Կայացավ Պարույր Սևակի «100 բանաստեղծություն» ժողովածուի շնորհանդեսը
18 Հունվար 2024Համազգային հայ կրթական և Մշակութային միության Երեւանի գրասենյակի նախաձեռնությամբ ու Պարույր Սեւակի տուն-թանգարանի հետ համագործակցությամբ օրերս լույս է տեսել Պարույր Սևակի «100 բանաստեղծություն» ժողովածուն՝ նվիրված մեծ գրողի ծննդյան 100-ամյակին։ Գիրքը կազմել է գրողի որդին՝ գրականագետ Արմեն Ղազարյանը։ Ժողովածուի տպագրությունը հովանավորել է Համազգայինի Կենտրոնական Վարչությունը։
Հունվարի 17-ին Ավետիք Իսահակյանի տուն-թանգարանում կայացավ գրքի շնորհանդեսը։
Միջոցառմանը բացման խոսքով հանդես եկավ Համազգայինի Կենտրոնական Վարչության ատենապետ Զաքար Քեշիշյանը։ Նա անդրադարձավ Պարույր Սևակի թողած արժեքավոր գրական ժառանգությանը’ նշելով, որ Սևակն այն եզակիներից է, ում խոսքը բոլոր սերունդների և բոլոր ժամանակների համար է։ Զաքար Քեշիշյանը Կենտրոնական Վարչության անունից շնորհավորեց ներկաներին’ գրքի լույս ընծայման և մեծ գրողի ծննդյան 100-ամյակի առթիվ։
Ցերեկույթի ելույթները ջերմ էին ու անմիջական։ Պարույր Սևակ գրողի կյանքին ու ստեղծագործական ուղուն անդրադարձան գրականագետ, բանասիրական գիտությունների դոկտոր, պրոֆեսոր Դավիթ Գասպարյանը, Համազգայինի ԿՎ անդամ Արտաշես Շահբազյանը, ԱրՊՀ հայ բանասիրության ֆակուլտետի դեկան Արշալույս Գալստյանը, բանաստեղծ Խաչիկ Մանուկյանը։ Հայաստանի գրողների միության անունից խոսք ասաց ՀՀ ԳՄ քարտուղար Նորեկ Գասպարյանը։
Պապի կյանքի ու ստեղծագործական գործունեության մասին հետաքրքիր մանրամասներ ներկայացրեց թոռը’ գրականագետ, Պարույր Սևակի տուն֊թանգարանի տնօրեն Սևակ Ղազարյանը։
Գրական միջոցառումն ամբողջացավ Սևակի ստեղծագործությունների ընթերցանությամբ, որոնք ներկայացրին ՀՀ վաստակավոր դերասան Դավիթ Հակոբյանը և ասմունքող Գայանե Սամվելյանը։ Հնչեցին Սևակի բանաստեղծությունների հիման վրա գրված երգեր։
Ներկաները նվեր ստացան Պարույր Սևակի «100 բանաստեղծություն» ժողովածուն: Միջոցառման ավարտին կազմակերպվեց նաեւ համեստ հյուրասիրություն: