Այսօր՝ մարտի 21-ին ՀՀ ԱԺ «Հայաստան» խմբակցության պատգամավորներ Սեյրան Օհանյանը եւ Լիլիթ Գալստյանը հանդես են եկել մամուլի ասուլիսով։

Նրանք ամփոփել են խորհրդարանական շաբաթն ու պատասխանել լրագրողների հարցերին:

«Առանց վերջնական համաձայնության և փոխադարձության սկզբունքի պահպանման, հատվածական սահմանազատումն ու սահմանագծումը ամբողջությամբ բխում է Ադրբեջանի շահերից»,- հայտարարեց «Հայաստան» խմբակցության ղեկավար Սեյրան Օհանյանը։

Նրա խոսքով, հատվածական սահմանազատման, հատկապես Տավուշի մարզից սկսելը, հանգեցնելու է ՀՀ ամենանախապատրաստված առաջնագծի հնարավորությունների նվազեցմանը և այդ հատվածում հավելյալ վտանգներ են առաջանալու։

«Ռազմավարական նշանակություն ունեցող այդ ճանապարհատվածի նկատմամբ վերահսկողությունը Ադրբեջանի կողմից բազմապատկելու է Հայաստանի անվտանգության սպառնալիքները։

Մտահոգության համար հիմք են հանդիսանում այն, որ սահմանազատում և սահմանագծում գործընթացի իրականացման համար նախապայմաններ չկան և այդ ընթացակարգերը խախտվում են, քանի որ չկա Ադրբեջանի հետո որևէ համաձայնագիր»,- ասաց Սեյրան Օհանյանը։

Նա ընդգծեց, որ այս գործընթացն անօրինական է, ընթացակարգերի խախտում է, ինչը «հանցագործություն է, դավաճանական պահվածք է սեփական ժողովրդի նկատմամբ»։

«Այս գործընթացի մեջ ներառված մարդիկ պետք է պատասխանատվություն կրեն։ Կարծում եմ՝ Հայաստանում սահմանամերձ բնակավայրերի բնակիչները, նույն բանակում կան խելացի մարդիկ, որոնք այս անօրինական գործընթացից կարող են հրաժարվեն։ Ոչ թե պաշտպանությունից պետք է հրաժարվել, այլ անօրինական տրվող հրամաններից հետ կանգնել»,- ասաց Սեյրան Օհանյանը։

Ասուլիսի ժամանակ Լիլիթ Գալստյանը հայտարարեց՝ դավաճանական պահվածքի մեկ այլ դրսևորման ականատես ենք լինում՝ ՀՀ բարձր ղեկավարությունը տեսակետ է հայտնում միջազգային դատական ատյաններում ՀՀ-ի կողմից դատական հայցերը հետ քաշելու մտադրության մասին։

Նրա խոսքով, սա, ըստ էության, դարձյալ ադրբեջանա-թուրքական պահանջի միակողմանի դրսևորում է։

Լիլիթ Գալստյանը հայտնեց, որ ՀՀ-ն 5 հայցեր ունի ՄԻԵԴ-ում և ՄԱԿ-ի արդարադատության դատարանում։

«Այդ հայցերը վերաբերում են մեր անօտարելի իրավունքներին՝ Արցախի վերադարձին, մշակութային ժառանագության պաշտպանության իրավունքին, գույքային իրավունքին, այսինքն վերաբերում է Արցախի ամբողջական իրավունքներին։ Հայցերը հետ քաշելու պարագայում, ըստ էության, Հայաստանը լեգիտիմացնելու է ագրեսիայի, պատերազմի, ավելի կոնկրետ՝ Հայաստանն այդ հայցերը ետ քաշելով, կլեգիտիմացնի Ադրբեջանի՝ ցեղասպանության ճանապարհով հարցերը լուծված համարելու խնդիրը, Հայաստանի իշխանություններն այդպիսով կդառնան ցեղասպանության հանցակիցը։

Այս ամբողջ համալիրում ամենավտանագավորն այն է, որ, ըստ էության, մենք փակում ենք Արցախի վերադարձի իրավունքը»,-ասաց նա։

Մանրամասները՝ տեսանյութում

https://youtu.be/HiwCmnsm6RA