«Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը այսօր՝ հունիսի 19-ին հանդես է եկել մամուլի ասուլիսով: Նա ներկայացրել է ընթացիկ զարգացումները եւ Շարժման գալիք ծրագրերը:

Ասուլիսը մեկնարկել է աղոթքով։

Բագրատ Սրբազանը նախ շնորհակալություն է հայտնել լրատվամիջոցներին մինչև օրս կատարած ծանր աշխատանքի համար, որը միտված էր միայն ճշմարտության տարածմանը։

«Դուք այս ամբողջ ժամանակահատվածում ոչ միայն կատարել եք ձեր մասնագիտական պատասխանատվությունը, միաժամանակ մարտնչել եք ստի դեմ»,- ասել է Սրբազանը։

Անդրադառնալով ներկա իշխանությունների պահվածքին՝ Բագրատ սրբազանն ասել է. այլեւս որեւէ լեգիտիմություն չունեցող իշխանությունն արյունատենչ, արյունի ձգտող, միայն իր փողի ու աթոռի իշխանությունը պահպանելուն կոչված մի փոքրիկ խումբ է, որը պատրաստ է գնալ ամեն ինչի, որի վկայությունն էր հունիսի 12-ը:

Նրա խոսքով, հունիսի 12-ից հետո իրենք պայքարի վերադասավորման փուլ են մտել. «Պայքարն ավելի ներառական ու ընդգրկուն է դառնալու: Բովանդակությունը մնացել է նույնը: Շարժումը շարունակվում է էլ ավելի մեծ թափով, էլ ավելի կազմակերպչական վերադասավորումներով, որին դուք շատ շուտ ականատես կլինեք, նաեւ մասնակից կլինեք»,-ասել է նա:

Սրբազանը նշել է, որ այսօր էլ շարունակվում են հալածանքները, մարդկանց տներից հանելով, վախեցնելով, սարսափեցնելով զուտ նրա համար, որ ճշմարտության համար պայքարի են դուրս եկել. «Նաեւ գործարարների վրա կան ճնշումներ: Բոլոր միջոցներով փորձում են վախեցնել մարդկնց, բայց ոչ ոք ոչ նահանջելու, ոչ ընկճվելու, ոչ պայքարի հրաժարվելու միտում ունի: Այս ամենի պատասխանատուն մեկ մարդ է՝ կառավարության ղեկին նստող ստախոսն է եւ ոստիկանության գլխին գտնվող այն մարդիկ, որոնք այդ հրամանները իրագործել են կամ տվել են: Մենք բոլոր փաստերով հաղորդումներ կներկայացնենք; Այս ընթացքում բերման են ենթարկվել, ձերբակալվել ու կալանքի են ենթարկվել միայն քաղաքացիները, ոչ մի ոստիկանի նկատմամբ վարույթ չկա»,- ընդգծել է Բագրատ Սրբազանը:

Նա հայտարարել է, որ իրենց պայքարի քաղաքական բաղադրիչը մնում է նույնը՝ գործող իշխանության հեռացումը, հրաժարեցումը:

Ըստ փաստաբան Արսեն Բաբայանի՝ Հունիսի 12-ը ոստիկանության կողմից իրականացված դաժան ու աննախադեպ մի երևույթ էր:

«Մեր համոզմամբ, ի սկզբանե պլանավորված էր որպես պատժիչ գործողություն այն քաղաքացիների ու լրագրողների նկատմամբ, որոնք մասնակցում են այս շարժմանը։ Կան փաստագրված տվյալներ, որ նռնակները նետվել են առանց որևէ դիմադրության կամ հարձակման։ Այսինքն, մինչև առաջին նռնակը նետվելը, քաղաքացիների կողմից չի իրականացվել որևէ այնպիսի գործողություն, որը կստեղծեր իրավաչափ պայմաններ՝ հատուկ միջոցների կիրառման համար։ Իսկ մինչ հատուկ միջոցների կիրառումը առանձին դաժանությամբ ծեծի են ենթարկել քաղաքացիներին»,-ասել է Արսեն Բաբայանը։

Նա նշեց, թե ոստիկանության կողմից ընդգծված վատ վերաբերմունքը քաղաքացիների նկատմամբ սկսվել է դեռ Կիրանցից։

Բաբայանի խոսքով՝ կանգնեցրել են մարդկանց մեքենաները, տարել տուգանային հրապարակներ՝ առանց լուրջ հիմնավորումների։

«Քանի որ պլաստմասե շշերով հնարավոր չէ բռնություն կիրառել, մարդկանց սկսել են ձերբակալել խուլիգանության մեղադրանքներով։ ՀՅԴ անդամներին ապօրինի ձերբակալում են, իբր մարդկանց նյութական առումով շահագրգռելու համար», – ասել է Բաբայանը։

Ասուլիսին Սրբազանն անդրադարձել է «Տավուշը հանուն հայրենիքի» շարժման առաջնորդներից Սուրեն Պետրոսյանին։

«Սուրեն Պետրոսյանին հանդիպել եմ հունիսի 13-ի երեկոյան, այդ դեպքից հետո, որը մեզ համար անհասկանալի մնաց։ Խոսել եմ իր հետ, մանրամասն քննարկել ենք հարցերը։ Ինքը պատմել է եղելությունը։ Ես ընդունել եմ այնպես, ինչպես պատմել է, որովհետև այլ միջոց չունենք քննելու։ Սուրենը խնդրեց, որ մի քանի օրով արտերկիր պետք է մեկնի։ Բայց վերադարձին մենք շատ հարցեր ունենք Սուրենին, թե ինչ է իրականում տեղի ունեցել և որոշելու, թե այս ճանապարհը միասին անցնո՞ւմ ենք, թե՞ ոչ։ Ես այդ օրը բեմից էլ հայտարարել եմ, որ, ըստ մեզ հասած տեղեկությունների, Սուրեն Պետրոսյանն առևանգվել է։ Դա ինքը պետք է կարողանա հաստատել»,-ասել է Սրբազանը։

Ասուլիսի ժամանակ Գառնիկ Դանիելյանը հրապարակելով կիրանցիներին պարտադրված գաղտնի դիմում-փաստաթուղթը, որը վերաբերվում է նրանց սեփականության իրավունքին՝ ասաց. «Իրավական գործընթաց ենք սկսելու»:

Ի հավելումն Գառնիկ Դանիելյանի խոսքի, Բագրատ Սրբազանն ասել է․ «Կիրանցի ժողովրդի մի մասն էնքան արժանապատվություն ունի, որ փոխհատուցումը մերժել է։ Գիտեք ի՜նչ գումարներ են առաջարկում, մի հատ փոքրիկ տնակի համար, որ դրված էր գյուղ մտնող ոլորանի վրա, 50 հազար դոլար են առաջարկել։ Մարդն ասել է՝ այդ տնակը 1000 դոլար հազիվ արժենա, ինչո՞ւ եք 50 հազար առաջարկում։ Այսինքն՝ կաշառք են տալիս. բա սա նյութապես շահագրգռելու հոդված չի՞։ Որտեղի՞ց են էդ գումարները, պետական բյուջեից են տրամադրո՞ւմ»:

Այս պահի դրությամբ Ոսկեպարի ուղղությամբ այն փշալարերը, որի նկարները տարածվում են, չկան. նշել է Սրբազանը:

«Ես խնդրել եմ երկրորդ անգամ ստուգել բոլոր հնարավոր ծայրերից: Ես ամսի 21-ին գնալու եմ Կիրանց, Ոսկեպար, գնալու եմ իմ աչքով տեսնելու, թե այդ ի՞նչ ցանկապատեր են, ինչ փշալարեր են, որ մեր ամրությունն են ապահովելու: Հիմա դրանք գոյություն չունեն: Միգուցե ինչ-որ մի հատվածում դրել են, նկարել են, ես կարծում եմ՝ դա էլ է սուտ:

Իր ներկայանալն էլ է սուտ, հեծանիվ քշող ատլետիկ մարմինն էլ է սուտ: Բոլոր առումներով ստի մեջ են:

Սրբազանն անդրադարձել է նաեւ բանակի վիճակին՝ նշելով. Որեւէ մեկը գիտի՞ ինչ վիճակում է մեր բանակը:

«Հնդկական զենք էին բերում, թող ասեն՝ ինչքա՞ն են բերել հնդկական զենք, գործածվո՞ւմ է դա, թող ցույց տան: Հիմա կասեն՝ գաղտնի է: Բա եթե գաղտնի է, ինչո՞ւ էիք հրապարակում, ինչու էիք գլուխ գովում: Էլ ֆրանսիական մեքենաների մասին չեմ ասում, թե ինչքան քննադատություն տեղի ունեցավ:

Ես մասնագետը չեմ, որ ասեմ դրանց մասին, բայց հրապարակում լեցուն քննադատություն է եղել եւ ոչ մի արձագանք»,-ասել է նա:

Ասուլիսի մանրամասները՝ տեսանյութում