2020-ի պատերազմում կրած պարտությունից հետո սահմանային լարվածությունը ՀՀ հատկապես Գեղարքունիքի և Սյունիքի հատվածներում շարունակվում է։ Այս ամենն առաջին հերթին այն բանի հետևանքն է, որ ՀՀ այսօրվա իշխանությունները պարտվելուց հետո համակերպվել են պարտվողական քաղաքականության հետ, և թուրքը հայտնվել է ՀՀ սահմաններում։ Այս մասին, այսօր՝ նոյեմբերի 16-ին, ԱԺ-ում հրավիրած մամուլի ասուլիսի ժամանակ հայտարարեց «Հայաստան» խմբակցության ղեկավար Սեյրան Օհանյանը։

«Հակառակորդը շարունակում է ճնշումները պարտված իշխանության վրա, որովհետև միջազգային փորձն է ցույց տալիս, որ իրականում պարտված իշխանությունները թե՛ հակառակորդի, թե՛ միջազգային հարթակում գտնվում են պարտադրանքի, թելադրանքի ներքո»,-ասաց նա՝ ընդգծելով, որ հակառակորդի հայատյաց հռետորաբանությունը շարունակվում է, և կոնկրետ գործողություններով փորձում են էլ ավելի խորությամբ հայտնվել ՀՀ սահմաններում։

«Դա ակնհայտ է հատկապես Սյունիքի հատվածում՝ Կապան-Գորիս ճանապարհին նոր մաքսակետերի, նոր իրադրության ձևավորմամբ, նաև Իշխանասարից մինչև Ջերմուկ ընկած տարածքում դիրքերի առաջխաղացմամբ։ Ըստ էության, այսօր Երևան-Գորիս մայրուղին գտնվում է ադրբեջանցիների կողմից վերահսկողության ներքո»,-ասաց նա։

Ըստ Օհանյանի՝ նոյեմբերի 9-ի և հունվարի 11-ի հայտարարությունները՝ ճանապարհների և ենթակառուցվածքների շրջափակման վերաբերյալ, Թուրքիայի և Ադրբեջանի համար մնում են որպես հիմք՝ «Զանգեզուրի միջանցքի» գաղափարն առաջ տանելու համար։ «Ճանապարհների ապաշրջափակումը բերելու է ՀՀ-ի և Արցախի՝ ավելի խորը շրջափակման, տնտեսական ճնշման, ժողովրդագրական պատկերի փոփոխության»,-ասաց նա՝ նշելով, թե այս ամենից ՀՀ իշխանությունները որևէ հետևություն չեն անում։

«Հայաստան» խմբակցության ղեկավարը մտահոգություն հայտնեց, որ ԱԺ-ն սահմանին վերաբերող կարևոր հարցերի քննարկում չի իրականացնում, մինչդեռ հակառակորդի կողմից սադրանքները շարունակվում են։

«Եթե այսօրվա իշխանություններին թվում է, թե վերջնական խաղաղություն ստորագրելուց հետո ադրբեջանցիների սադրանքները չեն շարունակվելու, ապա դա նրանց համար հերթական խաբկանքն է։ Այս իրավիճակում ՀՀ գործադիր և օրենսդիր իշխանությունները չեն կարևորում ՀՀ առջև դրված գերակա խնդիրները՝ հատկապես անվտանգության առումով։ Հանցագործության նման մի բան է ԱԺ-ում տարբեր ոլորտների տարբեր հարցեր քննարկելը, բայց ՀՀ առջև ծառացած անվտանգության խնդիրները չքննարկելը»,-ասաց նա՝ նշելով, թե քաղաքական մեծամասնությունը խոչընդոտեց ԱԺ խորհրդի արտահերթ նիստի կայացումը, որի ընթացքում Կառավարությունը պետք է պատասխաներ անվտանգային խնդիրներին առնչվող հարցերի։

Որևէ բան մեզ չի կաշկանդում մանդատները վայր դնել, հայտարարեց ԱԺ «Հայաստան» խմբակցության քարտուղար Արծվիկ Մինասյանը, անդրադառնալով մանդատները վայր դնելուն։

«Մենք մանդատներն օգտագործելու ենք բոլոր հնարավոր ելքերով, այդ թվում՝ բացահայտելով այս իշխանությունների ապօրինությունները, ազգադավ լինելը, իրականացնելու ենք այն բոլոր գործողությունները, որոնց հնարավորությունը տալիս է մանդատը՝ ՍԴ դիմել, ԱԺ-ում հարցեր պարտադրել և բազմաթիվ այլ բաներ։ Այո՛, նաև մանդատները դնելու հարցը մեր օրակարգից դուրս չի եկել, բայց դա կլինի այն ժամանակ, երբ մենք կտեսնենք, որ դրանով կհասնենք մեր վերջնական նպատակին՝ փոխել կապիտուլացված իշխանությանը, երկրում վերականգնել ազգային իշխանություն և ձևավորել սահմանադրական կարգ»,-հայտարարեց պատգամավորը։

Մինասյանը վստահեցրեց՝ «Հայաստան» խմբակցության 29 պատգամավորները, որոնցից 3-ը գտնվում են, իր խոսքով, ապօրինի կալանքի տակ, կաշկանդված չեն որևէ մանդատի կամ կարգավիճակի առկայությամբ։

Անդրադառնալով ԱԺ խորհրդի նիստի չկայանալուն՝ ընդդիմադիր խմբակցության ղեկավարը հայտարարեց․ «Այն, ինչ երեկ արեց ԱԺ ղեկավարությունը, ակնհայտ ապօրինություն է, որը ևս մեկ անգամ բացահայտում է այս իշխանության հակաօրինական, հակասահմանադրական, հակաազգային, հակապետական գործունեությունը»։

Ամեն օր մեր երկիրը կանգնում է խնդիրների առջև։ Վերջին մեկ շաբաթվա իրադարձությունները վերլուծելով մենք գալիս ենք նրան, որ պարտությունը, որը կրել ենք անցյալ տարի շարունակական բնույթ է կրում․ մամուլի ասուլիսի ժամանակ ասաց խմբակցության պատգամավոր Վահե Հակոբյանը։

«Մենք չսահմանափակվեցինք Գորիս-Կապան ճանպարհի կորցնելով , փակվեց Կապան-Ճակատեն ճանապարհը, և արդբեջանական զինուժը ավելի է խորանում ՀՀ սուվերեն տարածքում։ Մենք ունենք այլընտրանքային ճանապարհ Գորիս-Կապանին, որը խնդրահարույց է, իսկ Ճակատեն ճանապարհով մի շարք բնակավայրեր հայտնվել են բարդ կացության մեջ։ Կառավարությունը փոխանակ այս հարցերը լուծի, ինքը բեմադրություններ է անում, նախարար է հանում, նախարար նշանակում, ինչո՞ւ հանրությունը պատճառները չգիտի, և ի՞նչ կապ ունի Պապիկյանը ՊՆ-ի հետ»,-ասաց Հակոբյանը։

Մամուլի ասուլիսն ամբողջությամբ՝ տեսանյութում