Ես համարում եմ ապացուցված, որ պատերազմը կարելի էր կանխել, եթե մեր բանակը պատրաստ լիներ, մեր ամուր դիրքերը կկարողանայինք պահել. Վանաձորի քաղաքացիների հետ հանդիպմանն ասաց միասնական թեկնածու Վազգեն Մանուկյանը:

Նա նշեց, որ նույնիսկ այդ աննպաստ պայմաններում, եթե հիմար հրամաններ չլինեին, կարգ ու կանոն լիներ, այդ կորուստները չէինք ունենա: «Երբ մի քանի օր անց ռազմական ընթացքը վատ վիճակում էր, մենք կարող էինք պատերազմը կանգնեցնել ավելի շուտ` ավելի քիչ կորուստներով: Ապացուցված եմ համարում, որը Շուշին ոչ թե գրավել են ադրբեջանցիները, այլ տվել են մերոնք, դավաճանության, թե հիմարության պատճառով, դա այլ հարց »,-ասաց նա:

Անդրադառնալով եռակողմ հայտարարությանը՝ նա կործանարար խայտառակություն այն համարեց մեր ժողովրդի, պետության համար: «Զգացվում է, որ հայկական կողմը ոչ մի քաղաքական բանակցություն չի արել` այդ փաստաթուղթը լավացնելու համար: Իմ անձնական կարծիքով՝ կարող եմ պնդել, որ ամսի 8-ի և 9-ի կողմերն ադրբեջանական բանակը պահանջ ուներ դադարի, զինամթերքը, զինվորներն իրենց մոտ շատ էին, բայց կար հոգնածություն և ներքին դժգոհություն»,-ասաց նա:

Ըատ Վազգեն Մանուկյանի` ջարդված է մեր բանակը, հսկայական տնտեսական կորուստներ ունենք, մենք կործանարար խաղաղության մեջ մտանք, և փաստաթուղթը ստորագրելուց հետո մեր պարտությունը շարունակվում է: «Մենք հիմա ստորացված դիրքում ենք, չմտածեք, որ այդ ճանապարհը բացվեց, մեր բիզնեսն է զարգանալու, Թուրքիայի և Ադրբեջանի բիզնեսն է զարգանալու: Մենք նորից դառնալու ենք բնակավայր, ոչ թե պետություն»,- ասաց նա և նշեց, որ այս պայմաններից կարելի է ոտքի բարձրանալ:

Մենք ունենք հարյուրավոր գերիներ։ Ես գիտեմ՝ ինչ է նշանակում գերի լինել Ադրբեջանում․ սարսափում եմ՝ պատկերացնելով նրանց մի մասի վիճակը։ Մինչև հիմա այդ գերությունից ինչ-որ մարդիկ չեն կարողացել վերադառնալ։

Մենք կորցրել ենք մեր բանակը, ջարդված է մեր բանակը, մնացորդներ են մնացել մեր բանակից, մենք կորցրել ենք միլիարդ դոլարից ավելի զենք ու զինամթերք։ Մենք ունենք տնտեսական հսկայական կորուստներ․ կործանարար խաղաղության մեջ մենք մտանք»,-ասաց Վազգեն Մանուկյանը։

Նա նաև արձանագրեց, որ ժողովրդի ճնշող մեծամասնությունը այնքան վրդովված էր իրեն զգում այս վիճակից, որ պահանջում էր անհապաղ հեղափոխություն անել և ազատվել այս իշխանություններից, բայց կային նաև մարդիկ, ովքեր ասում էին՝ պատերազմը վերջացել է, եկեք գնանք առաջ։ «Բայց նրանք չեն հասկանում, որ, այս պայմաններում, պարտությունը շարունակվում է»,-ասաց Վազգեն Մանուկյանը։

«Անվտանգության խնդիր ունենք, և Հայաստանում բազմաթիվ լրտեսական ցանցեր կան, այդ թվում նաև՝ Թուրքիայի, որոնք սողոսկում են իշխանության մեջ»,-ասաց նա:

Նշենք, որ հանդիպման ընթացքում Վազգեն Մանուկյանը պատասխանել է քաղաքացիներին հուզող հարցերին։