Այսօր, մարտի 10-ին ՀՅԴ Բյուրոյի գրասենյակում տեղի ունեցավ ՀՅԴ նորընտիր Բյուրոյի ներկայացուցիչ Հակոբ Տեր- Խաչատուրյանի և ՀՅԴ Բյուրոյի քաղաքական ներկայացուցիչ Արմեն Ռուստամյանի մամուլի ասուլիսը։

«ՀՅԴ 34-րդ ընդհանուր ժողովը գումարվեց այնպիսի շրջանում, երբ Հայաստանն ու Արցախը ճգնաժամ են ապրում։ Վերջին երեք տարիները մեր պատմության մեջ դժվարագույն տարիներն էին, մեծ մարտահրավերների առջեւ կանգնեց ամբողջ հայ ժողովուրդը»,- նշեց նորընտիր ՀՅԴ Բյուրոյի ներկայացուցիչ Հակոբ Տեր-Խաչատուրյանը:

«Այդ ցնցումը ստեղծեց հուսահատության ալիք, պարտվածի հոգեբանություն, որը պետք է թոթափել, ամեն գնով փակել այդ էջը եւ գնալ առաջ: Մեզ սպասվում են նույնքան դժվար, եթե ոչ ավելի, տարիներ, որոնք կարող են ճակատագրական լինել: Այդ առումով ՀՅԴ Ընդհանուր ժողովը նշեց, որ այս իշխանությունների վարած ապազգային քաղաքականությունը հանգեցրել ու հանգեցնում է հավելյալ պառակտումների, այդ պառակտումը տեղափոխվել է Սփյուռք, որը շատ ցավալի է:

Մենք պատրաստ ենք մեր բաժինն անելու եւ հայտարարել ենք, որ անհրաժեշտություն է համահայկական կառույցների, մեր երկու կաթողիկոսությունների հետ ստեղծել այնպիսի ֆորում, որ նաեւ նպաստի սփյուռքի ամրապնդմանը, հիասթափության մթնոլորտը ցրելուն»,-ասաց նա:

Հակոբ Տեր-Խաչատուրյանն անդրադարձավ թուրք-ադրբեջանական խնդրին։

«Թուրքիան իրականացրել է իր երազանքների մի մասը՝ թափանցել Հարավային Կովկաս: Հիմա Թուրքիայի ախորժակը սրվել է և այս ֆոնին Հայաստան-Թուրքիա հարաբերությունների կարգավորման հարցին պետք է մոտենալ չափազանց զգուշավորությամբ, որովհետև այդ մոտեցումները երբեք չպետք է խանգարեն և ի վնաս լինեն մեր համահայկական շահերին՝ անտեսելով հայ ժողովրդի անժամանցելի պահանջատիրական իրավունքները, ինչպես նաև Հայաստանի ու Արցախի անվտանգությունն տարածքային ամբողջականությունը»,-ասաց նա:

Նա ընդգծեց, որ ՀՅԴ-ն անհրաժեշտ է համարում պայքարի նոր մոտեցումների, նոր ձևերի առաջացումը. «Մենք մեր միջոցների արդիականացման խնդիր ունենք, և այդ ուղղությամբ աշխատելու ենք աշխարհով մեկ»:

Այսօրվա իշխանությունները հանդես չեն գալիս որպես Արցախի եւ արցախահայության անվտանգության երաշխավոր: Սա շատ ցավալի երեւույթ է, որովհետեւ անցյալում միշտ շեշտել ենք, որ այդ երաշխավորությունը պետք է տա Հայաստանը: Նույնիսկ նշել ենք, որ եթե անկախության ճանաչման ընթացքը չկարողանա ամբողջականացնել Հայաստանը, պետք է նվազագույնը ունենա ռազմաքաղաքական դաշինք Արցախի հետ: Այսօր իշխանությունները երբեմն նույնիսկ խուսափում են այդ հարցից, խուսափում են նույնիսկ Հայ դատի հետապնդումից՝ փորձելով այդ պատասխանատվությունը դնել միայն Սփյուռքի ուսերին»,-ասաց Տեր-Խաչատուրյանը:

Երբ խոսում ենք մեր տարածաշրջան Արևմուտքի ներթափանցման մասին որպես ազդակ, այդ ազդակը նշանակում է Թուրքիայի ավելի ներքաշում տարածաշրջան, որը մեզ համար մերժելի է․ ասաց Հակոբ Տեր-Խաչատուրյանը։

«Ադրբեջանն էլ երկակի խաղ է խաղում․ բնական է, որ Ռուսաստանը չի ուզում կորցնել Ադրբեջանը, բայց նաև ակնհայտ է, որ նա ուղղակի կապի մեջ է Ուկրաինայի իշխանությունների հետ, և փոխադարձաբար Ուկրաինայի իշխանությունները Արցախյան պատերազմի ժամանակ զինամթերք են հասցրել Ադրբեջան։ Այս պատճառով պետք է զգուշավորությամբ մոտենալ այս խնդրին, որովհետև ինչ էլ լինի ելքը՝ անպայմանորեն ունենալու է իր ազդեցությունը տարածաշրջանի վրա»,-ասաց Հակոբ Տեր-Խաչատուրյանը։

Անդրադառնալով ներքաղաքական զարգացումներին՝ նա ասաց, որ ՀՅԴ-ի գործունեությունը չի սահմանափակվում օրենսդրական նախաձեռնություններով։

«Դուք լավ գիտեք, որ Ընդհանուր ժողովի նախօրեին փետրվարի 26-27-ին համահայկական ընդգրկմամբ ցույցեր տեղի ունեցան Սփյուռքի մեջ։ Դա կապվեց Հայաստան-Թուրքիա հարաբերությունների, Սումգայիթի ջարդի և Արցախյան գոյամարտի հետ։ Սա եղավ 12 երկրներում։ Կասկած չկա, որ այսօր իրողությունները մի քիչ տարբեր են, որովհետև պարտվողական հոգեբանության մեջ է ընկել մեր ժողովուրդը Արցախյան պատերազմից հետո, և սա է մեծագույն հարցը, որ այս իշխանությունները բանակցում են, երբ որ պարտված կողմ են։ Այն դեպքում, որ մենք ունեինք անխոցելիության զգացում, երբ հաղթող կողմ էինք։ Այսօր այդ հոգեբանական կամուրջը պետք է անցնենք, որ վերականգնենք մեր անժամանցելի իրավունքները»,-ասաց ՀՅԴ Բյուրոյի ներկայացուցիչը։

34-րդ ժողովը կմնա մեր պատմության մեջ ոչ միայն որպես Ընդհանուր ժողով, այլ նաև Արտակարգ ժողով, որովհետև գումարվում էր աննախադեպ սրված և լարված իրավիճակում․ իր խոսքում նշեց Արմեն Ռուստամյանը։

«Հայաստանին և հայությանը սպառնացող վտանգներն այն աստիճանի ծանր են և ծավալն այնքան է մեծացած, որ այստեղ իսկապես խոսքը մեր լինելիության հետ կապված հարցերի առումով մեր գործողությունների մասին է»,-ասաց նա։

Արմեն Ռուստամյանը նշեց, որ Դաշնակցությունը, իր առաքելությանը համապատասխան, լինելով այն բաց ներվը զգացող կուսակցությունը, թե որտեղից են գալիս մեր հիմնական վտանգները, հստակ արձանագրում է, որ իրականում մենք կանգնած ենք շատ օրհասական խնդիրների լուծման հրամայականի առջև։

Մենք ունենք թե՛ ներքին, թե՛ արտաքին լրջագույն վտանգներ, ասաց նա, և, բնականաբար, խնդիր ունենք թույլ չտալու, առնվազն կասեցնելու այնպիսի զիջումները, որոնք կենսական նշանակություն կունենան մեր ապագայի համար։

«Զիջումների «կարմիր գծերը» չարձանագրելու պարագայում մենք իսկապես Արցախը և Հայաստանը կորցնելու վտանգի առջև ենք․ սա չափազանցություն չէ, սա իրական վիճակի վերլուծություն է»,-ասաց Արմեն Ռուստամյանը։

Ակնհայտ է, որ Ադրբեջանի ցանկությունը Արցախն է առանց հայերի, և ամեն ինչ անելու են, որ արցախահայությունը, անելանելիության մեջ հայտնվելով, այդ տարածքները լքի․ լարվածությունը դրա դրսևորումն է և սա պետք է ահազանգ հանդիսանա ասաց Արմեն Ռուստամյանը։

«Բայց ես այսօր լսում եմ վարչապետի խոսքերը, որը խնդրին անդրադառնում է հպանցիկ, ասում է՝ չեմ ուզում գնահատական տալ։ Այսինքն, ինչո՞ւ չպիտի գնահատվի, ինչո՞ւ չպիտի ահազանգ հնչեցվի, ինչո՞ւ չպիտի ասվի, որ դրա դեմն առնելու համար ամեն ինչի պատրաստ են։ Այսինքն, այս կրավորական պահվածքը, հանուն խաղաղության ամեն ինչ զիջեու պատրաստակամությունը բերելու է նրան, որ մենք լինել-չլինելու խնդրի առջև ենք հայտնվելու»,-ասաց Արմեն Ռուստամյանը։

Նրա համար ակնհայտ է, որ թուրք-ադրբեջանական տանդեմը փորձում է ամեն ինչ անել, որ ռուս-ուկրաինական պատերազմի արդյունքներից ստանա առավելագույնը։

«Եվ քանի դեռ Հայաստանը չի վերագտել իր մարտունակությունը, իր անվտանգային համակարգերը չի ամրապնդել, այո՛, մենք ամեն օր ականատեսն ենք լինելու նրան, որ կեղծ են այդ բոլոր ցանկությունները՝ խաղաղություն հաստատել, համագործակցության դաշտ առաջացնել, ո՛չ, նրանք ինչ հնարավոր է «պոկեն» մեզնից՝ անելու են»,-ասաց նա։

Արմեն Ռուստամյանը նշեց, որ այսօր հիմնական ուժը, որ այստեղ ապահովում է խաղաղություն՝ ռուսական խաղաղապահ ուժերն են։

«Վատ է, իհարկե, որ Հայաստանն այլևս չի հանդիսանում Արցախի և արցախահայության անվտանգության երաշխավորը․ սա տեսնում են նաև մեր հարևանները, տեսնում են, որ այդ ուղղությամբ որևէ քայլ Հայաստանը չի կատարում՝ վերագտնելու անվտանգության երաշխավորի իր կարգավիճակը, և դրանից բխող քայլեր չի կատարում, և համարում է, որ այսօր հնարավոր է ևս մի տարածք վերցնել՝ աշխարհաքաղաքական իր խնդիրները լուծելու, արցախահայությանը անելանելի վիճակում դնելու, որ օր առաջ լքեն այդ տարածքները»,-ասաց Արմեն Ռուստամյանը։

Նշենք, որ փետրվարի 28-ից մարտի 8-ը Հայաստանում տեղի է ունեցել ՀՅԴ 34-րդ Ընդհանուր ժողովը, որն ընտրել է նոր բարձրագույն մարմին՝ Բյուրո։ Աշխարհի շուրջ 30 երկրներից ժամանած 100 պատվիրակներ քննարկել և արժևորել են համահայկական կառույցի հաշվետու ժամանակաշրջանի գործունեությունը, ուղենշել ՀՅԴ առաջիկա քառամյակի ռազմավարությունը՝ որդեգրելով քաղաքական գործունեության առաջնահերթություններն ու հիմնական ուղղությունները։ ՀՅԴ 34-րդ Ընդհանուր ժողովը հրապարակել է Հայտարարություն։

Ասուլիսն ամբողջությամբ՝ տեսանյութում

https://youtu.be/NMxEr2C3ZHE