Այսօր՝ հոկտեմբերի 5-ին ՀՀ ԱԺ «Հայաստան» խմբակցության պատգամավորներ Լիլիթ Գալստյանը եւ Արթուր Խաչատրյանը հանդես եկան մամուլի ասուլիսով։

Նրանք ամփոփեցին անցած քառօրյայի աշխատանքները և պատասխանեցին լրագրողների հարցերին:

Արթուր Խաչատրյանը հիշեցրեց, որ ադրբեջանական ագրեսիայի օրերին Փաշինյանը հայտարարեց, որ ինքը պատրաստ է ինչ-որ թուղթ ստորագրել։

«Դրան նախորդել էր ՀՀ իշխանությունների ինչ-որ ազդանշանը Ադրբեջանին, որ իրենք որևէ կերպ չեն միջամտելու ադրբեջանական ագրեսիայից հայ ժողովրդին օգնելու հարցում, այսինքն՝ արցախցիներին թողնելու են ադրբեջանցիների բզկտմանը։

Դա նշանակում է՝ Արցախը կտանք հանուն ինչ-որ թղթի։ Հավանաբար, հույս ունեին, որ Ադրբեջանը իր արյան ծարավը կհագեցնի միայն Արցախով, բայց երեկվա Ալիևի դեմարշը նշանակում է, որ իրենք միայն Արցախով չեն բավարարվելու և լրացուցիչ պահանջ են ներկայացրել ՀՀ իշխանություններին, ճիշտ այն, ինչի մասին մենք տարիներ ի վեր զգուշացնում ենք, որ միայն Արցախը խժռելով Ադրբեջանը չի բավարարվելու։ Ամենայն հավանականությամբ, առաջնային պահանջը եղել է, այսպես կոչված, անկլավները, որի «լեգիտիմությունը» Ադրբեջանին տվել է Փաշինյանը՝ ասելով, որ այդ անկլավները կան, փողոցներում հրապարակվեցին քարտեզները, նկարները», – ասաց պատգամավորը։

Իրենք անընդհատ հղում են անում Ալմա Ալթային հռչակագրին, որ դա է Հայաստանի կադաստրի վկայականը, դրանով է Հայաստանի Սահմանները որոշվում: Այդ հղումն անելուց որևէ երկիր ասե՞լ է՝ Ադրբեջան դուրս արի Հայաստանի տարածքից: Փաշինյանն էլ է հասկանում, որ դա ուղղակի խաղալիք է, բլեֆ, որ այստեղ մարդկանց խաբի»,- ասաց Արթուր Խաչատրյանը :

Լիլիթ Գալստյանի խոսքով՝ 21-րդ դարում հայոց պետականության պայմաններում ցեղասպանվելը խարան է:

Նրա խոսքով՝ Նիկոլ Փաշինյանը մեղսակից և հանցակից է և քաղաքական պատասխանատվություն է կրում ցեղասպանության համար։

«Երբ դու իջեցնում ես նշաձողը և երբ Պրահայում հայտարարում ես Ադրեջանի տարածքային ամբողջականության ճանաչման մասին, միջազգային հանրությունից չունենալով Արցախի բնակչության անվտանգության որևէ երաշխիք և մեխանիզմ, աներկբա է՝ դու այդ ցեղասպանության մեղսակիցն ես»,- ասաց Լիլիթ Գալստյանը։

ՀՀ-ն, ի դեմս Նիկոլ Փաշինյանի, հնարավորություն ուներ մի շարք միջազգային հարթակներում բարձրացնելու այն հարցը, որ Ադրբեջանը ռազմական հանցագործ է․ հայտարարեց նա:

Ըստ Լիլիթ Գալստյանի՝ այն ողբերգությունը, ինչին բախվեց Հայաստանը, մեկ պատասխանատու ունի՝ օրվա քաղաքական իշխանությունը, իր զրոյական կետից սկսած բանակցային գործընթացով, արտաքին հարաբերություններով և ներքին պառակտումներով։

Մանրամասները՝ տեսանյութում