Սա շարքային հանրահավաք է, և այսպիսի հանրահավաքներ էլի են լինելու։ Մեր նպատակն անփոփոխ է. այսօր Հայրենիքի փրկության շարժման հանրահավաքից առաջ լրագրողների հետ զրույցում ասաց շարժման վարչապետի թեկնածու Վազգեն Մանուկյանը։

Հարցին, թե ո՞րն է հանրահավաք անցկացնելու նպատակը, եթե արդեն արտահերթ ընտրություններ են հայտարարվել, Վազգեն Մանուկյանը պատասխանեց.

«Որտեղի՞ց գիտեք, որ ընտրություն է լինելու։ Արտահերթ ընտրությունների լինել-չլինելը մի հոգի կա, որ որոշում է՝ Փաշինյանը։ Նա է որոշել, իսկ ինքը այնքան ստեր է ասել, որ կարող է լինեն ընտրություններ, կարող է՝ չլինեն»,- ասաց նա։

Մեկ այլ հարցի, թե հնարավո՞ր է շարժման ֆորմատի փոփոխություն լինի, Վազգեն Մանուկյանը դրական պատասխան տվեց. «Կհավաքվենք, միասին կորոշենք»։

Ինչ վերաբերում է ընտրություններին՝ իր մասնակցությանը, ապա քաղաքական գործիչը հիշեցրեց, որ ինքը մի քանի անգամ հայտարարել է, որ ոչ մի ֆորմատով ընտրություններին չի մասնակցելու։

«Բայց կարող է գնամ հանդիպումներ, հարցազրույցներ ունենամ, սակայն դա չի լինեու այս կամ այն թեկնածուի օգտին, այլ լինելու է ընդհանուր վիճակի մասին և Նիկոլի դեմ»,- նշեց նա։

Անդրադառնալով ԱԽ քարտուղար Արմեն Գրիգորյանի երեկվա հայտարարությանը, թե պետք է շտկումներ մտցնել Թուրքիայի նկատմամբ մոտեցումներում՝ Վազգեն Մանուկյանը նշեց, որ դրա մեջ անհեթեթություն կա։

«Մենք Թուրքիայի հետ բարդ հարաբերություններ ենք ունեցել և՛ նախկինում, և՛ այժմ։ Եվ հիմա, երբ նույնիսկ պատերազմը չի ավարտվել, այլ զինադադար է, և մեր դեմ պատերազմում եղել է Թուրքիան, այդքանով հանդերձ գնալ նրա հետ բարեկամության, ուղղակի անհեթեթություն է»,- ասաց նա։

Հարցին, թե արդյո՞ք կարելի է ենթադրել, որ փողոցային պայքարն իր արդյունքը չտվեց, Վազգեն Մանուկյանը պատասխանեց՝ ասելով, որ փողոցային պայքարը կարող է տևել մեկ ամիս, կարող է տևել մեկ տարի։

«Սա փողոցային երթերի ու հավաքների շարան է։ Հիմա Հայաստանում միաժամանակ երկու պրոցես է կատարվում՝ մի կողմից Նիկոլ Փաշինյանն ամրացնում է իր ադմինիստրատիվ ռեսուրսը, չեզոքացնում է բանակը, կաշառում է ոստիկաններին, օգտագործում է ԱԱԾ-ն, դատախազությունը, իսկ մյուս կողմից՝ կորցնում է ժողովրդի վստահությունը։ Ե՛վ պատերազմը, և՛ իր խայտառակ պահվածքը, և՛ սոցիալական դժվարությունները, որոնց առնչվում է ժողովուրդը, հանգեցրել են դրան»,- ասաց Վազգեն Մանուկյանը։

Հարցին, թե արդյո՞ք շարժման վարչապետի թեկնածուի փոփոխության հարց քննարկվել է, Վազգեն Մանուկյանը բացասական պատասխան տվեց։

«Ոչ, նման հարց չի քննարկվել։ Հաշվի առեք նաև, որ վարչապետի թեկնածուի վրա դրված է պարտականություն, որ ինքը մեկ տարի հետո այլևս չի մասնակցելու քաղաքական պրոցեսին և չի դառնալու վարչապետի թեկնածու։ Եթե կա մարդ, որ համաձայն է այդ պայմանին, և ես էլ տեսնեմ, որ նա ի վիճակի է եղած հարցերը լուծելու, ես խնդիր չունեմ»,- շեշտեց նա։

Ինչ վերաբերում է Լևոն Տեր-Պետրոսյանի առաջարկին, որ Նիկոլ Փաշինյանին անվտանգության երաշխիքներ տալով պետք է ուղարկել արտերկիր, ապա Վազգեն Մանուկյանը նշեց, որ այդ առաջարկը քննարկման արժանի է։

«Ինչ վերաբերում է ընտրությունների, ապա իսկապես, խայտառակ ընտրություններ են լինելու։ Այսպիսի պայմաններում երբեք ընտրության չեն գնում։ Այս իշխանությունը լեգիտիմ չէ, և եթե դրանով հանդերձ ընտրությունները գնում են նրա գլխավորությամբ, ապա դա սև բիծ է թողնելու մեր պատմության վրա։ Այս ընտրություններն՝ անկախ արդյունքից, ոչ մի պրոբլեմ չեն լուծելու»,- նկատեց նա։