Հայաստանի Հանրապետությունում Նիկոլ Փաշինյանի և նրա խամաճիկների կողմից նոր թափ ստացած իրավական կամայակունթյունները, բռնություններն ու ապօրինությունները հատել են բոլոր կարմիր գծերը և հանդիսանում են Հայաստանում բռնապետական ռեժիմի հաստատման ցցուն օրինակ։ Այսօր առավոտյան կրկին խուզարկություններ և ձերբակալություններ են սկսվել Հ․Յ․Դաշնակցության, Սրբազան պայքարի և այլ ընդդիմադիր ուժերի առաջնորդների և ներկայացուցիչների շրջանում։ Ապօրինությունների և բռնությունների ծավալները հասնում են աննախադեպ մասշտաբների։

Վերջին օրերին Հարյուրավոր կազմակերպությունների, միջազգային կառույցների և գործիչների կողմից բարձրացված դժգոհություններն ու դատապարտումները մնացել են անպատասխան և անարդյունք, իսկ Հայաստանը կայուն տեմպերով վեր է ածվում թշնամու օրակարգերը սպասարկող բռնապետության։

Այսպիսի պայմաններում անիմաստ է հանդես գալ որևէ հորդորով կամ կոչով, քանզի բռնապետն անսասան է իր ծրագրերում և ոչնչի առջև կանգ չի առնի իր իշխանությունը երկարացնելու և դատաստանի ու պատասխանատվության պահը մի քանի տարով երկարացնելու համար։

Ըստ այդմ, մենք կրկին դատապարտում ենք ՀՀ իշխանությունների ապազգային, անմարդկային և հակաիրավական գործելակերպը, կոչ ենք անում Ռուսաստանի Դաշնությունում և Սփյուռքում գտնվող բոլոր մեր հայրենակիցներին ոչ միայն բարձրաձայնել ապօրինությունների մասին, այլև հնարավոր բոլոր միջոցներով խոչընդոտել Նիկոլ Փաշինյանի և նրա հանցավոր խմբավորման հայահալած և պետականակործան ծրագիրը։

Սիրելի հայրենակիցներ, անտարբերությունը դավաճանություն է․

Մի մնացեք անտարբեր՝ դատապարտեք Փաշինյանի բռնաճնշումներն ու ապօրինությունները։

Մի մնացեք անտարբեր՝ խոչընդոտեք Հայաստանը բռնապետության վերածելու Փաշինյանի գործելակերպը։

Մի մնացեք անտարբեր՝ կասեցրեք Փաշինյանի պետականակործան ընթացքը։

ՀՅԴ Ռուսաստանի կոմիտե
Ք․Մոսկվա, 25․06․2025թ․