Հայրենիքի փրկության շարժման վարչապետի թեկնածու Վազգեն Մանուկյանն այսօր՝ դեկտեմբերի 14-ին, հանդիպել է մտավորականների եւ մշակութային գործիչների հետ։

Այս խայտառակ և ամոթալի պարտությունը դառնություն է առաջացնում իմ մոտ նաև այն պատճառով, որ ես գիտեմ, որ այդ ամենը կարելի էր կանխել: Այս մասին այսօր մտավորականների և մշակույթի գործիչների հետ հանդիպմանն ասաց «Հայրենիքի փրկության շարաժման» վարչապետի թեկնածու Վազգեն Մանուկյանը:

«Դեռ 2.5 տարին, որ նախապատրաստվում էր այս ամենը, մի կողմ թողնենք: Ճիշտ քաղաքականության դեպքում այս պատերազմը կարող էր լինել ոչ թե հիմա, այլ միգուցե ավելի ուշ: Բանակցությունները մենք տապալեցինք, հակառակորդին գրգռեցինք և մտցրինք պատերազմի մեջ: Եթե 2.5 տարվա ընթացքում էլ մենք մի քիչ զբաղվեինք բանակով, մենք պարտություն չէինք ունենա»,- ասաց նա:

Վազգեն Մանուկյանը նկատեց, որ նոյեմբերի 10-ին ստորագրված եռակողմ համաձայնագիրն իր մեջ ունի շատ բացեր:

«Այսպիսի համաձայնագրերի տակ սովորաբար լինում են գաղտնի հավելվածներ՝ տասնյակ էջեր: Ոչ մի բան չկա, իսկ դա նշանակում է բանակցությունների միջոցով կարելի է այս կամ այն կետը ուղղել մեր օգտին, բայց ով է այդ բանակցությունները վարելու: Այն մարդը, որը մեր երկիրը տարավ պարտությա՞ն: Իրեն չեն ընդունում ոչ միայն մեր երկրում, ամբողջ աշխարհի համար ինքը քաղաքական դիակ է, ճիշտ է, մարտնչող, բայց քաղաքական դիակ է»,- նշեց «Հայրենիքի փրկության շարաժման» վարչապետի թեկնածուն:

Ըստ նրա՝ պատերազմի հետևանքների վերացումը և ոտքի կանգնելու գործընթացը կսկսվի այն պահից, երբ Նիկոլ Փաշինյանը հրաժարական ներկայացնի. «Բոլորը հասկանում են, որ ինքը պետք է գնա, բացի իրենից: Բայց այդ հոգեվարքը, ամեն մի կորած օրը մեր վրա շատ ծանր է նստում»,- նշեց նա:

Վազգեն Մանուկյանը նաև ներկայացրեց, թե Նիկոլ Փաշինյանի հրաժարականից հետո որոնք պետք է լինեն անցումային Կառավարության անելիքները:

«Հսկայական բանակցային պրոցես պետք է գնա այս համաձայնագիրը կյանքի բերելու և որոշ կետեր մեկնաբանել այնպես, ինչպես մենք կուզենանք: Այն, որ մենք ժամանակից հետո պետք է լրջորեն քննարկենք, թե ինչ հարաբերություններ պետք է ունենանք Թուրքիայի, Իրանի, մյուս երկրների հետ, ակնհայտ է: Բայց այն մարդիկ, որոնք դեռ պատերազմը չավարտված, երբ դեռ կրակում են սահմաններին, հայտարարում է, որ մենք հիմա դիվանագիտական հարաբերություններ ստեղծենք Թուրքիայի հետ, դա ընդհանրապես անհասկանալի է: Եթե կռվի ժամանակ ասում ես՝ հաշտվենք, դա կլինի մեր երկրորդ կապիտուլյացիան: Դա իրենց թելադրվում է, թե տգիտություն է, ինձ չի հետաքրքրում»,- ասաց նա:

Անցումային Կառավարության համար, նրա խոսքով՝ ծանր ժամանակաշրջան է լինելու, քանի որ կան մի շարք օրհասական խնդիրներ, մասնավորապես, փախստականներ, գերիներ, զոհվածների, անհետ կորածների հարցերը: Վազգեն Մանուկյանի համոզմամբ՝ այդ ամենը պետք է լուծվի անցումային Կառավարության միջոցով:

«Երբեմն խոսակցություններ կան, որ հիմա կլինի հրաժարականը, հները կվերադառնան: Ընդհանրապես այն կատեգորիաները, որոնք 2.5 տարի առաջ մտան՝ հների և նորերի մասին, ինձ համար հասկանալի չէ: Երբ Ղարաբաղյան շարժումը եկավ իշխանության, այսպես կոչված, հները՝ կոմունիստները, բոլոր այն մասնագետները, որոնք Կոմունիստական կուսակցության մեջ էին, բայց պետքական էին և օգտակար էին Հայաստանին, աշխատում էին: Իմ կառավարությունում միայն 6 հոգի մնացել էր նախկին Կառավարությունից, նույն ձև էլ լինելու է, շարունակվելու է նույն ձև: Անցումային շրջանից հետո սկսվելու է նոր փուլ, այդ նոր փուլի մեջ կտեղավորվեն հներ, նորեր: Նրանք ովքեր կարող են իրենց հայրենիքին օգուտ բերել, տեղավորվելու են»,- նշեց Վազգեն Մանուկյանը:

https://youtu.be/u75eCqC6KyI