Համազգային հայ կրթական և մշակութային միության Երևանի գրասենյակի նախաձեռնությամբ և Խ.Աբովյանի անվան հայկական պետական մանկավարժական համալսարանի «Սփյուռք»
գիտաուսումնական կենտրոնի համագործակցությամբ օրերս լույս է տեսել «Զահրատ։ 100 բանաստեղծություն» ժողովածուն։ Հոկտեմբերի 10֊ին Երևանի Ավետիք Իսահակյանի անվան կենտրոնական գրադարանում կայացավ ժողովածուի շնորհանդեսը։

Շնորհանդեսին բացման խոսքով հանդես եկավ Համազգայինի Երևանի գրասենյակի տնօրեն Ռուզան Առաքելյանը։

«Զահրատի բանաստեղծությունը նշանավոր է երեք կարևոր հանգամանքներով։Նախ, որ այն պարզ է, մաքրամաքուր ու անպաճույճ։ Երկրորդ` նա պատմողական բանաստեղծություն է ստեղծել, և երբ կարդում ենք, կարծես հեքիաթ ենք կարդում։ Երրորդ առանձնահատկությունն էլ այն է, որ Զահրատը բանաստեղծության մեջ ստեղծում է կերպարներ, որոնք համամարդկային են»,- իր խոսքում շեշտեց Ռուզան Առաքելյանը`առանձնացնելով Զահրատի յուրահատուկ տողն ու գիրը պոլսահայ գրականության մեջ։

Համազգայինի Կենտրոնական վարչության անունից ներկաներին ողջույնի խոսք հղեց ԿՎ անդամ Արտաշես Շահբազյանը։ «Զահրատը մեզ համար նաև ժամանակի պատմագիր է ու վկա։ Եվ այս իմաստով շատ կարևոր է, որ հրատարակելով այս գիրքը` կարողանանք այդ ժառանգությունը փոխանցել այսօրվա ու վաղվա սերունդներին»,- ընդգծեց Արտաշես Շահբազյանը։

Զահրատ բանաստեղծի մասին իր սրտի խոսքն ասաց գրականագետ, սույն ժողովածուի կազմող Սուրեն Դանիելյանը։ Նա շեշտեց, որ Զահրատը գրում էր մարդու մասին`տառապող մարդու մասին։ «Հիշում եմ նրա նշանավոր մի արտահայտություն` թախծոտին կյանք ու խինդ,իսկ մեռնողին`հիշատակի զորություն։ Զահրատը մեր պոեզիայի համար բերեց այդ կյանքն ու խինդը։ Զահրատը նաև վերադարձրեց Պոլսին նրա առաջնային դերը։ Նա նոր արթնության նշան էր»,- կարևորեց Դանիելյանը` նաև նշելով, որ բոլորս էլ Զահրատի ստեղծագործությունների տիպարներն ենք` տառապող, մենություն ու երկվություն ապրող մարդու տեսքով։ Ուստի` Զահրատը ապրում է բոլորիս մեջ։

Խոսք ասացին նաև գրքի խմբագիր, գրականագետ Քնարիկ Աբրահամյանը, բանաստեղծ Խաչիկ Մանուկյանը, գրականագետ Նոնա Դավթյանը։ Շնորհանդեսի ժամանակ Զահրատի` երգի վերածված բանաստեղծությունները կատարեց ամերիկահայ երգիչ, թարգմանիչ Պերճ Թիւրաբեանը։

Բանաստեղծի ստեղծագործություններից ընթերցեցին դերասան Արամ Կոստանյանը և ասմունքող Գայանե Սամվելյանը։ Միջոցառումն ամփոփվեց գրադարանի տնօրեն Ռուզաննա Բարսեղյանի խոսքով։

Նշենք, որ գիրքը լույս է ընծայվել Համազգայինի Կենտրոնական վարչության անդամ Արևիկ Գաբրիելյանի հովանավորությամբ, որին միացել են նաև Պերճ և Անահիտ Թիւրաբեանները, Արթօ և Զապէլ Խրիմեանները և Լենա Օհաննէսեան-Սթրիթըրը։

Համազգայինի Երևանի գրասենյակ