Տապալելով Շուշիի հռչակագիրը դատապարտող բանաձև ընդունելու ՀՀ ԱԺ արտահերթ նիստը՝ քաղաքական մեծամասնությունը վավերացնում է այդ փաստաթուղթը և սպասարկում Ադրբեջանի ու Թուրքիայի շահերը․ ասաց ՀՅԴ Հայաստանի Գերագույն մարմնի ներկայացուցիչ, ԱԺ փոխնախագահ Իշխան Սաղաթելյանը ԱԺ-ում՝ լրագրողների հետ ճեպազրույցում։

«ՀՀ այն քաղաքացիները, ովքեր դեռ կասկածում էին, որ այս իշխանությունը որևէ կապ և առնչություն չունի Հայաստանի, Արցախի և հայ ժողովրդի շահերի հետ, սա ևս մեկ փաստ, որ տեսնեն ու համոզվեն»,-ասաց նա։

Իշխան Սաղաթելյանը հիշեցրեց, որ սա արդեն երկրորդ անգամն է, որ կարևորագույն հարցի հետ կապված քաղաքական մեծամասնությունը ձախողեց ԱԺ արտահերթ նիստը։ Ընդդիմության առաջին նախաձեռնությունը սահմանազատման և սահմանագծման առիթով էր, երբ քաղաքական մեծամասնությունը պատճառաբանեց, որ հայտարարության մեջ կան ներքաղաքական գնահատումներ, և այդ պատճառով իրենք չեն մասնակցում ԱԺ արտահերթ նիստին։

Երկրորդ հայտարարությունը վերաբերում էր 2021 թ-ի հունիսի 15-ին օկուպացված Շուշիում Ադրբեջանի և Թուրքիայի միջև կնքված ռազմաքաղաքական դաշինքը դատապարտող բանաձև ընդունելուն, որն ամբողջությամբ ուղղված է Հայաստանի Հանրապետության դեմ։ Այդ հռչակագիրը վավերացվել էր Ադրբեջանիև Թուրքիայի խորհրդարանների կողմից, նշեց Իշխան Սաղաթելյանը, և ՀՀ Ազգային ժողովն, իբրև առաջնային մանդատ ստացած պետական կառույց, պարտավոր էր իր վերաբերմունքն արտահայտել այդ հակահայկական փաստաթղթի վերաբերյալ։

« «Հայաստան» դաշինքը հանդես էր եկել հայտարարության տեքստով, որտեղ ընդամենը գրված էր, որ օկուպացված Շուշիում գրված փաստաթուղթը անընդունելի է մեզ համար։ Եվ քաղաքական մեծամասնությունը, առանց որևէ լուրջ փաստարկի բոյկոտեց նիստը, իսկ Արտաքին հարաբերությունների հանձնաժողովում բացասական եզրակացություն տվեց այս նախագծին»,-արձանագրեց Իշխան Սաղաթելյանը։

Մենք հիմա առաջնորդվում ենք Ադրբեջանի ցանկություններով, որը հայկական երկու պետությունների ոչնչացումն է․ ասաց ՀՅԴ Հայաստանի Գերագույն մարմնի ներկայացուցիչ, ԱԺ փոխնախագահ Իշխան Սաղաթելյանը՝ անդրադառնալով Իլհամ Ալիևի հայտարարությանը, որ Հայաստանը պետք է զորքը դուրս բերի Ղարաբաղից և ապահովի կապ Նախիջևանի և Ադրբեջանի միջև։

Լուծումը, նրա համոզմամբ, այս իշխանություններին հեռացնելն է՝ ուրիշ տարբերակ չկա։

Եթե սպասեն՝ հաջորդ ընտրությունների ժամանակ հեռացնելուն, Իշխան Սաղաթելյանի կարծիքով, արդեն Հայաստան չի լինի։

«Շատ ենք խոսել այդ մասին․ մենք պետք է վիժեցնենք և ձախողենք այս պարտվողական օրակարգը՝ Հայաստանը նոր պատերազմի և նոր կորուստների տանելու իրենց քաղաքականությունը»,-ասաց Իշխան Սաղաթելյանը։

Այս անելու համար, նրա համոզմամբ, պետք է կազմակերպել հասարակությանը և ձևավորել համազգային շարժում։

Մանրամասները՝ տեսանյութում․

https://youtu.be/s4Fb1-qKZgs