Այսօր՝ սեպտեմբերի 16-ին «Հայաստան» խմբակցության պատգամավորներ Սեյրան Օհանյանը եւ Գեղամ Մանուկյանը հանդես եկան մամուլի ասուլիսով:

Նրանք ամփոփեցին խորհրդարանական շաբաթը և պատասխանեցին լրագրողների հարցերին:

ԱԺ նիստն ու այս ճեպազրույցն անց ենք կացնում ՀՀ-ի համար բավականին բարդ ռազմաքաղաքական պայմաններում, երբ ՀՀ-ի նկատմամբ ճնշումներն ու պարտադրանքները «հարևանների» կողմից շարունակվում են. ասաց «Հայաստան» խմբակցության ղեկավար Սեյրան Օհանյանը։

Նրա խոսքով, սակայն, ամենացավալին այն է, որ այդ ամենը տեղի է ունենում այն ժամանակ, երբ լրանում է մեր հայրենակիցների՝ արցախահայերի, բռնագաղթեցման 1 տարին. «Երբ Արցախի ռազմաքաղաքական ղեկավարությունը գտնվում է Բաքվի բանտերում և ՀՀ-ի իշխանությունների կողմից ոչ մի քայլ չի կատարվել՝ նրանց վերադարձնելու ուղղությամբ։ Երկու տարի է անցել այն գործողություններից, երբ Ջերմուկի հատվածում ադրբեջանցիներ ներթափանցեցին և այսօր գործուն գործողություններ չեն իրականացվում՝ նրանց ՀՀ տարածքից դուրս մղելու համար։ Մեզ համար Արցախի հարցն ամենացավալին է և այն չի վերջացել։ Արցախի համար հակամարտությունը չի ավարտվել, Ադրբեջանն իր հանցագործ գործողություններով անցած տարի բռնաթափեց ամբողջ Արցախը և դրա համար Ադրբեջանը պետք է պատասխան տա։ Այսօր հակառակն է իրականացվում. Ադրբեջանը, լինելով ագրեսոր երկիր, փորձում է ՀՀ-ի վրա դնել ագրեսոր երկրի վրա դրվող բոլոր պատժամիջոցները»։

Պատգամավորը պնդեց՝ ՀՀ իշխանությունները պարզապես հրաժարվել են Արցախի վերաբերյալ որևէ ռազմավարություն մշակելուց։

Խաղաղություն չեն մուրում, խաղաղությունը պետք է լինի արժանապատիվ. հայտարարեց Սեյրան Օհանյանը` անդրադառնալով խաղաղության գործընթացին:

Նա նշեց, որ խաղաղության գործընթացը միակողմանի պարտադրանքի և ճնշումների արդյունք է. «Սա նման է սահմանազատման այն գործընթացին, երբ որևէ փաստաթուղթ գոյություն չուներ, բայց միակողմանի զիջումներ իրականացվեցին։ Ադրբեջանի նման հռետորաբանության իրավիճակում շատ դժվար է մտածել խաղաղության մասին։ «Խաղաղության պայմանագիրը» պարզապես խաբկանք է կամ այն պարզապես շեղում է իրողությունից»:

Գեղամ Մանուկյանի խոսքով՝ ամիսներ առաջ «Հայաստան» խմբակցության 4 պատգամավորով հնարավորություն ունեինք ծանոթանալ այն փաստաթղթին, որը քննարկվում էր Երևանի և Բաքվի միջև, սակայն, երբ սկսեցինք բարձրաձայնել մեր անհանգստությունները, դրանից հետո Փաշինյանի կամայական որոշմամբ մեզ արգելվեց:

Նա ավելացրեց, որ կրկին դիմել են ԱԳՆ-ին, սակայն դարձյալ մերժում են ստացել. «Այդ պայմանագրում ասվում է, որ կոմունիկացիաների հարցը հանված է։ Ենթադրում եմ, թե որ 3 կետերն են հանվել՝ նրանք, որտեղ հայկական շահն է եղել։ Ադրբեջանը ի նպաստ ՀՀ-ի կետերը հանել է դրույթներից։ Իրականում, Նիկոլ Փաշինյանին միայն սպիտակ թուղթ է պետք, որ 2021 թվականի այն մուրճից հետո մի ձեռքում էլ սպիտակ թուղթ ունենա, որպեսզի ասի՝ տեսեք ժողովուրդ, ձեզ բերեցի խաղաղություն։ Այս բոլորը հաշվի առնելով՝ կարելի է ասել, որ այս ամենի նպատակը իրենց իշխանությունը երկարաձգելն է՝ հետագա բոլոր խնդիրները թողնելով հաջորդ սերունդներին, ղեկավարներին։

Գեղամ Մանուկյանը անդրադառնալով Զինված ուժերի մարտունակությանը ասաց, որ դրա կարևորագույն բաղադրիչներից մեկը բարոյահոգեբանական մթնոլորտն է:

«Երկու փաստ սակայն ներկայացնեմ. 2022 թվականի սեպտեմբերի 13-14-ին ադրբեջանական ագրեսիայի հետևանքով զոհվել է ԶՈՒ 224 զինծառայող կամավորականներ, 2 տարի է անցել, տեսե՞լ եք ԶՈՒ ղեկավարությունից մինչև Հայաստանի «ոչ բարով, խերով» ղեկավար Եռաբլուր գնային կամ որևէ բան ասեին։ Եվ երկրորդը. երեկ ուշ գիշերին լրագրողներից մեկը մի խայտառակ փաստ ներկայացրեց։

Գարեգին Նժդեհի մասին բոլշևիկյան «Զանգեզուր» կինոն օրերս զորամասերից մեկում ցուցադրել են։ Դուք պատկերացնո՞ւմ եք, Գարեգին Նժդեհին որպես դավաճան, խեղկատակ են ներկայացնում։ Սա է այսօրվա ԶՈՒ բարեյահոգեբանական մթնոլորտը»,-ավելացրեց նա։

Մանրամասները՝ տեսանյութում