-Նախ` մենք սխալներին լուռ չենք հետևել։ Չկան հարցեր, որոնց պատասխանները մենք չունենանք։ Քարոզարշավի ընթացքում տեղի ունեցած հանդիպումների, քննարկումների ժամանակ մեկ անգամ ևս անդրադարձել ենք այդ հարցերին։ Պետք է նշեմ, որ երբ նման հարցադրումներ են հնչել, պատասխանները եղել են համոզիչ։ Ամեն դեպքում, այս ընթացքում որևէ դեպք չի եղել, որ ՀՅԴ-ի հանդեպ անբարեհաճ վերաբերմունք ցուցաբերվի։ Բնական է, որ կլինեն հարցադրումներ, որոնք իրենց պատասխաններն ունեն։

-ՀՀԿ-ի քարոզարշավը հիմնականում կառուցված է անվտանգության, ղարաբաղյան հիմնախնդրի դրույթի վրա։ ՀՅԴ-ի համար ո՞րն է խորհրդարանում հայտնվելու առաջնային խնդիրը։

-Մեր առաջնային խնդիրը նախկին իշխանությունների ժամանակ թույլ տված սխալների կանխումն է։ Խոսքը վերաբերում է քաղաքական մենիշխանության պահպանման, ազգային ներուժի պառակտման և դիմագծից շեղումներին։

-Այսինքն, այսօրվա իշխանությունները ևս ձգտում են մենիշխանությունը պահպանե՞լ։

-Դա ակնհայտ է։ Եթե նախընթաց ժամանակահատվածում բացասական երևույթների խորքային պատճառները վերլուծենք, կարձանագրենք, որ իրականում Հայաստանում մեծ վտանգ է ներկայացնում մենիշխանությունը, ինչն իր հերթին բերել է տնտեսական մոնոպոլիայի, որից ժողովուրդը միշտ դժգոհ է եղել։ Այս իսկ պատճառով շատ կարևոր է, որ հակակշիռների և զսպումների մեխանիզմներ ստեղծվեն իշխանություն-ընդդիմություն միասնական համակարգի շրջանակներում։ Մեր մյուս մտահոգությունը բարիկադների ստեղծումն է, ներսում թշնամիների, դավադրությունների փնտրտուքն է, պիտակավորումները, որոնք ցանկալի չեն և օր առաջ պետք է ձերբազատվել այդ ամենից։ Պետք է բացառել այս բոլոր երևույթները, որոնք ազգային ներուժի պառակտմանն են միտված։

-Քարոզարշավի այս օրերին ո՞րն է Դաշնակցության համար ամենաանընդունելին, ի՞նչն է ձեզ նյարդայնացնում ամենից շատ։

-Աշխատում ենք շատ չնյարդայնանալ։ Բացասական երևույթներին հարկ եղած դեպքում արձագանքում ենք։ Քարոզարշավի ժամանակ նյարդայնանալը լավ տեղ չի տանի, սառը դատողությամբ պետք է առաջ շարժվել։

-Եթե դաշնակցությանը չհաջողվի անցողիկ շեմը հաղթահարել, ինչպե՞ս եք ձեր մտահոգությունները տեղ հասցնելու։

-«Եթե»-ներով հարցերին պատասխանելուց ձեռնպահ կմնամ, որովհետև, մեր գնահատմամբ, նվազագույն շեմը հաղթահարելու խնդիր չենք ունենա։

-Ի՞նչ հիմք ունեք նման վստահության համար։

-Մեր կազմակերպական կառույցը, մեր շփումները, մեր տեսակետները, գաղափարները, որոնք ընդունելի են ընտրողների զգալի հատվածի կողմից։

Զրուցեց Ռուզան ԽԱՉԱՏՐՅԱՆԸ

iartes.am