դատն է` ամբողջ աշխարհի տարածքին, որովհետեւ պատերազմ կայ ամբողջ հայութեան դէմ: Թուրքիոյ եւ Ազրպէյճանի կողմէ սանձազերծուած եւ Իսրայէլի օժանդակութիւնը վայելող պատերազմը ընթացքի մէջ է Արցախի մէջ: Արցախի դէմ պատերազմը հայութեան դէմ պատերազմ է, իսկ հայութեան դիմադրութիւնը ազրպէյճանական – թրքական յարձակողապաշտութեան հայութեան համար ազգային գոյամարտ է», ըսաւ Յ. Բագրատունի:

Երեսփոխան Բագրատունի յայտնեց նաեւ, որ հանդիպումին ընթացքին լիբանանեան իրադարձութիւններուն կողքին քննարկուած է Արցախի մէջ տիրող պատերազմական իրավիճակը եւ շեշտուած ազատ ու քաղաքակիրթ աշխարհին կողմէ, կամ ժողովրդավարութեան, մարդկային իրաւունքներու պաշտպաններուն եւ ազգային ինքնորոշման իրաւունքին հաւատացողներու մնացորդացին կողմէ իրաւունքին եւ արդարութեան ի նպաստ շարժում մը սկսելու կամ միջազգային նախաձեռնութիւն մը ներկայացնելու կարեւորութիւնը:

Իր կարգին, Մըլհեմ Ռիաշի Լիբանանեան ուժեր կուսակցութեան եւ Ժահժահի անունով ողջոյններ փոխանցելէ ետք հաստատեց, որ իրենց պատուիրակութիւնը ՀՅԴ Լիբանանի Կեդրոնական կոմիտէին այցելած է զօրակցութիւն յայտնելու հայ ժողովուրդին, յատկապէս նկատի ունենալով, որ հայութիւնը լիբանանեան ազգային հիւսուածքին մէկ կարեւոր շերտն է եւ այսօր մտահոգ է իր հայրենիքով ու նախնիներուն հողերով:

«Հայութիւնը այսօր կ՛ապրի դար մը առաջ իր դէմ գործուած Ցեղասպանութեան կրկնութեան մտահոգութիւնը, որ կը սպառնայ իր գոյութեան: Մենք կը զօրակցինք հայ ժողովուրդին եւ կը շեշտենք, որ Արցախ ազգային ինքնորոշման իրաւունք ունի: Լիբանանեան ուժեր կուսակցութիւնը կը հաւատայ մարդու իրաւունքին եւ կոչ կ՛ուղղէ նեցուկ կանգնելու իրաւունքին` Արցախի ազգային ինքնորոշման իրաւունքին, եւ անհրաժեշտ կը նկատէ, որ ՄԱԿ-ը եւ Հայաստանի ու Արցախի դրացի երկիրները ըմբռնեն, որ իւրաքանչիւր պատերազմ պիտի աւարտի խաղաղութեամբ, երկխօսութեամբ եւ քաղաքական բանակցութիւններով», ըսաւ ան:

Ռիաշի կարեւոր նկատեց, որ պատերազմող կողմերը վերադառնան բանակցութեան սեղան եւ խորհրդակցին, յատկապէս նկատի ունենալով այն իրականութիւնը, որ մեզի ծանօթ է հայոց մասին` իբրեւ քաղաքակիրթ, գիտակից, զարգացած ու իր գտնուած միջավայրը հարստացնող եւ ոչ թէ անոր վնաս հասցնող ժողովուրդ:

«Խաղաղութիւն կը մաղթենք Արցախին եւ Հայաստանին ու անոր շրջակայքին` յոյս ունենալով, որ անոնք վերադառնան երկխօսութեան, եւ իրաւունքները տրուին իրաւատիրոջ», եզրափակեց ան:

aztagdaily.com