Oգոստոսի 7-8-ին ՀՀ վարչապետ Նիկոլ Փաշինյանը այց կկատարի Ամերիկայի Միացյալ Նահանգներ։ Վաշինգտոնում Փաշինյանը երկկողմ հանդիպում կունենա Ամերիկայի Միացյալ Նահանգների նախագահ Դոնալդ Ջ. Թրամփի հետ՝ Հայաստան-ԱՄՆ ռազմավարական գործընկերությունը խորացնելու նպատակով, ինչպես նաև եռակողմ հանդիպում՝ ԱՄՆ նախագահ Դոնալդ Ջ. Թրամփի և Ադրբեջանի նախագահ Իլհամ Ալիևի հետ՝ միտված տարածաշրջանում խաղաղության, բարօրության և տնտեսական համագործակցության առաջմղմանը։

Alpha News-ը թեմայի վերաբերյալ զրուցել է Ամերիկայի Հայ դատի հանձնախմբի մամուլի խոսնակ Եղիսաբեթ Չուլջյանի հետ:

«Ամերիկայի հայ դատի հանձնախումբը միշտ աշխատել է ի նպաստ իրական խաղաղության, խաղաղություն, որը հիմնված է արդարության, հաշվետվության և հայկական արժանապատվության վրա։ Եթե Սպիտակ տանը ստորագրվի խաղաղության համաձայնագիր, բայց այնտեղ չընդգծվի Արցախից բռնի տեղահանված հայերի տուն վերադառնալու իրավունքը, եթե շրջանցվի գերիների ազատ արձակման հարցը ու Հայաստանի տարածքային ամբողջականության դեմ կատարված ոտնձգություններն, ապա այն իրական խաղաղություն չէ»,- նշել է Չուլջյանը։

Նրա խոսքով՝ Ամերիկայի կառավարությունը հստակ պետք է նշի, որ խաղաղության պայմանագիրը պետք է ներառի հայերի վերադարձը Արցախ, գերիների ազատ արձակումը, հայկական մշակութային ժառանգության և Հայաստանի ինքնիշխանության պաշտպանությունը։