Հայ Յեղափոխական Դաշնակցության 131-ամյակի կապակցությամբ «Սահմանդրական իրավունք» միության նախագահ Հայկ Բաբուխանյանը շնորհավորական ուղերձ է ուղղել ՀՅԴ Գերագույն Մարմնի ներկայացուցիչ Իշխան Սաղաթելյանին․

ՍԻՄ կուսակցության անունից ընդունեք իմ շնորհավորանքները ՀՅԴ 131-ամյակի կապակցությամբ: Մեր կուսակցությունները ունեն 30 տարիներից ավելի արդյունավետ համագործակցության փորձ: Սկսած 1988թ.-ից մինչ օրս ՍԻՄ-ը եւ ՀՅԴ-ն բազմիցս հանդես են եկել համատեղ: 1992թ.-ին մեր կուսակցությունները միավորվեցին Ազգային Դաշինքի մեջ, իսկ 1994թ. վերջից ՀՅԴ-ի դեմ Լ. Տեր-Պետրոսյանի սանձազերծած հետապնդումների ընթացքում ՍԻՄ-ը եւ իր պաշտոնաթերթ «Իրավունք»-ը բարձրացրեցին իրենց բողոքի ձայնը ՀՅԴ-ի եւ դաշնակցականների նկատմամբ զանգվածային համատարած բռնությունների դեմ: Ավելին, ՍԻՄ-ը հյուրընկալեց իր տարածքում ՀՅԴ-ին, երբ Ձեր կուսակցությանը ապօրինաբար զրկեցին գրասենյակից: Մեր կուսակցությունները միասին էին նաեւ 1996թ. նախագահական ընտրություններում, ստեղծելով 6 կուսակցությունների դաշինք եւ հանդես գալով մեկ թեկնածուով: Մեր համագործակցության պատմությունը լի է բազմաթիվ դրական դրվագներով:

Վերջին շրջանում` 2020-21թթ.-ին մեր կուսակցությունները ակտիվ համագործակցեցին 16 կուսակցությունների դաշինքում եւ «Հայրենիքի փրկության շարժման» շրջանակներում, ունենալով ընդհանուր նպատակ` ազատագրել մեր երկիրը օտարների կամակատարներից ու հայադավ տարրերից:

Ու, թեեւ, որոշ գաղափարական եւ քաղաքական հարցերի ու իրադարձությունների վերաբերյալ մեր կուսակցությունների տեսակետները տարբերվում են, սակայն դա երբեք չի վերածվել հակադրության կամ հակամարտության:

ՀՅԴ-ն ունի իր հսկայական լուման մեր երկրի պաշտպանության գործում, Հայաստանի երրորդ հանրապետության պետականաշինության մեջ եւ իր ուրույն հետագիծը ՀՀ-ում քաղաքական զարգացումներում:

Այսպիսով, շնորհավորում եմ Ձեր կուսակցության հոբելյանը հարազատական զգացմունքներով, մաղթելով հաջողություն, բեղուն գործունեություն, ազգային գաղափարախոսության հաղթանակ, մեր երկրի ապագայի վերաբերյալ բոլորիս երզանքների իրականացում: Անձամբ Ձեզ եւ բոլոր դաշնակցականներին մաղթում եմ առողջություն եւ երջանկություն:

ՍԻՄ լրատվական ծառայություն