Այսօր՝ մայիսի 23-ին ՀՀ ԱԺ «Հայաստան» խմբակցության պատգամավորներ Սեյրան Օհանյանը եւ Գառնիկ Դանիելյանը հանդես են եկել մամուլի ասուլիսով։

Նրանք ամփոփել են խորհրդարանական շաբաթն ու պատասխանել լրագրողների հարցերին:

ՔՊ պատգամավոր, գործարար Խաչատուր Սուքիասյանի արարքին իրավական գնահատական կտրվի և համապատասխան գործընթաց կսկսվի. հայտարարել է «Հայաստան» խմբակցության ղեկավար Սեյրան Օհանյանը։

«Այդ տիպի ելույթները սպառնալիքներ են և քրեական օրենսգրքի համապատասխան կետերով համապատասխան տարրեր են պարունակում։ Պարոն Սուքիասյանը մոռանում է, որ ինքը չի կարող մեզ վախեցնել, մոռանում է, որ այսօրվա իրավիճակը ստեղծվել է իրենց իշխանության օրոք և իրենք քրեական օրենսդրության համապատասխան՝ պատասխան պետք է տան այն դավաճանությունների համար, որով իրենք Արցախը և ՀՀ-ն հասցրել են այս վիճակին»,-ասել է Օհանյանը։

«Տավուշը հանուն հայրենիքի» շարժումը օրինական շարժում է, որը պաշտպանելու է ՀՀ քաղաքացիների և ՀՀ շահերը, և մենք մեր աջակցությամբ պետք է այն անշրջելի դարձնենք. ասել է Սեյրան Օհանյանը։

Ըստ Օհանյանի՝ սահմանազատման և սահմանագծման գործընթացն ընթացակարգերի խախտմամբ է իրականացվում և միակողմանի զիջում է։

«Եթե կա հակամարտություն և ձգտում ենք խաղաղության, ապա դրանք երկկողմ պետք է լինեն։ Պետք է սահմանվեն համապատասխան ընթացակարգեր և հետևեն դրանց։ Այսինքն՝ լինի երկու երկրների միջև համաձայնագիր, քարտեզները ճշգրտվեն, դրանից հետո նոր սահմանագծման գործընթացն իրականացվի։ ՀՀ-ի և Ադրբեջանի միջև իրականացվող գործընթացները հատվածական են և չեն համապատասխանում իրականությանը. այս ամենը հետևից են սկսում իրականացնել»,-ասել նա։

Սեյրան Օհանյանը նշեց, որ գործընթացները ցույց են տալիս՝ Ադրբեջանն իրականացնում է այն, ինչ իր շահերից է բխում։ «Մի դեպքում Տավուշի հատվածում ինքը պարտադրում է սահմանազատում, ինքը կարող է հղում կատարել քարտեզներին, Ալմաթիի պայմանագրին, իսկ մյուս դեպքում, ինչը ձեռնտու չի, չի համաձայնվում դրան»,-ասաց նա։

Պատգամավորը նշեց, որ Ադրբեջանի հետ խաղաղությունն անհրաժեշտություն է, բայց վաղաժամկետ է՝ հաշվի առնելով նրա հռետորաբանությունը, իրականացված սադրանքները և ցեղասպանությունը, որ կատարել է Արցախի նկատմամբ։

Ասուլիսի ժամանակ Գառնիկ Դանիելյանը նշել է, որ այս օրերին Կիրանցի մեր հայրենակիցները, քույրերն ու եղբայարները ենթարկվում են աննախադեպ ճնշումների:

Նրա խոսքով, Կիրանցի բնակիչների մոտ ստեղծում են մի իրավիճակ, որ այլեւս ելք չկա, ամենաճիշտ լուծումն այն փոխհատուցումն է, որն առաջարկում է կառավարությունը։

«Ստեղծում են այնպիսի վիճակ, որ ճիշտ կլինի այդ փոխհատուցումը վերցնել, այլապես դրանից էլ կզրկվեն: Դուք տեսաք, մի քանի օր առաջ հայտարարությաւն տարածվեց, որ կադաստրի վկայականները ճիշտ չեն տրվել, խնդիր չունեն։ Պատահական չէ նման տեղեկատվությունը։ Ասել են, եթե հանգիստ չվերցնեք ձեր փոխհատուցումները, որն առաջարկվում է, վաղը մյուս օրը դրանից էլ կզրկվեք։ Այսինքն, էլի ահաբեկչական մեթոդների են դիմում: Հիմա տարբեր տիպի ստորաբաժանումներ են մտել Կիրանց գյուղ՝ ոստիկանական ուժեր, հատուկ ծառայություններ, տեղի իշխանությունների ներկայացուցիչներ, Երևանից եկած մարդիկ։ Ամեն մի կիրանցեցու երևի 10-15 չինովնիկ է բաժին ընկնում, որոնք ամեն օր համոզում են, սպառնում են, ճնշումների ենթարկում։ Պատահական չէ, որ պատգամավորներին, լրագրողներին թույլ չեն տալիս գյուղ մտնել, ներկայացնել, թե ինչ է տեղի ունենում։ Այսինքն տեռոր են իրականացնում»,-ասել է Դանիելյանը՝ հավելելով, որ նաև սպառնում են մարդկանց պետական աշխատանքից ազատել, քրեական գործեր հարուցել։

Մանրամասները՝ տեսանյութում

https://youtu.be/osMhHa57lvA