Համազգային հայ կրթական և մշակութային միությունը’ ՇԻՐՎԱՆՅԱՆ երիտասարդական կենտրոնի դահլիճում, Համազգայինի 95- ամյակի շրջանակներում, անցկացրեց հայ գրականության երևելիներից մեկի՝ Ռազմիկ Դավոյանի «ՌԵՔՎԻԵՄ» ստեղծագործության վերջին’ ամբողջական տպագրությամբ գրքի շնորհանդեսը։

Միջոցառմանը տասնյակ հյուրերի կողքին ներկա էին գրողի հարազատները, ընկերներն ու պարզապես նրանք, ովքեր գեթ մեկ անգամ շփվել էին գրողի հետ։

Տոնական միջոցառման բացումն ազդարարեց սոպրանո Լեոնորան’ Կոմիտասի «Կռունկ» երգով։

Ողջույնի խոսքով հանդես եկան Համազգայինի կենտրոնական վարչության անդամ, Հայաստանի պատասխանատու Արտաշես Շահբազյանը, Երևանի գրասենյակի պատասխանատու Ռուզան Առաքելյանը, գրքի կազմող-հրատարակիչ, Արմենուհի Դավոյանը։ «Ռեքվիեմ» պոեմի մասին գրականագիտական վերլուծական խոսքով հանդես եկավ բանասիրական գիտությունների թեկնածու, դոցենտ Կարինե Մարտիրոսյանը։

Գրքին անդրադարձան Հայաստանի գրողների միության Շիրակի մարզային բաժանմունքի նախագահ, բանաստեղծ Անդրանիկ Կարապետյանը, բանաստեղծուհիներ Ռոզա Հովհաննիսյանը, Լուսինե Աղաջանյանը, գրող-ազատամարտիկ Ռաֆիկ Ղազինյանը, բանասեր Լուսինե Գինոսյանը։

Պահի ոգևորությունը փոխանցվեց նաև հանդիսատեսին, ու հյուրերից մեկը՝ Գոհար Հովհաննիսյանը, ցանկություն հայտնեց ընթերցելու գրքից մեկ հատված։

Միջոցառումն իրենց գեղեցիկ ասմունքով զարդարեցին Գյումրու երիտասարդական պալատի կամավոր, «Մտորումների թատրոնի» սան Ռուզաննա Մաջունջյանը, ՀԵՄ անդամ Վերոնիկա Բեգլարյանը, Գյումրու թիվ 1 դպրոցի սան Մարիամ Հովհաննիսյանը։

Ռազմիկ Դավոյանն այն անհատականությունն է, ում ջանքերով Համազգային հայ կրթական և մշակութային միությունը արմատներ գցեց նաև Հայաստանի սահմաններից ներս և շուրջ 30 տարի ոչ միայն գործուն դերակատարություն ունեցավ, այլև ընդլայնեց աշխարհագրությունը’ հասնելով Գյումրի։ Եվ ահա այսօր Գյումրու օդը լցվեց գրող Ռազմիկ Դավոյանի շնչով, և հուզմունքի ու ուրախության երկունքից ծնվեց հիշողությունը գրողի և իր գրական ժառանգության ծիրից ներս։

Արա Նախշքարյան
2023 թվական, հուլիս 2, Գյումրի

https://youtu.be/kVFRiLtL6-A