Ադրբեջանցիները հերթական փորձն են իրականացնում քաղաքական, ռազմական, բարոյական, հոգեբանական ճնշում գործադրելու Արցախի ժողովրդի նկատմամբ, որպեսզի արցախցիները համակերպվեն պարտության հետ. այսօր խորհրդարանական ճեպազրույցների ժամանակ ասաց ՀՅԴ անդամ, «Հայաստան» խմբակցության պատգամավոր Արթուր Խաչատրյանն՝ անդրադառնալով ադրբեջանցի բնապահպանների կողմից Ստեփանակերտ-Գորիս մայրուղին փակելու մասին։

«Կարծում եմ՝ նրանք արցախցիներին լավ չեն ճանաչում, այս 30 տարվա պարտությունն իրենց դաս չեղավ։ Բայցևայնպես, որպեսզի կարողանանք պահել Արցախը, ՀՀ-ն չի կարող նման կրավորական մոտեցում ցուցաբերել. կարծես խոսքը Կոնգոյի Հանրապետության և Կոնգոյի Դեմոկրատական Հանրապետության միջև հարաբերությունների մասին է, այլ ոչ թե՝ Արցախի Հանրապետության և ադրբեջանական ագրեսորների։ Ասում են՝ տերովին տերն է տարել, անտերին՝ գելը։ Մենք չենք կարող մեր հայրենակիցներին թողնել միայնակ Ադրբեջանի դեմ», – ասաց պատգամավորը։

Նրա խոսքով՝ եթե ՀՀ իշխանությունները հույսը դնում են բացառապես ռուս խաղաղապահների վրա, ապա պետք է հասկանան ստեղծված իրավիճակը.

«Եթե ՀԱՊԿ-ը, որի անվտանգային համակարգի անդամ ենք մենք, առաջարկում է ռազմատեխնիկական աջակցություն, չպետք է կամակոր երեխայի նման ոտքերը խփել գետնին և ասել, թե չէ՛, մենք քաղաքական հայտարարություն ենք ուզում»։

Հարցին, թե ի՞նչ պետք է անի այս իրավիճակում Հայաստանի իշխանությունը՝ ընդդիմադիր պատգամավորը պատասխանեց.

«Իսկ ինչ էր արել ՀՀ իշխանությունն այն ժամանակ, երբ առաջին նման դեպքը եղավ։ Եթե ՀՀ իշխանությունները մի քիչ ակտիվ լինեին, դիմեին միջազգային հանրությանը, պահանջեին ճնշում բանացնել Ադրբեջանի վրա, երկրորդ դեպքը չէր լինի: Թե Հայաստանի իշխանությունները մի քիչ ակտիվ լինեին, դիմեին միջազգային հանրությանը, պահանջեին ճնշում բանեցնել Ադրբեջանի վրա, այս երկրորդ կրկնողությունը չէր լինի, և սա էլ, վստահեցնում եմ, երկրորդը և վերջինը չի լինելու։ Հիմա Արցախում ավելի ցուրտ է քան՝ Երևանում, այս իշխանությունները գիետին, իրենք էին ստորագրել, որ նոր ճանապարհ պետք է լինի, որով Հայաստանը պետք է միացվեր Արցախին, ճանապարհը միայն ավտոմոբիլային ճանապարհ չէր, այդ ճանապարհով էր անցնում գազը, հոսանքը, ինտերնետը։ Ի՞նչ են արել, որ դա անցներ նոր ճանաապրհով։ Չեն արել որևէ բան, հիմա ասում եք, իսկ ինչ պետք է անեին։ Պետք էր կանխատեսել թշնամու գործողությունները, պետք է հասկանալ, որ ինչքան հետ ես գնում, դրանով չես փակում նրա ախորժակը, հակառակը՝ ավելի ես գրգռում։ Ինչ-որ անում են, եթե անեն դրա 180 աստիճանով հակառակը, ավելի լավ կլինի»,- նշեց ընդդիմադիր գործիչը։

Նրա խոսքով՝ փաստ է, որ արցախցիները բռունցքվել են, պատ են կազմել, և չեն թողել մտնել, և ադրբեջանցիները հետ են գնացել․ «Եթե դուք Երևանից գնաք Ստեփանակերտ, ճանապարհին կտեսնեք նաև ադրբեջանական պետհամարանիշներով մեքենաներ։ Պետք է այնպես անել, որ ադրբեջանցիների մուտքը դեպի Արցախ սահմանափակվի։ Ռուս խաղապահների մանդատը նոյեմբերի 9-ի համաձայնությունների պահպանումն է, որտեղ չկա որևէ բառ, որ քաղաքացիական անձը, որը իրենից վտանգ է ներկայացնում, մեքենան կանգնեցրել և իջել է։ Այսինքն , երբ ստորագրվել էր այդ փաստաթուղթը, Նիկոլ Փաշինյանը այդ հարցը քննարկե՞լ է Ադրբեջանի հետ, երեք կողմերով քննարկել են, թե ոչ, եթե չեն քննարկել, և նման արգելք չկա, ապա հիմա ինչի մասին խոսենք»,- ասաց նա»։