Համազգային հայ կրթական եւ մշակութային միության Երևանի գրասենյակի նախաձեռնությամբ և Հայաստանի ճարտարապետների պալատի համագործակցությամբ ս.թ հոկտեմբերի 15֊ին կայացավ համահայկական գիտաժողով`«Հովհաննես Քաջազնունին ճարտարապետ» խորագրով։

Գիտաժողովին բացման և ողջույնի խոսքով հանդես եկավ Հայաստանի Հանրապետության վաստակավոր ճարտարապետ Մկրտիչ Մինասյանը, ով կարևորեց հայկական ճարտարապետության ասպարեզում Հովհաննես Քաջազնունու դերն ու այդ ոլորտում նրա թողած ժառանգությունը։ Նա շնորհակալություն հայտնեց Համազգայինի Երևանի գրասենյակին համագործակցության համար և հույս հայտնեց, որ այն շարունակական կլինի։

Համազգայինի Կենտրոնական վարչության ողջույնի խոսքը ներկաներին փոխանցեց ԿՎ անդամ Արտաշես Շահբազյանը` շեշտելով Քաջազնունու դերը ոչ միայն հասարակական֊քաղաքական կյանքում, այլև` որպես յուրահատուկ ձիրքով օժտված ճարտարապետի, մտավորականի։

Խոսք ասաց նաև Համազգային հայ կրթական եւ մշակութային միության Երևանի գրասենյակի տնօրեն Ռուզան Առաքելյանը։

Ալ.Թամանյանի անվան ճարտարապետության ազգային թանգարանի անունից ներկաներին ողջունեց տնօրեն Զարուհի Հայրապետյանը։

Առաջին նիստը նախագահում էր ճարտարապետության թեկնածու, պրոֆեսոր Էմմա Հարությունյանը։

Զեկուցումներով հանդես եկան Համազգայինի Բեյրութի Մ. եւ Հ. Արսլանեան ճեմարանի նախկին տնօրեն, մանկավարժ Տիգրան Ճինպաշեանը, ճարտարապետության դոկտոր Լոլա Դոլուխանյանը, ճարտարապետության դոկտոր, պրոֆեսոր Աշոտ Գրիգորյանը, պ.գ.թ., պրոֆեսոր Գևորգ Ստեփանյանը, ճարտարապետության թեկնածու Սարհատ Պետրոսյանը։

Երկրորդ նիստը, Սարհատ Պետրոսյանի նախագահությամբ, բացվեց Համազգայինի Կենտրոնական վարչության անդամ, ճարտարապետ Արա Գէորգեանի խոսքով (Լիբանան)։ Նա ներկայացրեց Հովհաննես Քաջազնունուն որպես ճարտարապետական տեսլականով քաղաքական գործչի` առանձնացնելով այն, որ թե’ քաղաքական դաշտում և թե’ ճարտարապետության ասպարեզում Քաջազնունին կառուցող էր, առաջադեմ և բծախնդիր։

Զեկուցումներով հանդես եկան նաև ճարտարապետության թեկնածու, պրոֆեսոր Էմմա Հարությունյանը, ճարտարապետ֊ հետազոտող Ռուզան Կուրտանջյանը, ճարտարապետության դոկտոր, պրոֆեսոր Մարիետտա Գասպարյանը և ճարտարապետության դոկտոր, պրոֆեսոր Լյուբա Կիրակոսյանը։

Համազգայինի Երևանի գրասենյակ